1 ሾሽ ጎዳ ፆሳይ መꬍዳ ዶአ ኡባፈ አꬍዳ ገናንቾ። እስ ጋላስ ሾሽ ማጫስዉ፥ “ፆሳይ ቱማ ህንተና፥ ‘ጋናትያን ደእያ ምꬃ አይፈ ኡባፈ ሞፕተ’ ግዴ?” ያግድ ኦይችስ።

2 ማጫስያ ሾሻኮ፥ “አካይ፥ ፆሳይ ሄሳዳ ግቤና፤ ኑኒ ጋናተ ግዶን ደእያ ምꬃታ አይፈ ማናዉ ዳንዳኦስ። 3 ሽን ፆሳይ ኑና፥ ‘ጋናተ ግዶን ደእያ ምꬃ አይፈ ሞፕተ፥ ቦቾፍተ፤ እፅኮ ህንተ ሀይቃና’ ግስ” ያጋሱ።

4 ሾሻይ ማጫስዉ፥ “ህንተ አይኮካ ሀይቀከታ። 5 ፆሳይ ሄሳ ግዳይ፥ ሄ ምꬃ አይፍያ ህንተ ሚኮ አኬካ ደምድ ሎኦነ ኢታ ፆሳዳ ህንተ ኤራናይሳ እ ኤርያ ግሾሳ” ያግስ።

6 ማጫስያ ምꬃ አይፈይ ማናዉ ማልኤይሳ፥ በአናዉ ሎኤይሳነ፥ ጭንጫተꬅ ደማናዉ አሞያባ ግደይሳ በአሱ። ሄ ምꬃ አይፍያፐ ኤካዳ ማሱ። ቃስ ባ አዝናስካ እምን እካ ምስ።

7 ኤንቲ ም ስሚድ፥ ናምአይካ አኬካ ደምዶሶና። ኤንቲ ፅረ ካሎ ደኤይሳ ኤርዶሶና። ሄሳ ግሾ ባላሰ ምꬃ ሀይꬅ ስክድ ዳንጭዶሶና።

8 ሳእ ኦማርስዳ ዎደ ጋናተ ግዶን ጎዳ ፆሳይ ሄመትሽን እያ ግርሳ አዳመይነ እያ ማችያ ስእዶሶና። ኤንቲ ጋናተ ምꬃ ግዶን ጎዳ ፆሳፈ ቆሰትዶሶና። 9 ሽን ጎዳ ፆሳይ አዳመ ፄግድ፥ “አዳመ፥ አዉን ደአይ?” ያግስ።

10 አዳመይ፥ “ጋናተ ግዶን ነ ግርሳ ስአዳ ታኒ ካሎ ደእያ ግሾ ያያዳ ቆሰታስ” ያግስ።

11 ጎዳ ፆሳይ፥ “ኔኒ ካሎ ደኤይሳ ነዉ ኦድዳይ ኦኔ? ታኒ ነና ሞፓ ግዳ ምꬃ አይፈፐ ማድዬ?” ያግድ ኦይችስ።

12 አዳመይ፥ “ታራ ዳና መላ ኔኒ እምዳ ማጫስያ ሄ ምꬃ አይፍያፐ ታዉ እምን ማስ” ያግስ።

13 ጎዳ ፆሳይ፥ ማጫስዉ፥ “ኔኒ ሄሳ አይስ ኦꬃዲ?” ያግድ ኦይችስ።

ማጫስያ፥ “ታና ሾሻይ ጭምን ማስ” ያጋሱ።

14 ጎዳ ፆሳይ ሾሻ፥ “ኔኒ ሀይሳ ኦꬅዳ ግሾ፥ መሄፐነ ዶአ ኡባፈ አꬋዳ ባደትዳባ ግዳ። ኔኒ ነ ኡሎን ቢታራ ጎሸታና፤ ነ ደኦ ላይꬃ ኡባን ባና ላጫና። 15 ታኒ፥ ነ ግዶንነ ማጫሰ ግዶን፥ ነ ሼሻ ግዶንነ እ ሼሻ ግዶን ሞርከተꬅ ዎꬃና። እ ነ ሁጵያ ቆፃና፥ ነካ እያ ግንድያ ዱካና” ያግስ።

16 ማጫስዉ ጎዳ ፆሳይ፥ “ነ ቃንꬃትዳ አጌናን ዳሮ ኡንኤታና። ኔኒ ዎልቃማ ዋየን ናአ የላና። ግዶሽን፥ ኔኒ ነ አዝናራ ዳናዉ አሞታና፤ እ ነና ሃራና” ያግስ።

17 ጎዳ ፆሳይ አዳመኮ፥ “ኔኒ ነ ማቸ ኦዳ ስእዳ ግሾነ ታኒ ነና ሞፓ ግዳ ምꬃ አይፍያፐ ኔኒ ምዳ ግሾ፥ ቢታይ ነ ጋሶን ባደትዳይሳ ግዶ። ኔኒ ነ ደኦ ላይꬃ ኡባን ግታ ዳቡርሳን ቢታ ኦꬃዳ ማና። 18 ቢታይ ነዉ አጉንꬅነ ሀርመ ዶልሳና፤ ኔኒ ቢታፈ ዶልድ ካፅያባ ማና። 19 ኔኒ ነ መትዳ ቢታ ስማና ጋካናዉ ዳቡራን ጫዋታዳ ኦꬅዳ ነ ካꬅ ማና። ኔኒ ቢታፈ መትዳ ግሾ ቢታ ስማና” ያግስ።

20 አዳመይ ባ ማችዉ ደኦይ ደእያ አሳ ኡባስ አዮ ግድያ ግሾ ሄዋኖ *ሄዋኖ፦ ሀ ሱንꬃ ብርሸꬃይ “ደእያሮ” ጉሱ። ግድ ሱንꬅስ።

21 ጎዳ ፆሳይ አዳመነ እያ ማችዉ እተ ጊግስድ ማይዝስ።

22 ጎዳ ፆሳይ፥ “ህዛ አስ ሎኦነ ኢታ ኤሮን ኑፐ እሱዋዳ ግድስ። ኤንቲ ባንታ ኩሽያ የድድ፥ ደኦ እምያ ምꬃ አይፍያፐ ኤክድ ሞና መላነ መርናዉ ደኦን ዶና መላ ተቀታናዉ ኮሼስ” ያግስ። 23 ሄሳ ግሾ፥ ኤንቲ ባንታ መትዳ ቢታ ኦꬃና መላ ጎዳ ፆሳይ ኤደነ ጋናተፐ ኤንታ ከስስ። 24 ያትድ፥ ደኦ እምያ ምꬃኮ ኤፍያ ኦግያ ናጋና መላ ክሩቤላ ጌተትያ ደኦ መተꬃታነ ሽረት ሽረት ዎꬍያ ታማ ላጮ ማሸ ኤደነ ጋናተፐ ዶሎሀ ባጋራ ዎꬅስ።