1 ካናነ ቢታን ኮሻይ ሀእካ ካሰይሳፈ አꬍድ ዎልቃምስ። 2 ያንን፥ ኤንቲ ግብፀፈ ኤህዳ ካꬃ ኡባ ምድ ኦንግን፥ ኤንታ አዋይ፥ “ቃስካ ግብፀ ብድ ኑስ ጉꬃ ካꬅ ሻምተ” ያግስ።

3 ሽን ይሁድ፥ “ሄ ኡራይ ኑና፥ ‘ህንተ እሻይ ህንተራ ዮና እፅኮ፥ ታ ሶምኡዋ ዛር በኤከታ’ ያግድ ምንꬅድ ኦድስ። 4 ኔኒ ኑ እሻ ኑራ የድኮ፥ ኑኒ ግብፀ ብድ ነዉ ካꬅ ሻማና። 5 ሽን ሄ ኡራይ፥ ‘ህንተ እሻይ ህንተራ ዮና እፅኮ ህንተ ታ ሶምኡዋ ዛር በኤከታ’ ” ያግዳ ግሾ፥ ኔኒ እያ የዶናባ ግድኮ ኑኒ ቦኮ።

6 ያትን እስራኤለይ፥ “ህንተ፥ ‘ኑስ ሀራ እሽ ደኤስ’ ግድ ኦድድ ሀ መቱዋ ታ ቦላ አይስ ኤህደቲ?” ያግስ።

7 ኤንቲ ዛሪድ፥ “ሄ ኡራይ ኑባነ ኑ ሶ አሳባ ምንꬅድ ኦይችስ። እ ኑኮ፥ ‘ህንተ አዋይ ፓፃ ደኢ? ህንተዉ ሀራ እሽ ደኢ?’ ያግድ ኦይችስ። ኑኒ እ ኦይችዳይሳ እያዉ ዛርዳ። እ ኑና፥ ‘ህንተ እሻ ኤክ ዪተ’ ጋናባ ኑ አዉደ ኤርዶ?” ያግዶሶና።

8 ይሁድ ባ አዋ እስራኤለኮ፥ “ኑኒ፥ ኔንነ ኑ ናይት ኮሻን ሀይቃናፐ ናኣ ታራ የዳ፥ ኑኒ ባና። 9 ናአ ታ ዋሰተꬃን እማ፤ እያባ ታና ኦይቻ። ታኒ እያ ነዉ ሳሮ ዛራዳ ኤሆና እፅኮ፥ ታ ደኦ ኡባን ነ ባደꬃይ ታና ጋኮ። 10 ኑ ጋምኦናባ ግድያኮ፥ ሀኖደ ናምአንꬆ ያ ስማና ሽን” ያግስ።

11 ኤንታ አዋይ እስራኤለይ፥ “ሄሳ ግድኮ ሃረይሳስ ኩሸ ገንꬅያባ፥ ሀ ቢታን ካፅያባ ኡባፈ ሎኦባ ዶርተ። ሄስካ፥ ቅባተ፥ ሽቶ፥ ዱማ ዱማ ሳዎ፥ ኤስነ፥ ኦቾሎነ ህንተ ኦጎሩዋን የግድ፥ ኤክድ ቢተ። 12 ህንተ ኦጎሩዋ ዶናን ስምዳ ሚሸይ ባለትዳባ ግዳናዉ ዳንዳእያ ግሾ፥ ሚሽያ ናምኡ ኩሸ ኦꬅድ ኤክ ቢተ። 13 ህንተ እሻ ኤክድ፥ ሄ ኡራኮ ኤለስድ ጉየ ቢተ። 14 እ ሀንኮ ህንተ እሻነ ብንያመ ህንተራ የዳና መላ ኡባ ዳንዳእያ ፆሳይ ሄ ኡራይ ህንተዉ ቃታናዳ ኦꬆ። ታና ግድኮ፥ ታ ናይታፐ መላ አትኮካ አታስ” ያግስ።

15 ሄሳ ግሾ፥ እሻንት ዎላ ባንታ እምያባታ፥ ናምኡ ኩሸ ሚሽያነ ብንያመ ባንታራ ኤክድ ብዶሶና። ኤንቲ ግብፀ ጋክድ፥ ዮሰፋ ስን ሺቅዶሶና። 16 ዮሰፍ ብንያመ ኤንታራ በእዳ ዎደ ባ ኬꬃ ካፑዋኮ፥ “ሀ አሳታ ታ ሶ ኤካዳ ባ። እስ መሄ ሹካዳ ጊግሳ፤ ኤንቲ ካꬅ ታራ ማና” ያግድ ኪትስ።

17 ያትን ካፖይ፥ ዮሰፍ ኪትዳይሳዳ ሄ አሳታ እያ ሶ ኤፍስ። 18 ኤንቲ ዮሰፋ ሶ ብሸ፥ ያይድ፥ “ኤንቲ ኑና ሀይሳ ኤህዳይ ኮይሮ ኑ ኦጎሩዋን ስምዳ ሚሽያ ግሾ ግዶና አገና። ኤንቲ ኑና ቆህድ አይለተꬃን ሃሮናነ ኑ ሀረታ ኤኮና አጎኮና” ያግ ህርግዶሶና።

19 ሄሳ ግሾ፥ ኤንቲ ዮሰፋ ሶ ፐንገ ጋክድ፥ ኬꬃ ካፑዋ ኦድስዶሶና። 20 “ጎዳዉ፥ ኑኒ ኮይሮ ካꬅ ሻማናዉ ሀይሳ ይዳ። 21 ጉየ ስምሸ ኑኒ ቃማ አቅያ በሳን ኦጎሩዋ ብልያ ዎደ ሁጰን ሁጰን ኑ ሚሸይ ፓጮና ኑ ኦጎሩዋን ደኤይሳ ደምዳ። ሄኮ፥ ኑኒ ሄ ሚሽያ ጉየ ኤክ ይዳ። 22 ሀእ ኑኒ ካꬃ ሻማናዉ ሀራ ሚሸ ኦይክ ይዳ። ኑ ሚሽያ ኑ ኦጎሩዋን ኦን የግዳኮ ኤሮኮ” ያግዶሶና።

23 እ ዛሪድ፥ “አይኮይ ባዋ፥ ያዮፍተ፤ ህንተ ፆሳይ፥ ህንተ አዋ ፆሳይ፥ ህንተ ኦጎሩዋን ህንተዉ ሚሸ እሚስ። ታኒ ህንተ ጭግዳ ሚሽያ ኩመꬅ ኤካስ” ያግስ። ሄሳፈ ጉየ፥ ስሞና ኤንታኮ ከስስ።

24 ሄ ኡራይ ሄ አሳታ ዮሰፋ ሶ ኤፍድ፥ ኤንታ ቶሁዋስ ሃ ኤህን፥ ኤንቲ ሜጨትዶሶና። ኤንታ ሀረታስካ ምያባ የግስ። 25 ኤንቲ ዮሰፋራ ካ ማናይሳ ስእዳ ግሾ ባንታ እማናባታ ዮሰፋስ ጊግስዶሶና።

26 ዮሰፍ ባ ሶ ገልዳ ዎደ ኤንቲ ኤህዳ ባንታ እምያባታ እያዉ እምድ፥ እያ ስንꬃን ሳአ ጋክድ ዝግዶሶና። 27 እ ኤንታ ሳሮተꬃ ኦይች ስሚድ፥ “ህንተ ታዉ ኦድዳ ህንተ ጭምዳ አዋይ ሎኦ ደኢ? ሀእካ እ ፓፃ ደኢ?” ያግስ።

28 ኤንቲ፥ “ኤ፥ ነ አይለይ፥ ኑ አዋይ ፓፃ ደኤስ፤ እ ሎኦ” ያግድ፥ ሆክድ እያዉ ዝግዶሶና።

29 እ ባ አየ ናኣ ብንያመ በእዳ ዎደ ኤንታኮ፥ “ህንተ ኦድዳ ዉርሰꬃ ህንተ እሻይ ሀይሴ?” ያግስ። ብንያመ፥ “ታ ናአዉ፥ ነና ፆሳይ አንጆ” ያግስ። 30 ዮሰፍ፥ እያ እሻባይ እያዉ ጎምፓን ሴልዳ ግሾ፥ ኤለስድ፥ ቆልአ ገልድ ያን ዬክስ።

31 እ ባ ሶምኡዋ ሜጨትዳፐ ጉየ ከይድ ባና ምንꬅድ፥ ካꬅ አꬃና መላ ኪትስ።

32 ኤንቲ ዮሰፋስ ዱማ፥ እያ እሻታስ ዱማ አꬅዶሶና። ግብፀ አሳይ እብራወ አሳታራ እስፈ መይስ ባንታና ካዉሽያባ ኦꬅ ፄልያ ግሾ እያራ ምያ ግብፀ አሳታስ ዱማ አꬅዶሶና። 33 ኤንቲ ዮሰፋ ስንꬃን ባይራይ ባ ባይራተꬃን፥ ካሎይ ባ ካሎተꬃን ማራን ኡትዶሶና። ኤንቲ እሶይ እሱዋ ፄልድ፥ ኤንታ ዋትድ ኡትስዳኮ በእድ ማላለትዶሶና። 34 ዮሰፋ ጋይታፐ ኤንታዉ ቁም ግሸቴስ፥ ሽን ብንያመስ ሀራታፐ አꬅድ እቻሹ ኩሸ እሚስ። ያንድ፥ ኤንቲ ዮሰፋራ ምድ ኡይድ ኡፋይትዶሶና።