1 ሀ ኡባይ ሀንዳፐ ጉየ፥ ደርያ ካለይሳት ታኮ ይድ፥ ሀይሳዳ ያግዶሶና፤ “እስራኤለ አሳይ፥ ሀር አቶሽን፥ ካህነት፥ ሌወት፥ ባንታ ሄራን ደእያ፥ ካናነታ፥ ህተታ፥ ፓርዘታ፥ ያቡሰታ፥ አሞነታ፥ ሞአበታ፥ ግብፀታነ አሞረታ ቱናፐ ባንታና ሻክቦኮና። 2 ባንታዉነ ባንታ ናይታስ አይሁደ ግዶና ማጫ ናይታፐ ማቾ ኤክዶሶና፤ ሄሳ ጋሶን ጌሻ ዘረꬃ አይሁደ ግዶና አሳራ ዋላክዶሶና። ሀ ባላን ኮይሮ ግድዳይ ካለይሳታነ ሀላቃታ” ያግዶሶና።

3 ታኒ ሀ ኦዳ ስእዳ ዎደ ታ ማኡዋነ ታ ቃምስያ ዳካስ፤ ታ ሁጵያነ ታ ቡቻ ስካስ፤ ዳሮ ዳጋማዳ ኡታ አጋስ። 4 ድኦፐ ስምዳ አሳይ ኦꬅዳ ናጋራ ግሾ፥ እስራኤለ ፆሳይ ኦድዳ ቃላስ ያይዳ አሳ ኡባይ ታኒ ደእያ በሳ ታኮ ሺቅዶሶና። ኦማርሳ ያርሾ ያርሽያ ዎደ ጋካናዉ ዳጋማዳ ኡትዳ በሳፈ ደንዳብከ።

5 ሽን ኦማርሳ ያርሾይ ሺቅያ ዎደ፥ ታ ማኦይነ ታ ቃምሰይ ዳከትድ ደእሽን፥ ታኒ አዛናዳ ኡትዳ በሳፈ ደንዳስ። ጉልባታዳ ጎዳኮ፥ ታ ፆሳኮ፥ ታ ኩሽያ ደንꬃዳ፥ ሀይሳዳ ያጋዳ ዎሳስ። 6 “አቤት ታ ፆሳዉ፥ ኑ ናጋራይ ዶረትድ ኑ ሁጵያፐ አꬍዳ ግሾነ ኑ ናቆይ ሳሎ ጋክዳ ግሾ ታኒ ታ ሶምኡዋ ኔኮ ደንꬃናዉ ያያይስነ ዬላታይስ። 7 ኑኒ ኑ ማይዛታ ዎደፐ ዶምን፥ ሀች ጋካናዉ፥ ነና ዳሮ ናቅዳ። ኑ ናጋራ ጋሶን ኑኒ፥ ኑ ካዎትነ ኑ ካህነት ሀእይሳዳ አላጋ ካዎታ ኩሸን ኩንድዳ፤ ማሻስ፥ ዶኦስ፥ ቦንቄስነ ዬላስ አꬍድ እመትዳ።

8 “ሽን ሀእ ጎዳይ ኑ ፆሳይ ኑፐ ጉꬃ አስ አሻናዉነ ባ ኬꬃን ኑስ በሰ እማናዉ ኮይድ ጉꬃ ዎደስ ማሮተꬅ እሚስ። ሄሳ ግሾ ፆሳይ ኑ አይፊያ ዶይስ፤ ኑ አይለተꬃን ደእሽን ጉꬃ ዎደስ ሸምፖ እሚስ። 9 ኑኒ አይለ ግድኮካ፥ ኑ ፆሳይ ኑና አይለተꬃን አግቤና፤ ኑ ደኡዋ ኦራꬅስ። ኑ ፆሳ ኬꬃ ኬፃና መላ፥ ላለትዳይሳ ኦራꬃና መላነ ይሁዳንነ የሩሳላመን ሳሮ ዳና መላ ፋርሰ ካዎታ ስንꬃን ኑስ ቴሞ እሚስ።

10 “ሽን ኑ ፆሳዉ፥ ሀእ ያትን፥ ኑኒ ዎይጋኔ? ሄኮ ሀእካ ነ ኪታ ቶችዳ። 11 ኑ ቶችዳይ ነ አይለ ግድዳ ናበታ ባጋራ ‘ህንተ ላታናዉ ገልያ ቢታይ፥ እን ደእያ አሳን ቱንዳሮ፤ ሀ ጋፃፐ ህን ጋፃ ጋካናዉ ኤንታ ኢታ ኦሱዋንነ ቱናተꬃን ኩማሱ። 12 ሄሳ ግሾ፥ ህንተ ምኖ ግዳና መላ፥ ሄ ቢታ አይፍያ ማና መላነ መርናዉ ህንተ ናይታስ ላትሳና መላ፥ ህንተ ማጫ ናይታ ኤንታ አደ ናይታስ እሞፍተ፤ ኤንታ ማጫ ናይታ ህንተ አደ ናይታስ ኤኮፍተ። ኤንቲ ሳሮተꬃንነ ዱረተꬃን ዳና መላ አሞቶፍተ’ ያጋዳሳ።

13 “ኑ ቦላ ጋክዳ ኢታባ ኡባይ ኑ ኢታ ኦሱዋነ ኑ ግታ ናጋራ ጋሶና። ግዶሽን፥ ኔኒ ኑ ፆሳይ ኑ ናጋራ ዳሮተꬃ መላ ኑና ፕርዳባካ፤ ሽን ኑፐ ጉꬃታ አሻዳሳ። 14 ኑኒ ሀይሳ መላ ቱናባ ኦꬅያ አሳራ ኤኮንነ ገሎን ዋላከትድ፥ ዋንድ ነ ኪታ እፃስ ጋኔ? ሀ አትዳ ጉꬃ ኮቻይ ꬋያና ጋካናዉ ነ ሀንቆይ ኑ ቦላ ዳረነዬ? 15 አቤት ጎዳዉ፥ እስራኤለ ፆሳዉ፥ ኔኒ ፅሎ፤ ኑኒ ሀእ ጋካናዉ አትድ ደኦን ደኦስ። ኑ ናጋራ ጋሶን ኑፐ እሶይካ ነ ስንꬃን ኤቃናዉ ዳንዳኤይ ባዋ፤ አትዳይሳት ሀች ሀይሳን ነ ስንꬃን ደኦስ” ያጋስ።