1 ፆሳይ ኮይሮ ሳሎታነ ሳአ መꬍስ። 2 ሄ ዎደ ሳእ ጊጎናነ አይብካ ባይና መላ ደኤስ። ꬉም ቢታ ማእዳ ዎልቃማ ሃꬃታ ቦላ ደኤስ። ፆሳ አያናይ ሃꬃፈ ቦላራ ቃፄስ።

3 ሄሳፈ ጉየ፥ ፆሳይ፥ “ፖኦይ ሀኖ” ያግን፥ ፖኦይ ሀንስ። 4 ፖኦይ ሎኦ ግድዳይሳ ፆሳይ በእስ፤ ፖኡዋ ꬉማፐ ሻክስ። 5 ፆሳይ ፖኡዋ፥ “ጋላስ” ግድ ሱንꬅስ፤ ቃስ ꬉማ “ቃማ” ግድ ሱንꬅስ። ሳእ ቃምስ ዎንትስ፤ ሄስ ኮይሮ ጋላስ።

6 ሄሳፈ ጉየ፥ ፆሳይ፥ “ቦላራ ደእያ ሃꬃ ጋርሳን ደእያ ሃꬃፈ ሻክያ ሳሎ ጉፋንꬆይ ሀኖ” ያግን ሀንስ። 7 ፆሳይ ሳሎ ጉፋንꬆ ጊግስድ፥ ሳሎ ጉፋንꬆፈ ቦላራ ደእያ ሃꬃ ጋርሳን ደእያ ሃꬃፈ ሻክስ። 8 ፆሳይ ሄ ጉፋንꬁዋ፥ “ሳሎ” ግድ ሱንꬅስ። ሳእ ቃምስ፤ ዎንትስ፤ ሄስ ናምአንꬆ ጋላሳ።

9 ሄሳፈ ጉየ፥ ፆሳይ፥ “መላ በሳይ ቆንጫናዳ ሳሎፐ ጋርሳን ደእያ ሃꬅ ኡባይ እስ በሲ ሺቆ” ያግን ሀንስ። 10 ፆሳይ ሄ መላ በሳ፥ “ቢታ” ግድ ሱንꬅስ፤ ቃስ እስ በሳን ሺቅዳ ሃꬃ፥ “አባ” ግድ ሱንꬅስ። ያትድ፥ ፆሳይ ሄስ ሎኦ ግድዳይሳ በእስ። 11 ሄሳፈ ጉየ፥ ፆሳይ፥ “ቢታይ ምꬅ ማታ ዶልሶ፤ ዘረꬃ አይፈይ ደእያ ካꬅነ ዘረꬃ አይፈይ ግዶን ደእያ ምꬅ ዶሎ” ያግስ፤ ሄሳዳካ ሀንስ። 12 ቢታይ ምꬅ ማታ እያ ቆሞን ቆሞን ዶልስስ። ፆሳይ ሄስ ሎኦ ግድዳይሳ በእስ። 13 ሳእ ቃምስ ዎንትስ፤ ሄስ ሄꬓንꬆ ጋላስ።

14 ሄሳፈ ጉየ፥ ፆሳይ፥ “ጋላሳ ቃማፈ ሻካናዉ ፖኦት ሳሎን ሀኖ። ኤንቲ ቃማ፥ ጋላሳ፥ ዎደነ ላይꬅ ኤርሳናዉ ማላ ግዶ። 15 ቢታ ቦላ ፖአና መላ ኤንቲ ሳሎ ጉፋንꬆን ሀኖ” ያግስ፤ ሄሳዳካ ሀንስ። 16 ፆሳይ ናምኡ ግታ ፖኦታ መꬍስ። አዊ ጋላስ፥ አጌን ቃማ ፖአና መላ ኦꬅስ። ሄሳዳካ ፆልንቶታ መꬍስ። 17 ፆሳይ ኤንቲ ሀ ሳአ ቦላ ፖአና መላ ሳሎን ዎꬅስ። 18 ሄስ፥ ጋላስነ ቃማ ሃራና መላነ ፖኦ ꬉማፐ ሻካና መላሳ። ፆሳይ ሄስ ሎኦ ግድዳይሳ በእስ። 19 ሳእ ቃምስ ዎንትስ፤ ሄስ ኦይዳንꬆ ጋላስ።

20 ሄሳፈ ጉየ፥ ፆሳይ፥ “ደኦይ ደእያ ዱማ ዱማ መተꬃት ሃꬃን ዳሮ፤ ካፎትካ ሳአፐ ቦላራ፥ ሳሎ ጉፋንꬆፈ ጋርሳን ፕራꬎ” ያግስ። 21 ያትድ ፆሳይ አባን ደእያ ግታ ዶአታ፥ ሃꬃ ግዶን ዎፅ ቃፅያ መተꬃታ ኡባነ ፓልያ ካፎታ ኡባ እያ ቆሞን ቆሞን መꬍስ። ፆሳይ ሄስ ሎኦ ግድዳይሳ በእስ። 22 ፆሳይ ኤንታ፥ “የለትተ፥ ዳርተ፥ አባ ኩምተ፥ ካፎት ቢታ ቦላ ዳሮ” ያግድ አንጅስ። 23 ሳእ ቃምስ ዎንትስ፤ ሄስ እቻሻንꬆ ጋላስ።

24 ሄሳፈ ጉየ፥ ፆሳይ፥ “ደኦይ ደእያ መተꬃት ኤንታ ቆሞን ቆሞን፥ መሄታ፥ ሳአራ ጎሸትያ መተꬃታነ ዶአታ ኤንታ ቆሞን ቆሞን ቢታይ ከሶ” ያግን ሀንስ። 25 ሄሳዳ ኦꬅድ ኤንታ ኡባ መꬍስ። ፆሳይ ሄስ ሎኦ ግድዳይሳ በእስ።

26 ሄሳፈ ስምን፥ ፆሳይ፥ “አሰ ኑና ዳንስድ አነ መꬎኦስ። ኤንቲ አባ ሞሉዋ፥ ሳሎ ካፎታ፥ ቢታ ቦላ ዎፅ ቃፅያ መተꬃ ኡባ ሃሮ” ያግስ። 27 ሄሳዳ ፆሳይ አሰ ባና ዳንስድ መꬍስ። እ አሰ ፆሰ ዳንስድ መꬍስ፤ ኤንታ አደነ ማጫስ ኦꬅድ መꬍስ።

28 ፆሳይ ኤንታና፥ “የለትተ፥ ዳርተ፥ ሳአ ኩምተ፤ ሃርተ። አባ ሞሎ፥ ሳሎ ካፎታነ ቢታ ቦላ ዎፅ ቃፅያ፥ ደኦይ ደእያ መተꬃ ኡባ ሃርተ” ያግድ አንጅስ።

29 ሄሳፈ ጉየ፥ ፆሳይ፥ “ታኒ ቢታ ኡባ ቦላ ዘረꬃ አይፈይ ደእያ ካꬃ ኡባነ ዘረꬃ አይፈይ ግዶን ደእያ ምꬅ ኡባ ህንተዉ እማስ፤ ሄስ ህንተዉ ካꬅ ግዶ። 30 ቃስካ ሀ ሳአን ደእያ መሄነ ዶአ ኡባስ፥ ሳሎ ካፎ ኡባስነ ሳአራ ጎሸትያ መተꬃ ኡባስ ምያባ ግዳና መላ፥ ጭልኦ ምꬅነ ማታ እማስ” ያግስ፤ ሄሳዳካ ሀንስ። 31 ፆሳይ ባ መꬍዳ ኡባባካ ፄልያ ዎደ ዳሮ ሎኦ ግድዳይሳ በእስ። ሳእ ቃምስ፤ ዎንትስ፤ ሄስ ኡሱፑንꬆ ጋላስ።