1 ያይቆብ ግብፀን ካꬅ ደኤይሳ ስእዳ ዎደ ባ አደ ናይታ፥ “ህንተ እሶይ እሱዋ አይስ ፄሌቲ? 2 ግብፀን ካꬅ ደኤይሳ ታኒ ስአስ፤ ያ ብድ፥ ኑኒ ሀይቆና መላ ጉꬃ ካꬅ ሻምተ” ያግስ። 3 ያትን፥ ዮሰፋ እሻት ታማት ካꬅ ሻማናዉ ግብፀ ብዶሶና። 4 ሽን ያይቆብ እ ቆሄታና ግድ ህርግዳ ግሾ ዮሰፋ እሻ ብንያመ እያ እሻታራ የድቤና። 5 ካናነ ቢታን ዎልቃማ ኮሽ ደእያ ግሾ፥ ካꬅ ሻማናዉ በይሳታራ እስራኤለ አደ ናይት ግብፀ ገልዶሶና።

6 ሄ ዎደ ዮሰፍ ሄ ቢታ አይስያ ግሾ ቢታን ደእያ አሳ ኡባስ ካꬅ ባይዜስ። ሄሳ ግሾ፥ ዮሰፋ እሻት ያ ጋክዳ ዎደ ባንታ ሶምኡዋ ሳአ ጋꬅድ እያዉ ዝግዶሶና። 7 ዮሰፍ ባ እሻታ በእዳ መላካ ኤር አግስ። ሽን እ ኤንታ ኤሮና አሳዳ ሀንድ፤ ኤንታኮ፥ “ህንተ አዉፐ ይደት?” ያግድ ኦይችስ።

ኤንቲ፥ “ካꬅ ሻማናዉ፥ ካናነ ቢታፈ ይዳ” ያግዶሶና።

8 ዮሰፍ ባ እሻታ ኤርስ፥ ሽን ኤንቲ እያ ኤርቦኮና። 9 ዮሰፍ ኤንታባ አሙህዳ ባ አሙሁዋ አኬክድ ኤንታኮ፥ “ህንተ ዎቻናዉ ይዳ አስ፥ ህንተ ኑ ቢታን ናጎይ ለፕያ ባጋይ አዉነኮ በአናዉ ይደታ” ያግስ።

10 ኤንቲ፥ “አካይ፥ ኑ ጎዳዉ፥ ኑኒ ዎቻናዉ ይዳ አስ ግዶኮ። ኑኒ ነ አይለት ካꬅ ሻማናዉ ይዳ። 11 ኑኒ ኡባይካ እስ አዋ ናይታ። ኑኒ ነ አይለት አማነትያ አስ” ያግዶሶና።

12 ዮሰፍ ኤንታኮ፥ “አካይ፥ ህንተ ኑ ቢታን ናጎይ ለፕያ ባጋይ አዉነኮ በአናዉ ይደታ” ያግስ።

13 ሽን ኤንቲ፥ “ኑኒ ነ አይለት ካናነ ቢታን ደእያ እስ ኡራ ናይታ፤ ኑኒ ታማነ ናምኡ እሻንታ። ዉርሰꬃ ካሎይ ሀእ ኑ አዋራ ሶን ደኤስ፥ እሶይ ሀይቅስ” ያግዶሶና።

14 ዮሰፍ ኤንታኮ፥ “ታኒ ህንተዉ ኦድዳይሳዳ ህንተ ቢታ ዎቸይሳታ። 15 ህንተ ፓጨታናይስ ሀይሳና፤ ቱማ ካዎይ ሀይቆ፥ ህንተ ዉርሰꬃ ካሎ እሻይ ሀይሳ ዮና እፅኮ፥ ህንተ ሀ በሳፈ ቤከታ። 16 ህንተ ኦደይስ ቱማ ግደይሳ ፓጫናዉ፥ ህንተፈ እሱዋ ኪትተ። እ ህንተ እሻ ኤክድ ዮ፥ አትዳይሳት ቃሾ ኬꬃን ጋምኤታ። ሄስ ሃኖና፥ ካዎይ ሀይቆ፥ ህንተ ቢታ ዎቸይሳታ” ያግስ። 17 ኤንታና ሄꬑ ጋላስ ቃሾ ኬꬃን ቃችስ።

18 ሄꬓንꬆ ጋላሳን ዮሰፍ ኤንታኮ፥ “ታኒ ፆሰ ያይያ አስ። ያንያ ግሾ፥ ህንተ እስባ ኦꬅኮ ህንተ ሸምፑዋ አሻና። 19 ህንተ ቱማካ አማነትያ አሰ ግድኮ፥ ህንተ እሻታፐ እሶይ ሀይሳን ቃሾ ኬꬃን ደኦ፤ አትዳይሳት ኮሻትያ ህንተ ሶ አሳስ ካꬅ ኤፍተ፤ 20 ሽን ህንተ ዉርሰꬃ እሻ ታኮ ኤህኮ፥ ህንተ ቃላይ ቱማታና፤ ህንተካ ሀይቆና አታና” ያግስ።

ኤንትካ እያ ኦዳ ኤሮ ግድ ኤክዶሶና።

21 ኤንቲ እሶይ እሱዋኮ፥ “ቱማ ኑኒ ኑ እሻስ ኦꬅዳባይ ኑና ካኤስ። እ ባ ሸምፑዋስ ዋትዋትድ ዎስያ ዎደ ኑኒ ስእሸ እፅዳ። ሄሳ ግሾ፥ ሀ ዋየይ ኑና ጋክስ” ያግዶሶና።

22 ሮቤል፥ “ታኒ ህንተና፥ ናኣ ቦላ ናጋራ ኦꬆፍተ ጋዳ ኦዳስ፥ ሽን ህንተ ስኦና እፅደታ። ሀእ እያ ሱꬃይ ኑና አቼስ” ያግስ። 23 ዮሰፍ ኤንታራ ቱርጁማነን ኦደትያ ግሾ ኤንቲ ግያባ እ ኤረይሳ ኤንቲ አኬክቦኮና፤ 24 እ ኤንታፈ ሀራሶ ብድ ዬክስ። ሽን ዛር ኤንታኮ ይድ፥ ኤንታዉ ጉጅድካ ኦድስ። እ ስሞና ኤንታ ግዶፈ ከስድ ኤንቲ በእሽን ቃችስ።

25 ዮሰፍ ባ አይለታ፥ “ካꬃ ኤንታ ኦጎሩዋን ኩንꬅተ፤ ኤንታ ሚሽያካ ዛሪድ፥ ኤንታ ኦጎሩዋን ኦጎሩዋን የግተ። ኤንታዉ ኦገስ ሽንቀካ እምተ” ያግድ ኪትስ። 26 ኤንቲ እ ግዳይሳዳ ኦꬅዳፐ ጉየ፥ ዮሰፋ እሻት ካꬃ ባንታ ሀረታ ቦላ ጫንድ ብዶሶና።

27 ኤንቲ ቃማ አቅያ በሳን ኤንታፈ እሶይ ባ ሀርያስ ካꬃፈ የጋናዉ ባ ኦጎሩዋ ብልድ፥ ሄ ኦጎሩዋ ዶናን ደእያ ባ ሚሽያ ደምስ። 28 እ ባ እሻታኮ፥ “ታ ሚሸይ ታዉ ስምስ፤ ቱማ ሀይሳ በእተ፤ ታ ኦጎሩዋን ደኤስ” ያግስ።

ኤንቲ ዳጋምድ ኮኮርሸ፥ እሶይ እሱዋኮ ስሚድ፥ “ፆሳይ ኑ ቦላ ኦꬅዳባይ ሀይስ አይቤ?” ያግዶሶና።

29 ኤንቲ ካናነ ቢታን ደእያ ባንታ አዋ ያይቆባኮ ይድ፥ ባንታና ጋክዳባ ኡባ እያዉ ኦድዶሶና። 30 ኤንቲ እያኮ፥ “ሄ ቢታ ሃርያ ኡራይ፥ ኑና ሄ ቢታ ዎችያ አሳዳ ኦꬅድ ኑ ቦላ ይሎትድ ኦደትስ። 31 ሽን ኑኒ እያኮ፥ ‘ኑኒ አማነትያ አስ፥ ቢታ ዎቸይሳታ ግዶኮ። 32 ኑኒ ታማነ ናምኡ እሻንት እስ አዋ ናይታ። እሶይ ሀይቅስ፤ ዉርሰꬃ ካሎይ ካናነ ቢታን ሀእ ኑ አዋራ ደኤስ’ ያግዳ። 33 ያትን ሄ ቢታ ሃርያ ኡራይ ኑና፥ ‘ህንተ አማነትያ አሰ ግደይሳ ታኒ ኤራና መላ ህንተ እሻታፐ እሱዋ ሀይሳን ታ ማታን አግድ፥ ኮሻትያ ህንተ ሶ አሳስ ካꬅ ኤክድ ቢተ። 34 ህንተ ቢታ ዎቸይሳታ ግዶና፥ አማነትያ አስ ግደይሳ ታኒ ኤራና መላ፥ ህንተ ዉርሰꬃ እሻ ታኮ ኤክድ ዪተ። ያትኮ፥ ታኒ ሀን አትዳ ህንተ እሻ ህንተዉ ዛራዳ እማና። ህንተካ ሀ ቢታን ደእድ ዛልአናዉ ዳንዳኤታ’ ” ያግዶሶና።

35 ኤንቲ ባንታ ኦጎሩዋፐ ካꬃ ቆልሸ፥ ባንታ ኦጎሩዋን ኦጎሩዋን ባንታ ሚሽያ ቃሹዋራ ኡትዳይሳ ደምዶሶና። ኤንትነ ኤንታ አዋይ ሄ ቃሹዋራ ደእያ ሚሽያ በእድ ያይዶሶና። 36 ኤንታ አዋ ያይቆብ ኤንታኮ፥ “ህንተ ታና ታ ናይታፐ መላ አሽደታ። ዮሰፍ ባዋ፥ ስሞን ባዋ፥ ሀእ ቃስ ብንያመ ኤፋናዉ ኮዬታ። ኡባባይ ታዉ ዞኮ ዛርስ” ያግስ።

37 ሄሳፈ ጉየ፥ ሮቤል ባ አዋኮ፥ “ታኒ ብንያመ ነዉ ዛራዳ ኤሆና እፅኮ፥ ታ አደ ናይታ ናምኣካ ዎꬋ። ታና አማነታዳ እያ ታ ኩሸን የጋ፤ ታኒ እያ ዛራዳ ኤሀና” ያግስ።

38 ሽን ያይቆብ ኤንታኮ፥ “ታ ናአይ ህንተራ ቤና፤ እያ እሻይ ሀይቅን፥ አትዳይ እያ ፃላላ። ህንተ ኤፍሽን፥ ኦገን ኢታባይ እያ ጋክኮ፥ ህንተ ታ ጭማተꬃ አፉꬁ ሙዝሸ ታ ሀይቁዋ ማታየታ” ያግስ።