1 ኤልቆሻ ካታማን ደእያ ናሆም ናናወባ ኦድዳ ቃላይነ በእዳ ቆንጨꬃይ ሀይሳ። 2 ጎዳይ ቃናተይሳነ ሀሎ ከይያ ፆሲ፤ ጎዳይ ሀሎ ከየይሳነ ሀንቆን ኩምዳይሳ። ጎዳይ ባራ ኤቀተይሳታ ሀሎ ከዬስ፤ ባ ሞርከታ ሴራናዉ ጊገት ኡትስ። 3 ጎዳይ ሀንቀታናዉ ኤለሰና፤ እያ ዎልቃይ ግታ፤ እ ቆህዳይሳ ሴሮና አገና።

ጎዳስ ጎትያነ ሆቢያ ግዶራ ኦገይ ደኤስ፤ ሻራይ እያ ቶሆይ የꬍን ደንድያ ባና። 4 እ አባነ ሻፋ ሀንቅድ መልሴስ፤ ባሳነነ ቃርመሎስ ሹሎሶና። ልባኖሰ ጪሻይ ቆቆፈቴስ። 5 እያ ስንꬃን ደረት ቃፆሶና፤ ዙማት ትልኦሶና። እ ቆንጭያ ዎደ ቢት ቃፃና፤ ሳአን ደእያ ኡባይ ኮኮራና። 6 እያ ሀንቁዋ ስንꬃን ኤቃናይ ኦኔ? እያ ሀንቁዋ ሱሏ ዳንዳአናይ ኦኔ? እያ ሀንቆይ ታማዳ ቡክያ ዎደ ዛላት ዛእድ ጳልቀቶሶና።

7 ጎዳይ ሎኦ፤ መቶ ጋላስ ቆሰትድ አትያ በሰ፤ እ ባናን አማነተይሳታ ኤሬስ። 8 ሽን እ ባ ሞርከታ ድኦን ሙክድ ꬋይሳና፤ ባራ ኤቀተይሳታ ꬉማን ገልሳና።

9 ህንተ ጎዳ ቦላ ማቀተይ አይብሴ? እ ህንተና ኩምꬅ ꬋይሳና፤ መቶይ ዛር ደንደና። 10 ህንተ ማꬆትድ ጋንድጋረይሳት፥ ዎልራ ኦይከትዳ አጉንꬅነ ቡረይ ታማን ፁገትያ መላ ህንተ ታማን ፁገትድ ꬋያና። 11 ናናወ፥ ጎዳ ቦላ ኢታባ ማቀተይነ ኢታ ዞረ ዞረይ ነ ግዶፈ ከይስ።

12 ጎዳይ፥ “ናናወት ምኖነ ዳሮ ግድኮካ፥ ሾደትድ ꬋያና። ታኒ ካሰ ይሁዳ አሳ ኡንኤꬃስ፥ ሽን ህዛፐ ጉየ ኡንኤꬅከ። 13 ታኒ ሀእ አሶረታ ቃምባራ ህንተ ጋናፈ መንꬃና፤ ህንተ ቃሸትዳ ሳንꬃላታ ዱሰረꬃና” ያጌስ።

14 ናናወ፥ ጎዳይ ነ ቦላ ፕርድዳ ፕርዳይ ሀይሳ: “ህዛፐ ጉየ ነ ሱንꬃ ፄግስያ ኮቸ ነዉ ዴና። ነ ፆሳታ ኬꬃን ደእያ ምስለታነ ኤቃታ ታኒ ꬋይሳና። ኔኒ ፓꬆናባ ግድያ ግሾ፥ ታኒ ነ ዱፉዋ ቦካና” ያጌስ።

15 ሄኮ፥ ሎኦ ዎረ ኦድሸነ ሳሮተꬃ አዋጅሸ ኪተትድ የይሳ ቶሆይ ደርያ ቦላራ ጋክስ። ይሁዳ አሳዉ፥ ህንተ ሞርከት ኩምꬅ ꬋይዶሶና፤ ኤንቲ ዛሪድ ህንተ ቢታ ኦልድ ኦይኮኮና። ሄሳ ግሾ፥ ህንተ ባለታ ቦንችተ፤ ህንተ ቃንገꬃ ጋꬅተ።