1 ሽን ፆሳይ ኖሄ፥ እያራ ማርካብያ ግዶን ደእያ ዶአ ኡባነ መሄ ኡባ ቆፕድ ሳአ ቦላ ጫርኮ ጫርክስን ሄ ሃꬃይ ዎꬍ ዎꬍ ብስ። 2 ቃስ ቢታ ግዶን ደእያ ጪሙዋ ፑልቶይነ ሳሎን ደእያ ሃꬃ ማስኮተት ጎርደትዶሶና፤ እራይካ ሳሎን ተቀትስ። 3 ያንን፥ ሃꬃይ ፄታነ እሻታሙ ጋላስ ጋካናዉ ዎꬍ ዎꬍ ብስ። 4 ሃꬃይ ዎꬍን ላፑንꬃ አጌናን፥ ታማነ ላፑንꬃ ጋላሳን ማርካበይ አራራተ ዙማታ ቦላ ኡትስ። 5 ሃꬃይ ታማንꬃ አጌና ጋካናዉ ዎꬍ ዎꬍ ብስ። ታማንꬆ አጌናስ ኮይሮ ጋላስ ዙማታ ፄራት በንትዶሶና።

6 ኦይታሙ ጋላሳፐ ጉየ፥ ኖሄይ ባ ኬፅዳ ማርካብያ ማስኮትያ 7 ዶይድ እስ ቁሮ ካረ የድን ቁሮይ ሃꬃይ ቢታ ቦላፈ መላና ጋካናስ፥ ያነ ሃነ ፕራꬍሸ ጋምእስ። 8 ቃስ ኖሄይ ሃꬃይ ቢታ ቦላፈ ዎꬍ ዉርዳኮ በአናዉ እስ ሆለ ካረ የድስ። 9 ሽን ሄ ሆልያ ሃꬃይ ቢታ ኡባ ቦላ ሀእካ ደእያ ግሾ፥ ሸምፕያ በሲ ደማቡኩ። ሄሳ ግሾ ስማዳ፥ ማርካብያኮ ይን፥ ኖሄይ ባ ኩሽያ የድድ፥ ባኮ ማርካብያ ግዶ ኤክስ።

10 ሄሳፈ ጉየ፥ ላፑን ጋላስ ጋምእድ፥ ሆልዉ ዛሪድ የድስ። 11 ሄ ሆልያ ሳእ ኦማርስያ ዎደ እያኮ ስማዳ ያሸ ሻማሆ አጫፐ ዱꬅዳ እርፃ ሀይꬅ ባ ዶናን ሳፃ ኤካዳ ያሱ። ያትን፥ ሃꬃይ ቢታ ቦላፈ ዎꬍዳይሳ ኖሄይ ኤርስ። 12 ቃስ ኖሄይ ሀራ ላፑን ጋላስ ጋምእድ፥ ሄ ሆልዉ ዛሪድ የድስ። ሽን ሄ ሆልያ እያኮ ስማዳ ያቡኩ።

13 ኖሄይ ኡሱፑን ፄታነ እስ ላይꬅ ደእን፥ ኮይሮ አጌናን ኮይሮ ጋላስ፥ ሃꬃይ ቢታ ቦላፈ ፅዝእስ። ኖሄይ ማርካብያ ካማ ቃር ፄልድ፥ ቢታይ ፅዝእዳይሳ በእስ። 14 ናምአንꬆ አጌናን ላታማነ ላፑንꬃ ጋላሳን፥ ቢታይ ኩመꬅ መልስ።

15 ፆሳይ ሄ ዎደ ኖሄ ሀይሳዳ ያግድ ኪትስ፤ 16 “ኔኒ፥ ነ ማችዉ፥ ነ አደ ናይታነ ነ ናይታ ማቸታ ኤካዳ ማርካብያ ግዶፈ ከያ። 17 ኤንቲ የለትድ፥ ዳራና መላ ደኦይ ደእያ መተꬃ ኡባፈ ኔራ ደኤይሳታ ካፎታ፥ መሄታ፥ ዶአታነ ቢታራ ጎሸትያ ኡባ ኔራ ከሳ” ያግስ። 18 ያትን ኖሄይ ባ አደ ናይታራ፥ ባ ማቸራነ ባ ናይታ ማቸታራ ማርካብያ ግዶፈ ከይስ። 19 ያንን፥ መሄይነ ዶአይ፥ ሳአራ ጎሸትያ መተꬃይ፥ ካፎይነ ሳአ ቦላ ዎፅ ቃፅያባ ኡባይ ባ ቆሙዋን ቆሙዋን ማርካብያ ግዶፈ ከይዶሶና።

20 ሄሳፈ ጉየ፥ ኖሄይ ጎዳስ ያርሾ በሲ ግምብድ ቱና ግዶና መሄነ ዶአ ኡባፈ፥ ቱና ግዶና ካፎ ኡባፈ ኤክድ፥ ጊግስዳ በሳን ያርሾ ኦꬅድ ፁግስ። 21 ያትን፥ ጎዳይ ሄ ያርሹዋ ፔኑዋ ስንግድ፥ ባ ዎዛናን ሀይሳዳ ያግስ፤ “ናአተꬃፈ ዶምድ አስ ዎዛናን ቆፕያባ ኡባይ ኢታ ግድኮካ ታኒ አሳ ቆሆ ግሾ ጋዳ ናምአንꬆ ሀ ሳኣ ባድከ። ቃስ ታኒ ሀእ ኦꬅዳይሳዳ ደኦይ ደእያ መተꬃ ኡባ ናምአንꬆ ꬋይስከ። 22 ሀ ቢታይ ደእዳ ዎደ ኡባን፥ ዘርያ ዎደይነ ጫክያ ዎደይ፥ ሜጎይነ ሆምበይ፥ ቦነይነ ባልጎይ፥ ጋላስነ ቃም ኡባ ዎደ ዳና” ያግስ።