1 ናምኡ ላይꬃፈ ጉየ፥ ግብፀ ካዎይ አሙሆ አሙህስ። ሄ አሙሁዋን እ ናይለ ሻፋ ጋፃን ኤቅስ። 2 ላፑን ኦርደነ ሞꬎ ሚዛት ናይለ ሻፋፐ ከይድ፥ ማታ ምሽን በእስ። 3 ኤንታፈ ካልድ፥ ሀራ ላፑን ግልቃ ሚዛት ናይለ ሻፋፐ ከይድ፥ ሻፋ ጋፃን ደእያ ሀራ ሚዛታ ማታን ኤቅዶሶና። 4 ሄ ግልቃ ሚዛት ላፑን ኦርደነ ሞꬎ ሚዛታ ምትዶሶና። ሄሳፈ ጉየ፥ ካዎይ ባርክስ።

5 እ ዛር ꬍስክድ፥ ሀራ አሙሆካ አሙህስ። ላፑን ሎኦነ ሙሩታ ሞርኤት እስ ማቃ ቦላ ከይዶሶና። 6 ኤንታፈ ካልድ፥ ሌኦነ ዶሎሀ ባጋ ጫርኮን ሹልዳ ሀራ ላፑን ሞርኤት ከይዶሶና። 7 ሄ ሌእዳ ሞርኤት ሎኦነ ሙሩታ ሞርኤታ ምትዶሶና። ሄሳፈ ጉየ፥ ካዎይ ባርክድ አሙሆ ግደይሳ ኤርስ። 8 ሳአይ ዎንትን ꬍስኮፈ እ ደንድያ ዎደ እያ ዎዛናይ ያርክስ። ሄሳ ግሾ፥ ግብፀን ደእያ ብታንቾታነ ኤራንቾታ ኡባ ካዎይ ፄግስድ ኤንታዉ ባ አሙሁዋ ኦድስ። ሽን እያዉ ሄ አሙሁዋ ብርሽያ አስ ꬋይስ።

9 ኡሻ ካፖይ ሄ ዎደ ግብፀ ካዋኮ፥ “ታኒ ታ ናቁዋ ሀች ሀሳያይስ። 10 እስ ዎደ ካዎይ ባ አይለታ ሀንቀትድ፥ ታናነ ካꬃ ካፑዋ ቃሾ ኬꬃን የግስ። 11 ያን ደእሸ ኑ ናምአት አሙሆ አሙህዳ። ሄ አሙሆታስ ዱማ ዱማ ብርሸꬃይ ደኤስ። 12 ሄ ዎደ ናገይሳታ ካፑዋ አይለይ፥ እብራወ ፓንꬃይ፥ ኑራ ቃሾን ደኤስ። ኑኒ ኑ አሙሁዋ እያዉ ኦድን፥ እ ኑስ ሁጰን ሁጰን አሙሁዋ ብልስ። 13 ያንን፥ ሄ ሀኖት እ ኑስ ብልዳይሳዳ ሀንዶሶና። ሄስ አይበ ጊኮ፥ ታኒ ታ ሹማተꬃኮ ስማስ፥ ሀንኮይ ካቀትስ” ያግስ።

14 ያትን፥ ግብፀ ካዎይ ዮሰፋ ፄግስስ። ኤንቲ እያ ቃሾ ኬꬃፈ ኤለስድ ኤህዶሶና። እ ሜደትድ ባ ማኡዋ ላምድ፥ ካዋኮ ገልስ። 15 ካዎይ ዮሰፋ፥ “ታኒ አሙሆ አሙሀስ፥ ሽን ታዉ እስ አስካ ብላናዉ ዳንዳእቤና። ታኒ፥ ነ አሙሆ ብላናዉ ዳንዳኤይሳ ስአስ” ያግስ።

16 ዮሰፍ፥ “ታኒ ሄሳ ዳንዳእከ፥ ሽን ፆሳይ ካዋስ ሎኦነ ልከ ብርሸꬅ እማና” ያግስ።

17 ካዎይ፥ “ታኒ ታ አሙሆራ ናይለ ሻፋ ጋፃን ኤቅዳሽን፥ 18 ላፑን ኦርደነ ሞꬎ ሚዛት ናይለ ሻፋፐ ከይድ፥ ማታ ሞሶና። 19 ኤንታፈ ካልድ፥ ሀራ ላፑን ግልቃነ ላፍዳ ሚዛት ከይዶሶና። ታኒ ሄሳ መላ ግልቃ ሚዝ ግብፀ ቢታን ኡባካ በአ ኤርከ። 20 ሄ ግልቃነ ላፍዳ ሚዛት ኮይሮ ከይዳ ላፑን ሞꬎ ሚዛታ ምትዶሶና። 21 ሽን ኤንታ ምትዳፐ ጉየ ካሰይሳዳ ግልቅ ኡትዳ ግሾ፥ ኤንቲ ምትዳባ ኦንካ ኤራናዉ ዳንዳእቤና። ሄሳፈ ጉየ ታኒ ባርካስ።

22 “ታኒ ታ አሙሁዋን ቃስ ላፑን ሎኦነ ሙሩታ ሞርኤት እስ ማቃ ቦላ ከይዳይሳታ በአስ። 23 ኤንታፈ ካልድ፥ ሌኦነ ዶሎሀ ባጋ ጫርኩዋን ሹልዳ ሀራ ላፑን ሞርኤት ከይዶሶና። 24 ሄ ሌእዳ ሞርኤት ላፑን ሎኦ ሞርኤታ ምዶሶና። ታኒ ሀ አሙሁዋ ብታንቾታስ ኦዳስ፥ ሽን ታዉ አሙሁዋ ብርሽያ አስ በንትቤና” ያግስ።

25 ሄሳፈ ጉየ ዮሰፍ ግብፀ ካዋኮ፥ “ካዋ አሙሆታ ብርሸꬃይ እስኖ። ፆሳይ ባ ኦꬃና ሀንያባ ካዋስ ቆንጭስስ። 26 ሄ ላፑን ሎኦ ሚዛት ላፑን ላይꬃታ፥ ቃስ ላፑን ሎኦ ሞርኤት ላፑን ላይꬃታ፥ ሀ አሙሆታ ብርሸꬃይ እስኖ። 27 ሄ ላፑን ግልቃነ ላፍዳ ሚዛት ላፑን ላይꬃታ፥ ቃስ ዶሎሀ ባጋ ጫርኩዋን ሹልዳ፥ ሌኦ ላፑን ሞርኤት ላፑን ኮሻ ላይꬃታ።

28 “ታኒ ካዋስ ኦድዳይሳዳካ፥ ፆሳይ ባ ኦꬃና ሀንያባ ካዋ በስስ። 29 ላፑን ዳሮ ካሎ ላይꬃት ግብፀ ቢታ ኡባን ያና። 30 ሽን ሄሳፈ ጉየ፥ ላፑን ኮሻ ላይꬃት ካልድ ያና። ሄ ዎደ ግብፀ ካሎይ ኡባይ ዶገታና፥ ኮሽ ቢታ ጫጫና። 31 ኮሻይ ዳሮ ኢታ ግድያ ግሾ ሄ ቢታ ካሎይ ዶገትድ አታና። 32 ናምኡ ኦግያን ካዋስ ሄ አሙሆይ በንትዳይ ፆሳይ ባ ቆፕዳባ ኦꬃናዉ ቃንፅዳ ግሾሳ። ሄሳ ፆሳይ ማታ ዎደን ኦꬃና።

33 “ሀእ ህዛ፥ ኔኒ ኤራንቾነ ጭንጫ አስ ኮያዳ ግብፀ ቢታን ሹማ። 34 ላፑን ካሎ ላይꬃን ካፅያ ካꬃፈ እቻሹ ኩሽያፐ እሱዋ ሺሻና አሳታ ሹማ። 35 ኤንቲ ያ ካሎ ላይꬃን ካꬃ ሺሽድ፥ ባንታ አዋተꬃን ካታማን ካታማን ምንጅድ ዎꬃና መላ ኪታ። 36 ቢታይ ኮሻን ꬋዮና መላ ሀ ካꬃይ ግብፀ ቢታን ላፑን ላይꬃን ደንዳና ኮሻስ ምንጀትድ ደኦ” ያግስ።

37 ያትን ሄ ኦዳይ ግብፀ ካዋስነ እያ ሞርናታስ ሎኦ ግድድ በንትስ። 38 ሄሳ ግሾ፥ ካዎይ ኤንታኮ፥ “ዮሰፋፐ አꬍያ ሀራ ፆሳ አያናራ ደእያ አስ ደማናዉ ዳንዳኦኮ” ያግስ።

39 ሄሳፈ ጉየ፥ ካዎይ ዮሰፋ፥ “ፆሳይ ሀይሳ ኡባ ነና ኤርስዳ ግሾ፥ ነ መላ ኤራንቾይነ ጭንጫ አስ ኦንካ ባዋ። 40 ታኒ ነና ታ ቢታን ሹማስ። ታ አሳ ኡባይ ነዉ ኪተታና። ታፐ ሀር ኔፐ አꬍያ ኦንካ ባዋ። 41 ሄኮ፥ ታኒ ነና ግብፀ ቢታ ኡባ ቦላ ሹማስ” ያግስ። 42 ሄሳፈ ጉየ፥ ካዎይ ባ ፓራምያ ምግዱዋ ባ ብራꬍያፈ ከስድ፥ ዮሰፋ ብራን አꬅስ። ቦንቾ ማኦነ ቆ ዎርቃ እያ ማይዝስ። 43 ካዎይ ባ ናምአንꬆ ፓራ ጋርያ ዮሰፋ ቶግስስ። ቦንቾ ዎታዳረይ፥ “ዝግተ! ዝግተ!” ያግሸ እያፐ ስንꬃራ ሄመቴስ። ሄሳዳ ኦꬅድ፥ ካዎይ እያ ግብፀ ቢታ ኡባ ቦላ ሹምስ።

44 ሄሳፈ ጉየ፥ ካዎይ ዮሰፋ፥ “ታኒ ካዎ ግድኮካ ነ ኪቶና ኦንካ ግብፀ ቢታ ኡባን ባ ኩሽያ ዎይኮ ባ ቶሁዋ ቃፆፎ” ያግስ። 45 ካዎይ ዮሰፋ፥ “ፃፍናት-ፓእና” ግድ ሱንꬅስ። እ እያዉ ኦና ካታማ ካህንያ ጶፅፋራ ናእዉ አስናቶ ማቾ እሚስ። ያንን፥ ዮሰፍ ግብፀ ቢታ ኡባ ቦላ ማታ ኤክስ።

46 ዮሰፍ ግብፀ ካዋስ ኦሶ ኦይክያ ዎደ፥ እያዉ ላይꬅ ሀስታማ። ዮሰፍ ካዋ ስንꬃፈ ከይድ፥ ግብፀ ቢታ ኡባ ግዶን ሄመትስ። 47 ሄ ላፑን ካሎ ላይꬃን ቢታን ዳሮ ካꬅ ካፅስ። 48 ዮሰፍ ግብፀ ቢታን ሄ ላፑን ካሎ ላይꬃ ካꬃ ኡባ ሺሽድ፥ ካታማታን ምንጅስ። እስ እስ ካታማ ዩሹዋን ደእያ ጋድያፐ ካꬃ ኡባ ሄ ካታማታን ሺሽስ። 49 ዮሰፍ አባ ሻፍያ መላ ዳሮ ካꬃ ሺሽስ። ካꬃ ዳሮተꬃፈ ደንዶይሳን ማካናዉ ዳንዳኤትቦና ግሾ፥ ማክ ማክ ቆለይሳ አጋግስ።

50 ኮሻ ላይꬅ ያናፐ ስን፥ ኦና ካታማ ካህነ ጶፅፋራ ናኤ አስናትፐ ዮሰፍ ናምኡ አደ ናይታ የልስ። 51 ዮሰፍ ባ ባይራ ናኣ ሱንꬃ፥ “ፆሳይ ታና ታ መቱዋነ ታ አዋ ሶ አሳ ኡባ ዶግስስ” ግድ ምናሰ *ምናሰ፦ እብራወꬆ ዶናን ሀ ሱንꬃ ብርሸꬃይ “ዶግሴስ” ጉሱ። ግድ ሱንꬅስ። 52 ናምአንꬆ ናኣ ሱንꬃካ፥ “ፆሳይ ታ መቶትዳ ቢታን ታዉ ናአ እሚስ” ግድ ኤፍሬማ †ኤፍሬማ፦ እብራወꬆ ዶናን ሀ ሱንꬃ ብርሸꬃይ “ናአ እሜስ” ጉሱ። ግድ ሱንꬅስ።

53 ግብፀ ቢታን ደእያ ሄ ላፑን ካሎ ላይꬃት አꬍዶሶና። 54 ዮሰፍ ኦድዳይሳዳ ላፑን ኮሻ ላይꬃት ካል ይዶሶና። ሀራ ቢታ ኡባን ኮሽ ከይስ፥ ሽን ግብፀ ቢታ ኡባን ካꬃይ ደኤስ። 55 ግብፀ ቢታይ ኡባይ ኮሻትዳ ዎደ፥ አሳይ ካꬃስ ካዋኮ ዋስዶሶና። ካዎይ ግብፀ አሳ ኡባ፥ “ዮሰፋኮ ብድ፥ እ ኦደይሳ ኦꬅተ” ያግድ ኪትስ።

56 ኮሻይ ግብፀ ቢታ ኡባ ጋክዳ ዎደ፥ ዮሰፍ ካꬃ ምንጅዳ ሻለታ ኡባ ዶይድ፥ ካꬅ ግብፀ አሳስ ባይዝስ። 57 ቢታ ኡባን ኮሽ ሱልዳ ግሾ፥ ሳአን ደእያ አሳ ኡባይ ካꬅ ዮሰፋፐ ሻማናዉ ግብፀ ይዶሶና።