8
እዝራራ ድኦፐ ስምዳ አሳ
1 ካዎይ አርፀክስስ ካዎትዳ ዎደ ታራ እስፈ ባብሎነ ቢታፈ ስምዳ ሶ አሳ ሀላቃት ሀይሳታ፤
2 ፍንሃሳ ያራፐ ገርሶና፥ እታማራ ያራፐ ዳነላ፥ ዳዊታ ያራፐ ሳካና ናኣ ሀፁሳ፥
3 ፓሮሳ ያራፐ ዛካርያሳነ ኤንታ የለታ ማራን ፃፈትዳ ሀራ እስ ፄታነ እሻታሙ አደታ።
4 ፓሀት-ሞአበ ያራፐ ዛራሀ ናኣ ኤልሆኤናያነ እያራ ደእያ ናምኡ ፄቱ አደታ።
5 ዛታ ያራፐ ያሀዝኤላ ናአ ሳካናነ እያራ ደእያ ሄꬑ ፄቱ አደታ።
6 አድና ያራፐ ዮናታና ናኣ ኤቤዳነ እሻታሙ አደታ።
7 ኤላማ ያራፐ ጎቶላ ናአ ይሻያነ እያራ ደእያ ላፑን ታሙ አደታ።
8 ሳፋፃ ያራፐ ምካኤላ ናአ ዝባዳነ እያራ ደእያ ሆስፑን ታሙ አደታ።
9 እዮኣባ ያራፐ ይኤላ ናአ አብድዩነ እያራ ደእያ ናምኡ ፄታነ ታማነ ሆስፑን አደታ።
10 ባና ያራፐ ዮስፍያ ናአ ሳሎምታነ እያራ ደእያ እስ ፄታነ ኡሱፑን ታሙ አደታ።
11 በባያ ያራፐ በባያ ናኣ ዛካርያሳነ እያራ ደእያ ላታማነ ሆስፑን አደታ፥
12 አዝጋዳ ያራፐ ሀቃፃና ናአ ዮሃናነ እያራ ደእያ እስ ፄታነ ታሙ አደታ።
13 አዶንቃማ ያራፐ ዉርሰꬃን ስምዳይሳት፥ ኤልፋላፃ፥ ይኡኤላ፥ ሻማያነ ኤንታራ ደእያ ኡሱፑን ታሙ አደታ።
14 ብግዋያ ያራፐ ኡታያ፥ ዛኩራነ ኤንታራ እስፈ ሀራ ላፑን ታሙ አደታ።
15 ታኒ አሀዋኮ ጎግያ ሻፋ ማታን ኤንታ ሺሻስ። ኑኒ ሄ በሳን ዱንካንድ፥ ሄꬑ ጋላስ ታክዳ። ታኒ ሄ በሳን ደእያ አሳነ ካህነታ ታይብያ ዎደ ሌወ ያራፐ እስ አስካ ደማብከ። 16 ሄሳ ግሾ፥ አላዛራ፥ አርኤላ፥ ሻማያ፥ ኤልናታና፥ ያርባ፥ ኤልናታና፥ ናታና፥ ዛካርያሳነ ማሱላማ ጌተተይሳታነ ጭንጫ አስ ግድዳ ዮያርባነ ኤልናታና ፄጋስ። 17 ኤንታ ካስፍያ ጌተትያ በሳን ሌወታስ ሀላቃነ ፆሳ ኬꬃ ኦሳንቾ ግድዳ አዶስነ እያ ዳቦታስ ኦዳናባ አኬክሳዳ ኑ ፆሳ ኬꬃን ኦꬅያ አሰ ኤሀና መላ ኪታስ። 18 ኑ ፆሳ ሎኦ ኩሸይ ኑ ቦላ ደእያ ግሾ፥ እስራኤለ ናአ ሌወ ያራ ማህላ ያራነ ዳሮ ጭንጫ አስ ግድዳ ሳረባያ ጌተትያ አድያ ታማነ ሆስፑን እያ ናይታነ እያ እሻታ፥ ኑስ የድዶሶና። 19 ሄሳዳካ፥ ሀሻባ፥ ማራራ ያራ ግድዳ ያሻያ፥ እያ ናይታነ ላታሙ ግድያ እያ እሻታራ የድዶሶና። 20 ሄሳ ቦላ ካሰ አዋት ሌወታ ማዳና መላ ዳዊቲነ እያራ ኦꬅያ ሀላቃት ሹምዳ ፆሳ ኬꬃ ኦሳንቾታፐ ናምኡ ፄታነ ላታሙ አሳታ የድዶሶና። ሄሳት ኡባይ ባንታ ሱንꬃን ፃፈትዶሶና።
21 ኑ ፆሳ ስንꬃን ኑ ሁጵያ ካዉሽድ፥ ኦገይ ኑስ፥ ኑ ናይታስነ ኑ ሻሎ ኡባስ ሳሮ ግዳና መላ ዎሳና መላ ያን አሀዋ ሻፋ ማታን ፆማ አዋጃስ። 22 ካሰ ኑኒ ካዋስ፥ “ኑ ፆሳ ሎኦ ኩሸይ እያ ኮየይሳታ ቦላ ደኤስ፤ ሽን እያ ዎልቃማ ሀንቆይ እያ አገይሳታ ቦላ ደኤስ” ያግድ ኦድዳ ግሾ፥ ኑኒ ብያ ኦግያን ደእያ ሞርከታፐ ኑና ናጋና መላ ዎታዳረነ ፓራታ እማናዳ ካዋ ኦይቻናዉ ዬላታስ። 23 ሄሳ ግሾ፥ ኑኒ ፆምድ፥ ፆሳ ዎስዳ፤ እካ ኑ ዎሳ ስእስ።
24 ካህነ ሀላቃታፐ ሳረባያ፥ ሀሳባያነ ሀራ ኤንታ ዳቦ ግድዳ ታሙ አሳታ ዶራስ። 25 ካዎይ፥ እያራ ዞረተይሳት፥ እያ ሹማትነ እስራኤለ ኡባይ ኑ ፆሳ ኬꬃስ እምዳ ብራ፥ ዎርቃነ፥ ሀራ ሚሸታ ኡባ ልካዳ ኤንታ ኩሸን ዎꬃስ። 26 ታኒ ኤንታዉ እምዳባይ ሀይሳ፤ ላታማነ ናምኡ ሙኩሉ ክሎ ግራመ ብራ፥ ሄꬑ ሙኩሉነ ኦይዱ ፄቱ ክሎ ግራመ ብራፐ ኦሰትዳ ሚሸታ፥ ሄꬑ ሙኩሉነ ኦይዱ ፄቱ ክሎ ግራመ ዎርቃ፥ 27 ሆስፑን ክሎ ግራመነ ኦይዱ ፄቱ ግራመ ዎርቃፈ ኦሰትዳ ላታሙ ሳነታነ ዎርቃዳ አልኦነ ሙሩቶ ግድዳ ናሰ ብራታፐ ኦሰትዳ ናምኡ ሳነታ።
28 ሄሳፈ ጉየ፥ ታኒ ኤንታኮ ሀይሳዳ ያጋስ፤ “ህንተነ ሀ ሚሸት ጎዳስ ዱማትደታ፤ ሀ ብራይነ ዎርቃይ፥ አሳይ ባ ዶሳን ጎዳስ፥ ህንተ አዋታ ፆሳስ እምዳ እሞታ። 29 የሩሳላመን ደእያ ፆሳ ኬꬃን ሚሸ ምንጅያ ኬꬃ ጋክድ፥ ካህነ ሀላቃታ ስንꬃን፥ ሌወታ ስንꬃንነ እስራኤለ ያራታ ሀላቃታ ስንꬃን እማና ጋካናዉ፥ ሀ ሚሸታ ሎይꬅድ ናግተ” ያጋስ። 30 ሄሳ ግሾ፥ ካህነትነ ሌወት የሩሳላመን ደእያ ፆሳ ኬꬅ ኤፋናዉ ብራ፥ ዎርቃነ ሀራ ሚሸታ ኡባ ምዛነን ልክድ አዋተꬃን ኤክዶሶና።
31 ኮይሮ አጌናን ታማነ ናምአንꬆ ጋላሳን የሩሳላመ ባናዉ አሀዋ ሻፋ ማታፐ ደንድዳ። ኑ ቦላ ደእያ ኑ ፆሳ ሎኦ ኩሸይ ኑ ብያ ኦገን ደእያ ሞርከታፐነ ፓንጋታፐ ኑና አሽስ። 32 ኑኒ የሩሳላመ ጋክድ፥ ያን ሄꬑ ጋላስ ሸምፕዳ።
33 ኦይዳንꬆ ጋላስ ብራ፥ ዎርቃነ ሀራ ሚሸታ ኡባ ልክድ፥ ኡራያ ናኣ ካህንያ ማረሞታስ እምዳ። ፍንሃሳ ናኣ አላዛር፥ ሌወ ግድዳ እያሱ ናኣ ዮዛባትነ ብንያ ናአ ኖኣድ እያራ እስፈ ደኦሶና። 34 ኡባባይ ሄ ዎደ ታይበት ልከትድ ፃፈትስ።
35 ሄሳፈ ጉየ፥ ድኦፐ ስምዳ አሳይ፥ እስራኤለ ፆሳስ፥ ታማነ ናምኡ ኮርማ፥ ኡዱፉን ታማነ ኡሱፑን ማራዘነ ላፑን ታማነ ላፑን ዶርሳ ኡርገታ ፁሳ ያርሾ ኦꬅድ፥ ቃስ ታማነ ናምኡ ኮለ ናጋራ ያርሾ ኦꬅድ ጎዳስ ያርሽዶሶና። ሄስ ኡባይ ፁሳ ያርሾ ግድድ ጎዳስ ሺቅስ። 36 ካዎይ ኪትዳ ኪታካ ካዉዋፐ ጋርሳራ ቢታ አይሰይሳታስነ ኤፍራፂሳ ሻፋፐ ሄፍንꬃ ቢታ አይሰይሳታስ እምዶሶና፤ ኤንቲ እስራኤለ አሳነ ፆሳ ኬꬃ ኦሱዋ ማድዶሶና።