1-2 ዮሰፍ ባ እሻታፐ እቻሻታ ዶርድ ግብፀ ካዋኮ ገልድ ሀይሳዳ ያግስ፤ “ታ አዋይነ ታ እሻት፥ ባንታ ዶርሳ፥ ባንታ ዴሻ፥ ባንታ መህያነ ባንታዉ ደእያባ ኡባ ኤክድ ካናነ ቢታፈ ይድ፥ ሀእ ጌሳመን ደኦሶና” ያግስ።

3 ካዎይ ሄ እሻታኮ፥ “ህንተ ኦሶይ አይቤ?” ያግድ ኦይችስ።

ኤንቲ ካዋኮ፥ “ኑኒ ነ አይለት ኑ አዋታዳ ዶርሰ ሃርያ አሳታ” ያግድ ዛርዶሶና። 4 ቃስካ ኤንቲ እያኮ፥ “ካናነ ቢታን ኮሽ ከይዳ ግሾነ ኑ መህያስ ምያባይ ꬋይዳ ግሾ፥ ኑኒ ሀይሳን ዳናዉ ይዳ። ሀያና ኑና ነ አይለታ ጌሳመ ቢታን ደኦ ጋርክ” ያግዶሶና።

5 ካዎይ ዮሰፋኮ፥ “ነ አዋይነ ነ እሻት ኔኮ ይዶሶና። 6 ህዛ ግብፀ ቢታይ ነ ኩሸና። ሀ ቢታን ኡባፈ አꬍድ ሎእያ በሳን ነ አዋነ ነ እሻታ ዎꬃ፤ ኤንቲ ጌሳመ ቢታን ደኦና። ኤንታ ግዶፈ ዱማ ቃራተꬅ ደኤይሳት ደእኮ፥ ሄሳታ ታ መህያ ቦላ ሹማ” ያግስ።

7 ሄሳፈ ጉየ፥ ዮሰፍ ባ አዋ ያይቆባ ገልስድ፥ ካዋ ስን አꬅስ። ያይቆብ ግብፀ ካዋ አንጅዳፐ ጉየ፥ 8 ካዎይ ያይቆባ፥ “ነዉ አፑን ላይꬄ?” ያግድ ኦይችስ።

9 ያይቆብ ካዋኮ፥ “ታኒ ዳቡርሳን ደእዳ ላይꬃይ ፄታነ ሀስታማ። ታ ላይꬃይ በን ታ አዋት ዳቡርሳን ደእዳ ላይꬃፈ ጉꬃነ መቶይ ዳርዳ ላይꬅ” ያግስ። 10 ሄሳፈ ጉየ፥ ያይቆብ ካዋ አንጅድ፥ እያ ስንꬃፈ ካረ ከይስ።

11 ዮሰፍ ካዎይ ኪትዳይሳዳ ባ አዋነ ባ እሻታ ግብፀ ቢታን ራምሰ ካታማ ማታን ደእያ ኡባፈ አꬍዳ አራዳ ቢታን ኤንታ ዎꬅስ። 12 ዮሰፍ ባ አዋስ፥ ባ እሻታስነ ባራ ደእያ ኡባስ ኤንታ ናይታ ታይቡዋዳ ካꬅ እሚስ።

13 ቢታ ኡባን ኮሽ ሱልዳ ግሾ ቢታን ኡባን ካꬅ ባዋ፤ ግብፀይነ ካናነ ቢታይ ቆሄትዶሶና። 14 ዮሰፍ ግብፀ ካꬃ ባይዝድ፥ ግብፀንነ ካናነ ቢታታን ደእያ ሚሽያ ኡባ ሺሽድ ግብፀ ካዋ ኬꬃ ገልስስ። 15 ግብፀ ሚሸይነ ካናነ ሚሸይ ዉርዳ ዎደ ግብፀ አሳ ኡባይ ዮሰፋኮ ይድ “ኑስ ካꬅ እማ። ኑ ሚሸይ ዉርዳ ግሾ ኑኒ ነ ስንꬃን አይስ ኮሻን ሀይቃኔ?” ያግዶሶና።

16 ዮሰፍ ኤንታኮ፥ “ህንተ መህያ ኤክ ዪተ። ህንተ ሚሸይ ዉርዳባ ግድኮ፥ ታኒ ካꬃ ህንተ መህያራ ላማና” ያግስ። 17 ሄሳ ግሾ፥ ኤንቲ ባንታ መህያ ዮሰፋስ ኤህዶሶና። ዮሰፍ ኤንታ ፓራ፥ ዶርሳ፥ ዴሻ፥ ሚዛነ ሀርያ ካꬃራ ላምስ። እ ሄ ላይꬅ ኤንታ መህያ ኡባራ ካꬃ ላምድ፥ ኤንታ ሙዝድ ሻችስ።

18 ኤንቲ ካልያ ላይꬃን እያኮ ይድ “ኑኒ ኑ ጎዳፐ ቆስያባይ ባዋ፤ ኑ ሚሸይ ኡባይ ዉርስ። ኑ መህያካ ነዉ እም ድግዳ። ኑ ቦላፈነ ኑ ጋድያፐ አትሽን፥ ኑ ጎዳስ እማናባይ ሀራባይ ባዋ። 19 ኑኒ ነ በእሽን አይስ ኮሻን ሀይቃኔ? ኑ ጋደይካ አይስ ꬋዪ? ኑናካ ኑ ጋድያካ ሻማዳ ኑስ ካꬅ እማ። ኑኒ ካዋስ አይለታና፥ ኑ ጋደይካ እያባ ግዶ። ኑኒ ሀይቆና አታና መላ ኑ ጋደይካ ኦፆና መላ ዘረꬅ ኑስ እማ” ያግዶሶና።

20 ዮሰፍ ግብፀ ቢታ ኡባ ካዋስ ሻምስ። ኮሽ ሱልን፥ ግብፀ አሳይ ኡንኤትድ ባንታ ጋድያ ባይዝን ጋደይ ካዉዋባ ግድስ። 21 ዮሰፍ አሳ ኡባ ግብፀስ ሀ ጋፃፐ ህን ጋፃ ጋካናስ ካዋስ አይለ ኦꬅስ። 22 ሽን ካዎይ ካህነታስ ካꬅ እምያ ግሾ ዮሰፍ ኤንታ ጋድያ ሻምቤና። ሄሳ ግሾ፥ ባንታ ጋድያ ባይዝቦኮና።

23 ዮሰፍ አሳኮ፥ “ህዛ ሀች ታኒ ህንተናነ ህንተ ጋድያ ካዋስ ሻምዳ ግሾ፥ ዘረꬅ ኤፍድ ህንተ ጋደን ዘርተ። 24 ሽን ካꬃ ሺሽያ ዎደ አይፍዳባፐ እቻሹ ኩሽያፐ እስ ኩሽያ ካዋስ እምተ። አትዳ ኦይዱ ኩሸይ ህንተ ጋድያስ ዘረꬅ፥ ህንተዉነ ህንተ ሶ አሳስ ካꬅ ግዶ” ያግስ።

25 ኤንቲ፥ “ኔኒ ኑና አሻዳሳ። ኑ ጎዳ ስንꬃን ኑኒ ሳበትኮ፥ ኑኒ ካዋስ አይለታና” ያግዶሶና። 26 ሄሳ ግሾ፥ ዮሰፍ ግብፀ ቢታን አይፍዳባፐ እቻሹ ኩሽያፐ እሱዋ ካዋስ እመይሳ ህገ ከስስ። ሄ ዎጋይካ ሀች ጋካና ኤቅድ ደኤስ። ካህነታ ጋድያፐ አትሽን፥ ሀር ኡባይ ካዉዋባ ግድስ።

27 እስራኤለት ግብፀ ቢታን ጌሳመ ግያ በሳን ደእዶሶና። ኤንቲ ያን ዱረትዶሶና፤ የለት ዳርዶሶና።

28 ያይቆብ ግብፀ ቢታን ታማነ ላፑን ላይꬅ ደእስ። ያይቆብ ደእዳ ላይꬃይ ፄታነ ኦይታማነ ላፑና። 29 እስራኤለስ ሀይቅያ ዎደይ ማታትን፥ ባ ናኣ ዮሰፋ ፄግስድ ሀይሳዳ ያግስ፤ “ታኒ ነ ስንꬃን ሳበትዳባ ግድኮ፥ ነ ኩሽያ ታ ሸምፑዋ ቦላ ዎꬃ። ኔኒ ታዉ ምሸትያባ ግድኮ ታና ግብፀን ሞግከ ጋዳ ታዉ ጫቃ። 30 ሽን ታኒ ሀይቅያ ዎደ ታና ግብፀፈ ኤፋዳ፥ ታ ማይዛት ሞገትዳሱዋን ሞጋ” ያግስ።

ዮሰፍ፥ “ታኒ፥ ነና ነ ግዳይሳዳ ኦꬃና” ያግስ።

31 ያይቆብ እያኮ፥ “አነ ታዉ ጫቃ” ያግስ። ዮሰፍ እያዉ ጫቅስ። ሄሳፈ ጉየ፥ እስራኤለይ ባ ጉፍያ ቦላ ካትድ ፆሳ ጎይንስ።