1 ጉꬃ ዎደፐ ጉየ፥ ግብፀ ካዋ ኡሻ ካፖይነ ካꬃ ካፖይ ባንታ ጎዳ፥ ግብፀ ካዋ ናቅዶሶና። 2 ካዎይ ሄ ናምኡ ካፖታ ቦላ ዳሮ ይሎትድ፥ 3 ዮሰፍ ቃሸትዳ፥ ቃሾ ኬꬃ ናገይሳታ ካፑዋ ሶን ኤንታ ቃችስ። 4 ናገይሰታ ሀላቃይ ኤንታ ዮሰፋስ ሼꬍስ፥ እካ ኤንታዉ ኪተቴስ። ኤንቲ ቃሾ ኬꬃን ዳሮ ዎደ ኡትዶሶና።

5 ግብፀ ካዋ ኡሻ ካፖይነ ካꬃ ካፖይ፥ ቃሾ ኬꬃን ደእሸ ናምአይካ እስ ቃማ ዱማ ዱማ አሙሆ አሙህዶሶና። ሄ አሙሆታስ ዱማ ዱማ ብርሸꬃይ ደኤስ። 6 ዮሰፍ ዎንታ ኤንታኮ ገልያ ዎደ ኤንቲ አዛንድ ኡትዳሽን በእስ። 7 እ ኤንታና፥ “ሀች ህንተ ሶምኦይ አይስ ꬉምዴ?” ያግድ ኦይችስ።

8 ኤንቲ፥ “ኑ ናምአይካ አሙሆ አሙህዳ፥ ሽን ኑስ ብርሽያ አስ ꬋይስ” ያግዶሶና።

ዮሰፍ ኤንታኮ፥ “አሙሆ ብርሽያ ኤራተꬃይ ፆሳባ ግደነዬ? አነ ህንተ አሙሁዋ ታዉ ኦድተ” ያግስ።

9 ያትን ኡሻ ካፖይ ባ አሙሁዋ ዮሰፋስ ኦድስ፤ “ታኒ ታ አሙሆን እስ ዎይነ ታ ስንꬃን በአስ። 10 ሄ ዎይንያስ ሄꬑ ታሸት ደኦሶና። እ ሀይፅድ፥ ጪይ ስሚድ ቴርስ። 11 ካዎ ዋንጭ ታ ኩሸን ደኤስ። ታኒ ዎይነ ቴራ ኤካዳ እያን ጉምአዳ፥ ሄ ዋንጫ ካዋ ኩሸን ዎꬃስ” ያግስ።

12 ዮሰፍ፥ “ሀ አሙሁዋ ብርሸꬃይ ሀይሳ፤ ሄꬑ ታሸት ሄꬑ ጋላሳታ። 13 ሄꬑ ጋላሳታ ግዶን ካዎይ ነና ቃሾፐ ብላና። እ ነና ካሰ ሹማተꬃኮ ዛራና። ካሰ ኔኒ ኡሻ ካፖ ግዳዳ ኦይሳዳ ኔኒ ካዋ ዋንጫ እያ ኩሽያን ዎꬃና። 14 ሽን ነዉ ሳእ ሎእዳ ዎደ ታና ዶጎፓ፤ ታዉ ኬሀ። ታባ ካዋስ ኦዳዳ፥ ሀ ቃሾ ኬꬃፈ ታና ከስሳ። 15 ታና እብራወ ቢታፈ ዎልቃን ኤህዶሶና። ሀር አቶሽን፥ ሀይሳን ታና ቃሾስ ጋꬅያባ አይብባካ ኦꬃብከ” ያግስ።

16 ካꬃ ካፖይ ዮሰፍ አሙሁዋ ሎይꬅድ ብርሽዳይሳ በእዳ ዎደ ዮሰፋኮ፥ “ታኒ አሙህዳ አሙሆይ ሀይሳ፤ ታ ሁጰን ሄꬑ ጋባተ ኡይꬅ ደኤስ፤ 17 ቦላ ባጋ ጋባትያን ግብፀ ካዋስ ዱማ ዱማ ካꬃ ቆሞፈ ኡከትዳ ኡይꬃይ ደኤስ። ሽን ካፎት ሄ ታ ሁጰን ደእያ ጋባትያፐ ሞሶና” ያግስ።

18 ዮሰፍ፥ “ሄ አሙሁዋ ብርሸꬃይ ሀይሳ፤ ሄꬑ ጋባተት ሄꬑ ጋላሳታ። 19 ሄꬑ ጋላሳ ግዶን ካዎይ ነና ቃሾፐ ብላና። ነ ቆꬍያ ቃንፅስድ ምꬃን ካቅሳና፤ ነ አሹዋካ ካፎይ ማና” ያግስ።

20 ሄꬓንꬆ ጋላሳን ግብፀ ካዎይ ባ የለትዳ ጋላሳን ባ ሞርናታ ኡባስ ግብራ ጊግስስ። ኡሻ ካፑዋነ ካꬃ ካፑዋ ብል ኤህድ ባ አሳ ስንꬃን ኤስስ። 21 ኡሻ ካፑዋ እያ ሹማተꬃኮ ዛርን፥ እ ካዋ ኩሽያን ዋንጫ ዎꬅስ። 22 ሽን ካዎይ ካꬃ ካፑዋ ካቅስስ። ኡባይካ ዮሰፍ ኤንታ አሙሁዋ ብርሽዳይሳዳ ሀንስ። 23 ሽን ኡሻ ካፖይ ዮሰፋ ሀሳዮና ዶግ አግስ።