1 ዮሰፍ ባ ኬꬃ ካፑዋ፥ “ኔኒ ሀ አሳት ቶካናዉ ደንዳእዳ ኬና ኤንታ ኦጎሩዋን ካꬅ ኩንꬃ። ኤንታ ኡባ ሚሽያ ኤንታ ኦጎሩዋ ዶናን ዶናን የጋ። 2 ያታዳ ዉርሰꬃ ካሉዋ ኦጎሩዋ ዶናን ታ ብራ ዋንጫነ እ ሻማናዉ ኤህዳ ሚሽያ የጋ” ያግድ ኪትስ። እ ዮሰፍ ግዳይሳዳ ኦꬅስ።

3 ሳእ ዎንትን ሄ አሳት ባንታ ሀረታ ኤክድ ባናዉ ደንድዶሶና። 4 ኤንቲ ሄ ካታማፐ ከይድ ሃክ ቦና ደእሽን፥ ዮሰፍ ባ ኬꬃ ካፑዋኮ፥ “ሀ አሳታ ጌዶ ካላ። ኔኒ ኤንታ ጋክዳ ዎደ ኤንታኮ፥ ‘ህንተ አይስ ኬሀ ኢታን ዛርደቲ? 5 ሀይስ ታ ጎዳይ ኡየይሳነ ፁራባ ደምያ ዋንጫ ግደይሳ ኤረከቲ? አይስ ካይሶትደቲ? ሀይስ ህንተ ኦꬅዳባይ ዳሮ ኢታባ’ ያጋ” ያግስ።

6 ያትን እ ኤንታ ጌዶ ካል ጋክድ፥ ሄ ግዳይሳዳካ ኤንታዉ ኦድስ። 7 ሽን ኤንቲ፥ “ጎዳዉ ሀይሳ መላባ አይስ ኦደታይ? ሄሳ መላባ ኦሶይ ኑፐ ነ አይለታፐ ሃኮ። 8 ኑኒ ሀር አቶሽን፥ ኑ ኦጎሩዋ ዶናፐ ደምዳ ሚሽያ ካናነ ቢታፈ ጉየ ዛሪድ ነዉ ኤህዳይሳ ኤራሳ። ነ ጎዳ ኬꬃፈ ኑኒ ዎርቃ ዎይኮ ብራ ዋት ካይሶታኔ? 9 ነ አይለታ ግዶን ሄ ዋንጫይ በንትዳ ኡራይ ሀይቆ። ቃስ አትዳ ኑካ ኑ ጎዳስ አይለ ግዳና” ያግዶሶና።

10 እ ኤንታኮ፥ “ሄሳ ግድኮ ሎኦ፥ ህንተ ግዳይሳዳ ሀኖ። ዋንጫ ኤክዳ ኦንካ ታ አይለ ግዳና፤ አትዳይሳት ሳሮን ቤታ” ያግስ።

11 ሄሳፈ ጉየ፥ ኤንቲ ኤለስድ ባንታ ኦጎሩዋ ኦጎሩዋ ሳአን ዎꬅድ ብልዶሶና። 12 ሄ ካፖይ ኡባፈ ባይራ ኦጎሩዋፐ ዶምድ ዉርሰꬃ ካሉዋይሳ ጋካናስ ኮይድ፥ ሄ ዋንጫ ብንያመ ኦጎሩዋፐ ደምስ። 13 ሄሳን ኤንቲ አዛንድ፥ ባንታ ማኡዋ ፔꬍዶሶና። ባንታ ኦጎሩዋ ሀረታ ቦላ ጫንድ፥ ጉየ ካታማ ስምዶሶና።

14 ይሁድ ባ እሻታራ ዮሰፋኮ ገልያ ዎደ ዮሰፍ ሶን ደኤስ፤ ኤንቲ እያ ስንꬃን ሳአን ጉፋንዶሶና። 15 ዮሰፍ ኤንታኮ፥ “ህንተ አይብ ፓላባ ኦꬅደቲ? ታ መላ አስ ፁራባ ደማናዉ ዳንዳኤይሳ ህንተ ኤረከትዬ?” ያግስ።

16 ይሁድ፥ “ታ ጎዳስ ኑኒ አይ ጋኔ? ኑኒ አይ ኦደትያባይ ደኢ? ኑ ፅሎተꬃ ኑኒ ዋት በሳኔ? ፆሳይ ነ አይለታ ናቁዋ ቆንጭስስ። ህዛ ኑኒካ ሄ ዋንጫይ በንትዳ ኡራይካ ታ ጎዳስ አይለ ግድዳ” ያግስ።

17 ሽን ዮሰፍ፥ “ሄሳ መላባ ኦꬃናይስ ታፐ ሃኮ፤ ታ ዋንጫይ እያፐ በንትዳ ኡራ ፃላል ታ አይለ ግዳና። ሀንኮ ህንተ ህንተ አዋኮ ጉየ ሳሮ ስምተ” ያግስ።

18 ይሁድ እያኮ ሺቅድ “ታ ጎዳዉ፥ ኔኒ ካዋ መላ ግድኮካ ታኒ ኔራ ኦደታናዉ ነና ዎሳይስ። ታና ነ አይልያ ሀንቀቶፋ። 19 ኔኒ ታ ጎዳይ ኑና ነ አይለታ፥ ‘ህንተዉ አው ዎይኮ እሽ ደኢ?’ ጋዳ ኦይቻዳሳ። 20 ኑኒካ፥ ‘ኑስ ጭምዳ አዋይ ደኤስ። እ ጭማተꬃን የልዳ ካሎ ናአይካ ደኤስ። ሄ ናኣ እሻይ ሀይቅስ፥ ባ አየን እስኖ፥ እያ አዋይ እያ ዳሮ ዶሴስ’ ያግዳ።

21 “ኔኒ ኑኮ፥ ‘ታኒ እያ በአና መላ ታዉ ኤህተ’ ያጋዳሳ። 22 ያትን ኑኒ፥ ‘ሄ ናአይ ባ አዋፐ ሻከታናዉ ዳንዳኤና፤ ሻከትኮ እያ አዋይ ሀይቃና’ ያግዳ። 23 ሽን ኔኒ፥ ‘ህንተ ካሎ እሻይ ህንተራ ዮና እፅኮ፥ ታ አይፍያ ዛር በኤከታ’ ያጋዳሳ። 24 ኑኒ ኑ አዋኮ ስሚድ ብዳ ዎደ ነ ግዳይሳ እያዉ ኦድዳ።

25 “ኑ አዋይ፥ ‘ጉየ ብድ ጉꬃ ካꬅ ሻምተ’ ያግን፥ 26 ኑኒ እያኮ፥ ‘ኑ ካሎ እሻይ ኑራ ቦና እፅኮ፥ ኡራ አይፍያ በአናዉ ዳንዳኦኮ። ኑ ካሎ እሻይ ኑራ ብያባ ግድኮ፥ ኑኒ ያ ባና’ ያግዳ።

27 “ያትን ኑ አዋይ ኑና፥ ‘ታ ማችያ ራሄላ ታዉ ናምኡ አደ ናይታ የልዳይሳ ህንተ ኤሬታ። 28 ኤንታፈ እሶይ ታፐ ሻከትድ ብን፥ እያ ዶእ ሞና አገና ያጋስ። ሀች ጋካናዉ ታኒ እያ በአብከ። 29 ሀይሳ ቃስ ታፐ ህንተ ሻክ ኤፍን፥ ኢታባይ እያ ጋክኮ፥ ህንተ ታና ታ ጭማተꬃን አፉꬁ ሙዝሸ ታ ሀይቁዋ ማታየታ’ ” ያግስ።

30-31 “ሄሳ ግሾ፥ ሀእ ታኒ ጉየ ታ አዋኮ ብያ ዎደ ብንያመይ ታራ ባናዉ በሴስ። ታ አዋይ ናኣ ሸምፖፈ ዶስያ ግሾ፥ ናአይ ኑራ ባይናይሳ በእኮ ሀይቃና። ኑኒ ነ አይለት ኑ አዋ ጭማተꬃ አፉꬃን ዱፎ ገልሶስ። 32 ታኒ ነ አይለይ ናኣ ታ ዋሰተꬃን ኤካስ። ቃስ፥ ‘ታ አዋዉ፥ ታኒ እያ ነዉ ሳሮ ዛራዳ ኤሆና እፅኮ ታ ደኡዋ ኡባን ነ ባደꬃይ ታና ጋኮ’ ያጋስ።

33 “ያንያ ግሾ፥ ታኒ ነ አይለይ ናኣ ግሾ አይለታዳ ሀይሳን አታና ናአይ ባ እሻታራ ጉየ ስሞ። 34 ናአይ ባይና ታኒ ዋናዳ ጉየ ታ አዋኮ ስማኔ? ታና ታ አዋይ ሴለታና ሴላ በሶፎ” ያግስ።