1 ናብያ እንባቆመስ ጎዳይ ቆንጭስዳ ቃላይ ሀይሳ። 2 እንባቆመይ፥ “አቤት ጎዳዉ፥ ታና ማዳና መላ ታኒ ነና ፄግያ ዎደ አዉደ ጋካናዉ ስኦና እፃይ? ታኒ ኡንኤታዳ ኔኮ ዋስያ ዎደ አዉደ ጋካናዉ አሾና እፃይ? 3 ኔኒ ሀ ኢታተꬃ ኡባ ታና አይስ በሳይ? ኔኒ ባላ በአሸ አይስ ስእ ጋይ? ꬋዮይነ ጌላተꬅ ታ ስንꬃና፤ ፓላምነ ኦሽ ቢታ ኡባን ዳርስ። 4 ሄሳ ግሾ፥ ህገይ ዶልእስ፤ ሱረ ፕርድ ካንና። ናጋራንቾት ፅሎ አሳታ ተቅድ ኦይክዳ ግሾ፥ ፕርድ ጌላትስ” ያግስ።

5 ጎዳይ ዛሪድ፥ “ህንተ ዩሹዋን ደእያ ካዎተꬃታ ፄልድ ማላለትተ። ህንተዉ አስ ኦድን ህንተ አማኖና ኦሱዋ ታኒ ህንተ ዎድያን ኦꬃና። 6 ታኒ ቃይ ባይናይሳታነ ድርግያ ባብሎነ አሳ ደንꬃና። ኤንቲ ባንታባ ግዶና ቢታ ኦልድ ኦይካናዉ ቢታ ኡባን ዩዮሶና። 7 ኤንቲ ያሽሶሶናነ ዳጋንꬆሶና፤ ባንታና ቦንችስያ ህገ ከሶሶና። 8 ኤንታ ፓራት ማሄፐ አꬍድ ኤለሶሶና፤ ኮሻትዳ ኦማርሳ ሱꬉመፐ አꬍድ ዎዛና ምኖ። ኤንታ ፓራ አሳት ሃሆፐ ዮሶና፤ ኤንቲ አርጋንꬅ እስባ ኦይካናዉ ዎꬍያዳ ፓሎሶና። 9 ኤንታ ኦላንቾት ኡባይ ኢታ ኦሶ ኦꬃናዉ ባዞ ጫርኮዳ ጫርክሸ ዮሶና። አሳ ድእድ ሻፈዳ ሺሾሶና። 10 ኤንቲ ካዎታ ቦላ ቀልቅሶሶና፤ ሃረይሳታ ኤንቲ ቶቾሶና። ኤንቲ ሹቻ ድርሳን ድረትዳ ካታማታ ኡባ ቦላ ሚጮሶና። ሄ ድርሳታ ድአናዉ ኤንታ ዩሹዋን ቢታ ሺሾሶና። 11 ሄሳፈ ጉየ፥ ኤንቲ ኡባ ጫርኮ መላ ፕትድ ኤፋና። ሄ ጌላታስ ኤንታ ዎልቃይ ኤንታ ፆሳ” ያግስ።

12 አቤት ጎዳዉ፥ ታ ፆሳዉ፥ ታ ጌሻዉ፥ ኔኒ መርና ፆሳ ግድኪ? ኔኒ ኑ ዛላ ግድያ ግሾ ኑኒ ሀይቆኮ። አቤት ጎዳዉ፥ ባብሎነ አሳይ ኑና ፕርዳና መላ ኤንታ ደንꬃዳ ዎልቃ ኤንታዉ እማዳሳ። 13 ነ አይፈት ዳሮ ጌሽ ግድያ ግሾ፥ ኢታባ ፄላናዉ ዶሶኮና፤ ኔኒ ኢታባይ ኦሰትያ ዎደ በአሸ ስእ ጋካ። ያትን፥ ሀ ኢታታ አይስ ስእ ጋዳ ፄላይ? ናጋራንቾት ባንታፈ አꬍድ ፅልያ አሳታ ምትያ ዎደ አይስ ስእ ጋይ? 14 ኔኒ አሰ አባ ሞሎዳነ ካለይ ባይና ኡሎራ ጎሸትያ መተꬃታ መꬋዳሳ። 15 ባብሎነ አሳይ አሳ ኡባ ቃጰን ቆርድ ከሳና፤ ኤንታ ባንታ ግትያን ኦይካና፤ ኤንታ ባንታ ዳቹዋን ቡርድ ሺሻና፤ ሄሳ ኦꬅድ ኤንቲ ኡፋይታናነ ሀሹ ጋና። 16 ሄሳ ግሾ፥ ኤንቲ ባንታ ግትያስ ያርሻና፤ ባንታ ዳቹዋስ እፃነ ጩይሳና። ኤንቲ ሻሎ ደመይነ እንጀትን ደኤይ ሄ ግተታና። 17 ያትን፥ ኤንቲ ባንታ ግትያ ቃይ ባይና የግሸነ ምሽ ካዎተꬃታ ꬋይስሸ ዋንድ ዳኔ?