1 ዳሮ አሳ ሱꬅ ጉስዳ ናናወ ካታማ አየ! ዎርዶይ ኩምስ፤ ቦንቅ ኤክዳ ሻሉዋስ ታይቦይ ባዋ። 2 ናናወ ካታመን ልሶ ግርሳይ፥ ገርቶ ጎንዶርሳይ፥ ፓራታ አዳርሶይነ ፓራ ጋረታ ጉፋይ ስኤቴስ። 3 ፓራ አሳት ፒርፆሶና፤ ማሻይ ሎጬስ፤ ቶራይ ጶሌስ። ዳሮ አስ ሀይቅስ! አህ አሀ ቦላ ዶረትስ፤ ሀይቅዳባስ ታይቦይ ባዋ! ያራ ካንꬅድ ብያ አስ አሀን ꬉበቴስ። 4 ሄስ ኡባይ ሀንዳይ ማር ባይና ናናወ ላይማተꬃ ጋሱዋና። እ ዳሮ ሙሩኖ ኦꬃሱ፤ ካዎተꬃታ ባ ላይማተꬃን፥ አሳ ባ ሙሩኑዋን አይለያሱ።

5 ኡባፈ ዎልቃማ ጎዳይ፥ “ሄኮ፥ ታኒ ነ ቦላ ደንዳስ! ታኒ ነ ማኡዋ ኔፐ ቃራና፤ ነ ካሉዋ አሳ፥ ነ ፖኩዋ ካዎተꬃታ በሳና። 6 ታኒ ነና ፕቶ የግያ በሲ ከሳና፤ ነና ካꬋና፤ አስ ኡባይ ነና ሚጫናዳ ኦꬃና። 7 ነና በእያ ኡባይ ኔፐ ሃክድ፥ ‘ሄኮ፥ ናናወ ካታማይ ባይሳትስ፤ እያዉ አዛናናይ ኦኔ? እያ ምንꬅያ አስ አዉፐ በንታንደሻ?’ ያጋና” ያጌስ።

8 ነኖ፥ ናናወ፥ ኔኒ ግብፀን ደእያ ተብሶ ካታማፐ አꬋይ? እያ ናይለ ሻፋ ማታን ደአዉሱ፤ ሃꬅ እ ዩሹዋ ተቅስ፤ ሻፋይ እዉ ሚፃ ግድስ፤ ቃስ ሃꬃይካ እዉ ድርስ። 9 ቶጰይነ ግብፀይ እዉ ዛው ባይና ዎልቃ፤ ፑፅነ ሊበይ እዮ ማደይሳታ። 10 ግዶሽን፥ እያ ድኤታሱ፤ እ ጉꬃ ናይት ደሸትድ፥ ኦገ ጋፃ ኡባን ኩንድዶሶና። እ ቦንቸትዳ አሳታ ቦላ ሳም የገትስ፤ እ ግታ አሳት ኡባይ ሳንꬃላታን ቃሸትዶሶና።

11 ነኖ፥ ናናወ፥ ኔኒ ማꬆትድ ጋንድጋርያ አሳዳ ሀናና። ነ ሞርከታ ስንꬃፈ ባቃታዳ አትያ በሲ ኮያና። 12 ነ ሚፃት ኡባይ ኮይሮ ቴርዳ አይፈይ ደእያ ባላሰ ምꬃ መላ። ባላሰ ምꬃ ቃꬅያ ዎደ ቴራይ መይሳ ዶናን ዎꬌስ። 13 ሄኮ፥ ነ ኦላንቾት ኡባይ ማጫሳ መላ። ነ ዛዋ ፐንገት ነ ሞርከታስ ዳልግድ ዶየትዶሶና፤ ኮበ ምꬃ ታም ምስ። 14 ነ ሞርከት ነ ዩሹዋ ኡንኤꬅያ ዎደ ኡያና ሃꬃ ሀእ ትካ። ነ ሚፃ ምንꬃ፤ ኡርቃ የꬋዳ ፁበ መꬋ፤ ኦቶ ጊግሳ። 15 ነና ያን ታም ማና፤ ቦለይ ካꬅ መይሳዳ ነና ማሽ ማና። ኔኒ ቦለዳ ዳራ ጎንዶዳ የለታ። 16 ኔኒ ነ ዛልአንቾታ ሳሎ ፆልንቶታፐ አꬃዳ ዳርሳዳሳ። ሽን ኤንቲ ቦለዳ ኡባ ም ድግድ ፓልድ ꬋያና። 17 ነ ቶራ ሞጮናትነ ነ ሞርናት ሜጎ ዎደ ድርሳ ቦላ ኡትዳ ቦለ መላ። ኤንቲ አው ከይያ ዎደ ፓልድ ꬋዮሶና፤ ኤንቲ ደእያ በሳ ኤረይ ባዋ።

18 ነኖ አሶረ ካዋዉ፥ ነ ሀላቃት ꬍስክዶሶና፤ ነ ቦንቸትዳ አሳት ኩንድዶሶና። ነ አሳይ ደረታ ቦላ ላለትስ፤ ኤንታ ሺሽያ አስካ ባዋ። 19 ኔኒ ዛው ባይና ኢታተꬃፈ ከስ ኤክዳ አስ ባይና ግሾ፥ ነ መኦይ ኮለተና፤ ነ ማዱንꬃይ ፓፀና። ነባ ስእዳ ኡባይ ነ ቦላ ኩሸ ባቃና።