1 ነኖ፥ ናናወ፥ መንረይስ ከይስ! ሄሳ ግሾ፥ ነ ሚፃ ናጋ፤ ነ ኦግያ ዎቻ፤ ነ ዳንጩዋ ምንꬃ፤ ነና ጊግሳ።

2 ቦንቀይሳት ቦንቅድ፥ ኤንታ ዎይንያ ꬋይስኮካ፥ ጎዳይ እስራኤለ ቦንቹዋ ዛርዳይሳዳ ያይቆባ ቦንቹዋ ዛራና።

3 ኦላንቾት ዞኦ ጎንዳለ ኦይክዶሶና፤ ዞኦ ማኦ ማእዶሶና። ኤንቲ ኦላስ ጊግያ ዎደ ፓራ ጋረት ቅንኣሮሶና፤ ኤንቲ ባንታ ቶራ ሉፆሶና። 4 ፓራ ጋረት ኦግያን አዳርሶሶና፤ ኤንቲ ያነ ሃነ ሄመትሸ ካታማ ኦግያን ዩዮሶና። ቃስ ኤንቲ ላጮይ ሎጩ ግያ ፆምፐ ዳኖሶና፤ ዎልአንꬃዳ ኤለሶሶና። 5 ናናወይ ባ ሀላቃታ ፄግድ ሺሻና፥ ሽን ኤንቲ ይሸ ኦገ ቦላ ꬉበታና። ኤንቲ ካታማ ግምበ ድርሳኮ ኤለሳና፥ ሞርከታ ቆሁዋፐ ኤንታ ናግያ ጎንዳለይ ጊግስ። 6 ሻፋ ባጋራ ደእያ ካታማ ድርሳ ፐንገት ዶየትዶሶና፤ ካዎ ጋꬎይ ዳጋምስ። 7 ካውያ ድኤታዳ ባሱ፤ እ ማጫ አይለት አዛንድ ሆለዳ ጉጉማና፤ ባንታ ትራ ባቅሸ ዬካና። 8 ተቀትዳ ሃꬅ ዶይ በስን ጎገይሳዳ ናናወ አሳይ ካታማፐ ባቃታና። አስ ኤንታ ባ ቃላ ꬎቁ ኦꬅድ፥ “ኤቅተ! ኤቅተ!” ያግድ ፄጋና፥ ሽን ኦንካ ጉየ ፄለና። 9 ሄ ካታማ ሻሉዋስነ፥ እያን ምንጀትዳ ቦንቾ ሚሽያስ ታይቦይ ባዋ። ሄሳ ግሾ፥ ሄ ብራነ ዎርቃ ቦንቅተ!

10 ናናወይ ባይሳ ግድስ፤ ካይሳትድ፥ ባዞ ግድስ! አሳ ዎዛናይ ያሻን ትልእስ፤ ጋደይ ኮኮርስ፤ ፄሳይ ፃፀትስ፤ ሶምኦይ ቡላትስ! 11 ጋሞት አቅያ በሳይ፥ ዎዳላ ጋሞት ደእያ በሳይ፥ አደይነ ማጫ ጋሞት ባንታ ማራታራ ያሽ ባይና ጉፕያ በሲ ዳንያ ናናወ ካታማይ ሀእ አዉን ደኢ? 12 ጋሞይ ባ ማራታስ ግድያባ ኦይክስ፤ ባራ ደእያ ማጫ ጋመስ መንረꬅድ እሚስ። ባ ጎንጎሉዋ ዎꬃን፥ ባ ኦላ አሾን ኩንꬅስ።

13 ኡባፈ ዎልቃማ ጎዳይ፥ “ሄኮ፥ ታኒ ነ ቦላ ደንዳስ! ታኒ ነ ፓራ ጋረታ ታማን ፁጋና፤ ነ ዎዳላ ጋሞታ ማሽ ማና። ኔኒ ሀራታፐ ኤክዳባ ታኒ ኔፐ ዎስሳና፤ ነ ኪታንቾታ ቃላይ ህዛፐ ስኤተና” ያጌስ።