1 እስራኤለይ ባዉ ደእያባ ኡባ ኤክድ፥ በርሳበ ጋክዳ ዎደ ባ አዋ ይሳቃ ፆሳስ ያርሾ ያርሽስ። 2 ፆሳይ ቃማ እስራኤለስ ቆንጭድ፥ “ያይቆባ፥ ያይቆባ” ያግስ።

እካ፥ “ሄኮ፥ አበ ጎዳዉ” ግድ ኮይስ።

3 ፆሳይ እያኮ፥ “ታኒ ፆሳ፥ ነ አዋ ፆሳ፤ ኔኒ ግብፀ ባናዉ ባቦፋ። ታ ነ ሼሻ ያን ግታ ደረ ከሳና። 4 ታኒ ኔራ እስፈ ግብፀ ባና፤ ታኒ ነ ሼሻ ያፐ ከሳዳ ሃ ኤሀና። ነ ሀይቅያ ዎደ ዮሰፍ ነ አይፍያ ኦይካና” ያግስ።

5 ሄሳፈ ጉየ፥ ያይቆብ በርሳበፐ ደንድስ። እስራኤለ አደ ናይት ባንታ አዋ ያይቆባ፥ ባንታ ናይታነ ባንታ ማቸታ ግብፀ ካዎይ ኤንታዉ የድዳ ግታ ፓራ ጋረ ቦላ ኡትስድ ኤፍዶሶና። 6 ኤንቲ ካናነ ቢታን ሃርዳ ሃሩዋነ መሄ ኡባ ኤክ ብዶሶና። ያይቆብ ባ ሶ አሳ ኡባ ኤክድ ግብፀ ብስ። 7 እ ባ ሶ አሳ ኡባ፤ አደ ናይታነ ባ አደ ናይታ ናይታ፥ ባ ማጫ ናይታነ ባ ማጫ ናይታ ናይታ፥ ኡባ ባራ ኤክድ ግብፀ ብስ።

8 እስራኤለራ ግብፀ ቢታ ብዳ እያ ናይታ ሱንꬃይ ሀይሳፈ ካልድ ፃፈትዳይሳ።

ያይቆባ ባይራ ናአይ ሮቤላ፤ 9 ሮቤላ አደ ናይት ሀኖካ፥ ፓላ፥ ሄስሮናነ ካርማ። 10 ስሞና አደ ናይት ያሙኤላ፥ ያምና፥ ኦሀዳ፥ ያክና፥ ፆሃራነ ካናነ ማጫሴፐ የልዳ ሳኡላ። 11 ሌወ አደ ናይት ገድሶና፥ ቃሀታነ መራራ። 12 ይሁዳ አደ ናይት ኤራ፥ ኦናና፥ ሴላ፥ ፓረሳነ ዛራ። ሽን ኤርነ ኦናን ካናነ ቢታን ሀይቅዶሶና። ፓረሳ አደ ናይት ሄስሮናነ ሀሙላ። 13 ይሳኮራ አደ ናይት ቶላ፥ ፑአ፥ ዮባነ ሽምሮና። 14 ዛብሎና አደ ናይት ሳረዳ፥ ኤሎናነ ያህላላ። 15 ሀ አደ ናይትነ ማጫ ናእያ ዲና፥ ልያ ማሰጰፆመ ቢታን ያይቆባስ የልዳይሳታ። ዲና ጉጅን እያ ናይትነ ናይታ ናይት ኩመꬅ ሀስታማነ ሄꬓ።

16 ጋደ አደ ናይት ፃፎና፥ ሀገ፥ ሹና፥ ኤፅቦና፥ ኤር፥ አሮዳነ አርኤላ። 17 አሴራ አደ ናይት ይምና፥ የሱዋ፥ ይስዋነ በርአ። ኤንታ ምችያ ሳራሆ። በርአ አደ ናይት ሄቤራነ ማልክኤላ። 18 ሀይሳቲ ላቢ ባ ናኤ ልያስ እምዳ ዛላፋ ያይቆባስ የልዳ ናይታ። ኤንቲ ኩመꬅ ታማነ ኡሱፑና።

19 ያይቆባ ማቸ ራሄል አደ ናይት ዮሰፋነ ብንያመ። 20 ኦና ካታማ ካህነ ጶፅፋራ ናእያ አስናታ ዮሰፋስ ግብፀን ምናሰነ ኤፍሬማ የላሱ። 21 ብንያመ ናይት ቤላ፥ በከራ፥ አስቤላ፥ ጌራ፥ ናማነ፥ ኤሀ፥ ኦሮሻ፥ ሙፍማ፥ ሁፍማነ አራዳ። 22 ሀይሳቲ ያይቆባስ የለትዳ ራሄል አደ ናይታ። ኤንቲ ኩመꬅ ታማነ ኦይዳ።

23 ዳነ አደ ናአይ ሁሽማ። 24 ንፍታለመ አደ ናይት ያህፄላ፥ ጉና፥ የፀራነ ሽለመ። 25 ሀይሳቲ ላፑናት ላቢ ባ ናኤ ራሄልስ እምዳ ባል ያይቆባስ የልዳ ናይታነ ናይታ ናይታ።

26 ያይቆባራ ግብፀ ብዳ፥ እያ ጉልባታፐ ከይዳ ናይት፥ እያ ናይታ ማቸታ ጉጆና ኡሱፑን ታማነ ኡሱፑና። 27 ግብፀን ዮሰፋስ የለትዳ ናምኡ ናይታ ጉጅኮ፥ ግብፀ ብዳ ያይቆባ ሶ አሳይ ኩመꬅ ላፑን ታማ።

28 ጌሳመ ቢታን ባንታና ሞካና መላ ያይቆብ ይሁዳ ባፐ ስን ዮሰፋኮ ኪትስ። ኤንቲ ያ ጋክያ ዎደ፥ 29 ዮሰፍ ባ ፓራ ጋርያ ጊግስድ፥ ባ አዋ እስራኤለራ ጋሄታናዉ ጌሳመ ብስ። ዮሰፍ ባ አዋ ደምዳ መላ እያ ቆꬍያን ፃፀትድ ዳሮ ዎደ ዬክስ።

30 እስራኤለይ ዮሰፋኮ፥ “ኔኒ ፓፃ ደእሽን፥ ታኒ ነ አይፍያ በእዳ ግሾ፥ ህዛ ታኒ ሀይቅኮካ አይኮይ ባዋ” ያግስ።

31 ሄሳፈ ጉየ፥ ዮሰፍ ባ እሻታነ ባ አዋ ሶ አሳታኮ፥ “ታኒ ግብፀ ካዋኮ ባዳ እያኮ፥ ‘ካናነ ቢታን ደእያ ታ እሻትነ ታ አዋ ሶ አሳይ ታኮ ይዶሶና። 32 ኤንቲ መሄ ሃረይሳታ፥ ኤንቲ ባንታራ ባንታ ዶርሳ፥ ባንታ ዴሻ፥ መህያነ ባንታዉ ደእያባ ኡባ ኤክድ ይዶሶና’ ያጋና። 33 ካዎይ ህንተና ፄግስድ፥ ‘ህንተ ኦሶይ አይቤ?’ ግድ ኦይችኮ፥ 34 ህንተ እያኮ፥ ‘ኑኒ ነ አይለት ናአተꬃፈ ዶምድ ኑ አዋታዳ መሄ ሄሞስ’ ያግተ። ዶርሰ ሃርያ አስ ግብፀ አሳን ካትዳባ ግድያ ግሾ፥ እ ህንተ ጌሳመ ቢታን ዳና መላ ኦꬃና” ያግስ።