1 አዳመይ ባ ማቸ ሄዋንራ አቅስ። እያ ቃንꬃታዳ አደ ናአ የላሱ። “ጎዳይ ታና ማድን አደ ናአ ደማስ” ጋዳ ቃየላ ጋዳ ሱንꬃሱ። 2 እያ እሻ አበላ የላሱ። አበል ዶርሰ ሄሜስ ቃስ ቃየል ቢታ ኦꬄስ። 3 ኡንደና ዎደፐ ጉየ፥ ቃየል ባ ጋደን ካፅዳ ካꬃፈ ጎዳስ ያርሾ ያርሽስ። 4 ሽን አበል ባ ዶርሳ ዉድያ ግዶን ባይራ የለትዳይሳ ሹክድ እያ አሹዋፐ ሞꬎ ባጋ ያርሽስ። ጎዳይ አበላነ እያ ያርሹዋ ኤክስ። 5 ሽን ቃየላነ እያ ያርሹዋ ኤክቤና። ሄሳ ግሾ፥ ቃየል ዳሮ ይሎትስ፤ እያ ሶምኦይ ꬉምስ።

6 ጎዳይ ቃየላኮ፥ “አይስ ይሎታይ? ነ ሶምኦይ አይስ ꬉምዴ? 7 ኔኒ ሎኦ ኦꬅዳባ ግድያኮ፥ ነ ሶምኦይ ፓሽካ ግደኔ? ሽን ኔኒ ሎኦ ኦꬆና እፅኮ፥ ናጋር ዶአዳ ነ ፐንገን ናጌስ። እ ነና ሃራናዉ ኮዬስ፥ ሽን ኔኒ እያ ፆናናዉ በሴስ” ያግስ።

8 ሄሳፈ ጉየ፥ ቃየል ባ እሻ አበላኮ፥ “አነ ደምባ በሲ ቦስ” ያግስ። ኤንቲ ደምባን ደእሽን፥ ቃየል ባ እሻ አበላ ቦላ ደንድድ እያ ዎꬍስ።

9 ጎዳይ ቃየላ፥ “ነ እሻይ አበል አዉኔ?” ያግድ ኦይችስ።

ቃየል ዛሪድ፥ “ታኒ ኤርከ፤ ታ እሻ ናገይ ታነዬ?” ያግስ።

10 ጎዳይ ቃየላ፥ “ሀይሳ አይስ ኦꬃዲ? ሄኮ፥ ነ እሻ ሱꬃይ ቢታፈ ታኮ ፅሎ ፕርዳስ ዋሴስ። 11 ኔኒ ባደትዳባ ግድያ ግሾ ቢታ ዛራዳ ኦꬃናዉ ዳንዳአካ። ነ እሻ ዎꬋዳሳ እያ ሱꬃካ ቢታን ጉሳዳሳ። 12 ኔኒ ኦꬅንካ ቢታይ ነዉ አይፈና፤ በተ አሳዳ ኔኒ ሳአ ቦላ ቶይላታዳ ዳቡራና” ያግስ።

13 ቃየል ጎዳኮ፥ “ነ ታ ቦላ ፕርድዳ ፕርዳይ ታ ዎልቃፈ ቦላ። 14 ኔኒ ታና ሀች ቢታፈ የደꬃሳ፤ ነ ስንꬃፈካ ሃሳሳ። በተ አሳዳ ታኒ ሳአ ቦላ ዳቡራና፤ ታና ደምያ ኦንካ ዎꬋና” ያግስ።

15 ጎዳይ እያ፥ “ነና ኦንካ ዎና፤ ዎꬍኮ፥ ታኒ ላፑን ቶሆ ሀሎ ከያና” ያግስ። ሄሳ ግሾ፥ እያ ደምያ ኦንካ ዎꬎና መላ ጎዳይ እያ ቦላ ናግሶ ማላ ዎꬅስ። 16 ቃየል ጎዳ ስንꬃፈ ከይድ፥ ኤደነ ባጋፈ ዶሎሀ ባጋን ደእያ ኖዳ፥ *ኖዳ ቶይላትድ ዳቡርያ በሲ ቢታን ደእስ።

17 ቃየል ባ ማቸራ አቅስ፤ እያ ቃንꬃታዳ ሄኖከ የላሱ። ሄ ዎደ ቃየል ካታማ ኬፅድ፥ ሄ ካታማ ባ ናኣ ሱንꬃን “ሄኖከ” ግድ ሱንꬅስ። 18 ሄኖከይ ጋይዳ የልስ። ጋይድ ማኤላ የልስ። ማኤል ማቱሳኤላ የልስ። ማቱሳኤል ላመሀ የልስ።

19 ላመህ አዶነ ሲሎ ጌተትያ ናምኡ ማቾ ኤክስ። 20 አዳ ያባላ የላሱ። ያባል መሄ ሃርያነ ዱንካነን ደእያ አሳታ አዋ። 21 እያ እሻ ሱንꬃይ ዩባላ። ዩባል ቃስ ዲꬅ ዲፀይሳታነ ሱሱልኤ ፑንያ አሳታ ኡባ አዋ። 22 ሲላ ቃስ ቱባልቃይና ጌተትያ ናኣ የላሱ። ቱባልቃይን ናሰ ብራታፐነ ብራታፐ ዱማ ዱማ ሚሸታ ቆፀይሳታ አዋ። ቱባልቃይና ምችያ ናእሞ።

23 እስ ጋላስ ላመህ ባ ማቸታ፥ “አደ፥ ሲለ፥ ስእተ፤ ታ ማቸቶ፥ ታኒ ኦድያባ ሀይዝተ። እስ ፓንꬃ አደይ ታና ደችድ ማዱንፅስዳ ግሾ፥ ታኒ እያ ዎꬋስ። 24 ቃየላ ሃሉዋ ከያናው ላፑን ኩሸ ኮሽኮ፥ ላመሀ ሃሉዋ ከያናው ላፑን ታማነ ላፑን ኩሸ ኮሼስ” ያግስ።

25 አዳመ ማችያ ሀራ አደ ናኣ የላሱ። ያታዳ፥ “ቃየል ዎꬍዳ አበላ ግሾ ፆሳይ ታዉ ሀራ ናአ እሚስ” ጋዳ እያ ሴታ †ሴታ፦ እብራወꬆ ዶናን ሀ ሱንꬃ ብርሸꬃይ “እሚስ” ጉሱ። ጋዳ ሱንꬃሱ። 26 ሴት አደ ናአ የልድ እያ “ሄኖሳ” ግድ ሱንꬅስ። አሳይ ጎዳ ሱንꬃ ፄግድ ጎይኖ ዶምዳይ ሄ ዎደ።