1 አሳይ ሳአ ቦላ ዳርዳ ዎደ ኤንታዉ ማጫ ናይት የለትዶሶና። 2 “ፆሳ ናይታ” ጌተትያ መተꬃት ሄ ማጫ ናይት ማላ ሎኦ ግደይሳ በእድ ኤንታፈ ባንታዉ ዶርዳይሳታ ማችዶሶና። 3 ጎዳይ፥ “አሳስ ደኦ እምያ ታ አያናይ አሳን መርናዉ ዴና። አስ ሀይቀይሳ ግድያ ግሾ፥ ህዛፐ እያ ላይꬃይ እስ ፄታነ ላታማ ግዳና” ያግስ። 4 ሄ ዎደነ ሄሳፈ ጉየ፥ ፆሳ ናይት አሳ ማጫ ናይታ ኤክን፥ ናይት የለትዳ ዎደ፥ ዎጋ አዱሳ አሳት ሳአ ቦላ ደእዶሶና። ኤንቲ በን ዎደ ኦላስ ምኖነ ኤረትዳ አሳታ።

5 ጎዳይ ሄ ዎደ ሳአ ቦላ ደእያ አሳ ኢታተꬅ ዳርዳይሳነ ኤንታ ዎዛናይ ኡባ ዎደ ቆፕያባይ ኢታ ፃላላ ግድዳይሳ 6 በእድ፥ አሰ ሀ ሳአ ቦላ መꬍዳይሳን አዛንስ፤ ባ ዎዛናን ዳሮ ቂሮትስ። 7 ታኒ አሰ አይስ መꬋድና ጋዳ ቂሮታስ። ሄሳ ግሾ፥ ጎዳይ፥ “ታኒ መꬍዳ አሰ፥ መሄ፥ ዶአ፥ ሳአራ ጎሸትያ መተꬃታነ ሳሎ ካፎታ ሳአ ቦላፈ ꬋይሳና” ያግስ። 8 ሽን ኖሄይ ጎዳ ስንꬃን ሳባ ደምስ።

9 ኖሄ ታርከይ ሀይሳፈ ካልድ ፃፈትዳይሳ። ኖሄይ ባ ዎደ ደእያ አሳ ግዶፈ ፆሳ ኡፋይስያነ ሱረ አስ። 10 ኖሄይ ሴማ፥ ካማነ ያፈታ ጌተትያ ሄꬑ አደ ናይታ የልስ።

11 ሄ ዎደ ቢታይ ኩመꬅ ፆሳ ስንꬃን ቱንስ፤ ቢታ ኡባይ ጌላተꬃን ኩምስ። 12 ፆሳይ ሀ ቢታ ፄልያ ዎደ ሳአን ደእያ አሳ ኡባይ ባንታ ኦግያ ቱንስድ ደኤይሳ በእስ።

13 ሄሳ ግሾ፥ ፆሳይ ኖሄ ሀይሳዳ ያግድ ኪትስ፤ “ታኒ አሳ ኡባ ꬋይሳና ሀናይስ። ኤንታ ጋሶን ቢታይ ጌላተꬃን ኩምዳ ግሾ፥ አሰ ቢታፈ ꬋይሳና። 14 ሄሳ ግሾ፥ ምኖ ምꬃፈ ነዉ ማርካበ ኬፃ። ሄ ማርካብያ ግዶን ዳሮ ቆልአታ ከሳ። ያታዳ ሶራነ ካረራ ማደ መላባን ሜሻ። 15 ማርካብያ ሀይሳዳ ያታዳ ኬፃ፤ አዱሳተꬃ 300 ዋꬋ፥ ጎምፓ 50 ዋꬋ፥ ጌሳ 30 ዋꬋ ኦꬃ። 16 ማርካብያስ ካራ መꬋ፤ ካራፐነ ጎዳፐ ግዶን እስ ዋꬋ ግድያ በሲ ዶያ አጋ። ፐንግያ ማርካብያስ ምየ ባጋራ ከሳ፤ ማርካብያ ሄꬑ ፖቀ ከሳዳ ኬፃ።

17 “ታኒ ሳሎፐ ጋርሳን ሸምፖራ ደእያ መተꬃ ኡባ ꬋይሳናዉ ꬋዮ ሃꬃ የዳዳ ሀ ሳኣ ቦላ ደእያባ ኡባ ꬋይሳና። 18 ሽን ታኒ ታ ጫቁዋ ኔራ ጫቃና። ኔኒ፥ ነ ማችዉ፥ ነ አደ ናይታነ ኤንታ ማቸታ ኤካዳ ማርካብያ ግዶ ገላ። 19 ኤንቲ ኔራ ደኦን ዳና መላ፥ ደኦይ ደእያ መተꬃ ኡባፈ ቆሞን ቆሞን አደነ ማጫ ናምአ ናምአ ኦꬃዳ፥ ማርካብያ ግዶ ገልሳ። 20 ዱማ ዱማ ቆሞ ካፎታፐ፥ ዱማ ዱማ ቆሞ መሄታፐነ ሳአራ ጎሸትያ ዱማ ዱማ ቆሞ መተꬃ ኡባፈ ናምአ ናምአ ግድድ ደኦን ዳና መላ ኔኮ ዮ። 21 ቃስ ህንተነ ዶአት ማናዉ ዱማ ዱማ ቆሞ ምያ ካꬅ ኤፋዳ፥ ማርካብያ ግዶን ቆላ” ያግስ።

22 ኖሄይ ኡባባካ ፆሳይ ኪትዳይሳዳ ኦꬅስ።