1 ሳሎትነ ሳእ ኤንታን ደእያባ ኡባባይ ሀይሳዳ መትድ ፖለትስ። 2 ፆሳይ ባ ኦሱዋ ፖልድ፥ ላፑንꬃ ጋላሳን ሸምፕስ። 3 ፆሳይ ላፑንꬃ ጋላሳን ባ ኦꬅያ ኦሱዋ ኦንግድ ሸምፕዳ ግሾ ሄ ጋላሳ አንጅስ፤ ጋላሳታፐ ዱማይስ። 4 ሳሎትነ ሳእ ሄሳዳ ሀን መትስ።

ጎዳ ፆሳይ ሳአነ ሳሎታ መꬍዳ ዎደ፥ 5 ሳአ ቦላ እር ቡክቦና ግሾነ ኦꬅያ አስ ባይና ግሾ ምꬅነ ማት ዶልቤና፤ አጭያባይካ ባዋ። 6 ግዶሽን፥ ሳአፐ ሃꬅ ፑልትድ፥ ቢታ ኡባ ላክሴስ። 7 ሄሳፈ ጉየ፥ ጎዳ ፆሳይ ቢታ ባናፐ አሰ *አሰ፦ አሰ ገይስ እብራወꬆ ዶናን “አዳመ” ጌተቴስ። “አዳመ” ጉሳይ “ቢታ” ጉሱ። መꬍድ እያ ሲራ ደኦ ሸምፖ ፑንድ ገልስስ። ያትን፥ ሄ አደይ ደኦራ ደእያ አሰ ግድስ።

8 ጎዳ ፆሳይ ዶሎሀ ባጋራ ኤደነ ጋናተ ጊግስስ፤ ያን ባ መꬍዳ አድያ ዎꬅስ። 9 ጎዳ ፆሳይ ፄላናዉ ሎእያ፥ ማናዉካ ማልእያ ኡባ ቆሞ ምꬅ ቢታፈ ዶልስስ። ጋናተ ግዶን ደኦ እምያነ ሎኦነ ኢታ ኤርስያ ናምኡ ምꬃታ ዎꬅስ።

10 ጋናተ ኡሽያ ሻፋ ሃꬃይ ኤደነፐ ጎጌስ። ሄ ሻፋይ ኤደነፐ ከይድ ኦይዱ ሻፉ ከይድ ሻከቴስ። 11 ኮይሮ ሻፋ ሱንꬃይ ፍሶነ። ፍሶነይ ዎርቀይ ደእያ ሀውላ ቢታ ቦላ ጎጌስ። 12 ሄ ቢታ ዎርቀይ ጌሻ ዎርቃ። ቃስ አልኦ ሽቶይነ ሹች ያን ደኤስ። 13 ናምአንꬆ ሻፋ ሱንꬃይ ግዮነ። ግዮነይ ቶጰ ቢታ †ቶጰ ቢታ፦ በን ቶጰ ቢታይ ሀእ ደእያ ሱዳነፐነ ቶጰፈ ባጋ ኤኬስ። ዩሹዋን ጎጌስ። 14 ሄꬓንꬆ ሻፋ ሱንꬃይ ፀግሮሳ። ፀግሮስ አሶረፐ ዶሎሀ ባጋራ ጎጌስ። ቃስ ኦይዳንꬆ ሻፋይ ኤፍራፂሳ።

15 ጎዳ ፆሳይ አስ ኤደነ ጋናተ ኦꬃና መላነ ናጋና መላ እያ ኤፍድ ያን ዎꬅስ። 16 ጎዳ ፆሳይ አሰ፥ “ጋናተ ምꬃ ቴራ ኡባፈ ኔኒ ማናዉ ዳንዳኣሳ። 17 ሽን ሎኦነ ኢታ ኤርስያ ምꬃ አይፍያፐ ሞፓ። አይስ ጊኮ፥ ኔኒ እያፐ ምዳ ጋላስ ቱማ ሀይቃና” ያግድ ኪትስ።

18 ሄሳፈ ጉየ፥ ጎዳ ፆሳይ፥ “አደይ ባርካ ደኤይስ ሎኦ ግደና። ታኒ እያ ማዳና መላ እያዉ እንጀትያ ላገ መꬋና” ያግስ።

19 ጎዳ ፆሳይ መሄታ፥ ዶአታነ ሳሎ ካፎታ ኡባ ቢታፈ መꬍስ። ያትድ፥ ኤንታ ዎይግድ ሱንꬃነኮ በአናዉ አዳመኮ ኤህን፥ አዳመይ ደኦይ ደእያ መተꬃ ኡባ ሱንꬅዳ ሱንꬃይ ኤንታ ሱንꬅ ግድድ አትስ። 20 ሄሳዳካ፥ አዳመይ መሄታ፥ ሳሎ ካፎታነ ባዞ ዶአታ ኡባ ሱንꬅስ። ሽን አዳመስ እንጀትያነ እያ ማድያ ላገይ በንትቤና።

21 ሄሳ ግሾ፥ ጎዳ ፆሳይ አዳመ ዎልቃማ ꬍስኮን የግስ። እ ꬍስኮ ሀይቅዳሽን እያ ምየ መቀꬃፈ እሱዋ ኤክድ፥ ሄ በሳ አሾን ኩንꬅስ። 22 ጎዳ ፆሳይ አዳመፐ ኤክዳ መቀꬃ ማጫ ኦꬅድ መꬍስ፤ ያትድ እዮ እያኮ ኤህስ። 23 አዳመይ፥ “ሀ መቀꬅያ ታ መቀꬃፈ፥ ሀ አሽያ ታ አሾፐ ኤከትዳሮ። እያ አደፈ ኤከትዳ ግሾ ማጫ ‡ማጫ፦ እብራወꬆ ዶናን ማጫ ገይሳራነ አደ ገይሳራ ናምአይ እስኖ። እብራወꬆን “አደ” ገይስ “እሽ” ጌተቴስ፤ “ማጫ” ገይስ “እሻ” ጌተቴስ። ጌተቶ” ያግስ። 24 ሄሳ ግሾ አስ ባ አዋነ ባ አይዉ አግድ፥ ባ ማቸራ እስፈ ደኤስ፤ ናምአይ እስ አስ ግዶሶና። 25 አዳመይነ ሄዋና ናምአይካ ፅረ ካሎ ደኦሶና፤ ሽን እሶይ እሱዋስ ዬላቶኮና።