1 ሄሳፈ ጉየ ጎዳይ ኖሄ ሀይሳዳ ያግስ፤ “ኔኒ ነ ሶ አሳ ኡባራ ማርካብያ ግዶ ገላ። ሀ ዎድያ የለተꬃ ግዶን ታ ሸንያ ፖልዳይ ነ ፃላላ ግድዳይሳ በአስ። 2 ኔኒ ቱና ግዶና መሄነ ዶአ ኡባፈ እያ ቆሞፈ ቆሞፈ አደነ ማጫ ላፑን ላፑን፥ ቱና መሄነ ዶአ ኡባፈ እያ ቆሞፈ ቆሞፈ እስ አደነ እስ ማጫ ገልሳ። 3 ቃስ ሳሎ ካፎታፐ እያ ቆሞፈ ቆሞፈ አደነ ማጫ ላፑን ላፑን ኦꬃዳ፥ ቢታ ኡባ ቦላ ዱማ ዱማ ኮቻይ ደኦን ዳና መላ ኔራ ኤካዳ ገላ። 4 ላፑን ጋላሳፐ ጉየ፥ ታኒ ኦይታሙ ጋላስነ ኦይታሙ ቃማ ሀ ሳኣ ቦላ እራ ቡክሳና። ያታዳ ታኒ መꬍዳ መተꬃ ኡባ ቢታ ቦላፈ ቁቻና” ያግስ።

5 ያትን ኖሄይ ጎዳይ እያ ኪትዳ ኡባባ ኦꬅስ።

6 ꬋዮ ሃꬃይ ሀ ሳኣ ቦላ ይዳ ዎደ ኖሄስ ላይꬅ ኡሱፑን ፄታ። 7 ኖሄይ፥ እያ አደ ናይት፥ እያ ማችያነ እያ ናይታ ማቸት ꬋዮ ሃꬃፈ አታናዉ ማርካብያ ግዶ ገልዶሶና። 8 ቱና ግዶና መሄፐነ ዶአፐ፥ ቱና መሄፐነ ዶአፐ ካፎታፐነ ቢታራ ጎሸተይሳታ ኡባፈ 9 ፆሳይ ኖሄ ኪትዳይሳዳ አደነ ማጫስ ናምአ ናምአ ግድድ፥ ኖሄኮ ማርካብያ ግዶ ገልዶሶና። 10 ላፑን ጋላሳፐ ጉየ፥ ꬋዮ ሃꬃይ ሀ ሳአ ቦላ ይስ።

11 ኖሄይ ኡሱፑን ፄቱ ላይꬅ ደእን፥ ናምአንꬆ አጌናን፥ ታማነ ላፑንꬃ ጋላሳን፥ ቢታ ግዶን ደእያ ግታ ጪሙዋ ፑልቶ ኡባይ ꬉቅ አግስ። ሳሎን ደእያ ሃꬃ ማስኮተት ዶየትዶሶና። 12 እራይ ሀ ሳኣ ቦላ ኦይታሙ ጋላስነ ኦይታሙ ቃማ ቡክስ። 13 እር ቡካ ዶምዳ ጋላስ ኖሄይነ እያ ማችያ፥ እያ አደ ናይት፥ ሴም፥ ካምነ ያፈት፥ እያ ናይታ ሄꬓታ ማቸት እስፈ ማርካብያ ግዶ ገልዶሶና። 14 ዶአ ኡባፈ ባ ቆሞን ቆሞን፥ መሄ ኡባፈ ባ ቆሞን ቆሞን፥ ቢታራ ጎሸትያ ኡባፈ ባ ቆሞን ቆሞን፥ ካፎ ኡባፈ ባ ቆሞን ቆሞን ኤንታራ እስፈ ገልዶሶና። 15 ሸምፖራ ደኤይሳት ኡባይ ናምአ ናምአ ግድድ ኖሄኮ ማርካብያን ገልዶሶና። 16 ፆሳይ ኖሄ ኪትዳይሳዳ፥ መተꬃ ኡባፈ አደነ ማጫ ግድድ ማርካብያ ግዶ ገልን ኖሄፐ ጉየራ ጎዳይ ማርካብያ ፐንግያ ጎርድስ።

17 ꬋዮ ሃꬃይ ኦይታሙ ጋላስ ሳአ ቦላ ቡክሸ ደእስ። ሃꬃይ ዳርድ ማርካብያ ቢታፈ ፑደ ደንꬅስ። 18 ሃꬃይ ቢታ ቦላ ኬህ ዳርን፥ ማርካበይ ሃꬃ ቦላ ቶከትስ። 19 ሳሎፐ ጋርሳን ደእያ ዙማት ኡባይ ምተታና ጋካናስ ሃꬃይ ሳአ ቦላ ኬህ ዳርስ። 20 ሃꬃይ ዙማታ ፄራፐ አꬍድ፥ ታማነ እቻሹ ዋꬋ ጋካናስ ድጭስ። 21 ያትን ሳአ ቦላ ዎፅ ቃፅያ መተꬃት ኡባይ፥ ካፎት፥ መሄይ፥ ዶእነ፥ አስ ኡባይ ሀይቅስ። 22 ቢታ ቦላ ደእያ ባ ሲራ ደኦ ሸምፖ ሸምፕያ ኡባይካ ሀይቅስ። 23 ሳአ ቦላ ደኦይ ደእያ ኡባይ፥ አሳይ፥ መሄይ፥ ዶአይነ ሳሎ ካፎት ኡባይካ ሳአፐ ቁሸትዶሶና። ኖሄይነ እያራ ማርካብያ ግዶን ደኤይሳታ ፃላል አትዶሶና። 24 ሄ ሃꬃይ ፓጮና ፄታነ እሻታሙ ጋላስ ሳአ ቦላ ጋምእስ።