1 ታና አየ! ታኒ ቴራ አይፈይ ማፀትድ ዉርን፥ ዎይንያፐነ ባላሰ ምꬃፈ ባ አሞትዳይሳ ደማናዉ ዳንዳእቦና ኮሻትዳ ኡራ መላ ግዳስ። 2 ፆሳ አስ ቢታን ባዋ፤ አሳ ጋርሳን ሱረ አስ ꬋይስ። አስ ኡባይ አሳ ሱꬅ ጉሳናዉ ሆክድ ናጌስ፤ ኡባይ ባ እሻ ግተን ኦይካናዉ ካሌስ። 3 ኤንታ ናምኡ ኩሸት ኢታባ ኦꬃናዉ ሎህዶሶና። ሀላቅነ ዳይን ዎꬋፈ ኦይቾሶና፤ ዎልቃራ ደእያ አሳት ባንታ ኮይዳባ ዎልቃን ፖልሶሶና። ኤንቲ ኡባይ እስፈ ፕርዳ ምርቅድ ꬋይሶሶና።

11 ህንተኖ፥ እስራኤለ አሳዉ፥ ህንተ ካታማ ግምበ ድርሳት ድረትያ ጋላሳይ ያና፤ ሄ ጋላስ ህንተ ዛዋይ አካና። 12 ሄ ጋላስ ህንተ አሳይ ህንተኮ ስማና። ኤንቲ አሶረፐ፥ ግብፀፈ፥ ኤፍራፂሳ ሻፋ ሄራን ደእያ ቢታታፐ፥ ሃሆ በሳን ደእያ አባ ጋፃፐነ ꬎቃ ዙማታፐ ህንተኮ ስማና። 13 ሽን ቢታይ እያ ቦላ ደእያ አሳ ኢታተꬃ ጋሶን አስ ባይና ባይሳ ግዳና።

14 ኔኒ ባዞን ባርካ ደእያ፥ ነ ላታ ደርያ ነ አራዳ ቢታን ነ አሳ ሄማ። ኤንቲ ካሰ ዎድያዳ ባሳነንነ ጋላዳን ሄመታና መላ ኦꬃ።

15 ጎዳይ፥ “ህንተ ግብፀፐ ከይዳ ዎድያዳ ታኒ ህንተና ማላልስያባ በሳና” ያጌስ። 16 ኤንታ ዎልቃይ ግታ ግድኮካ፥ ካዎተꬃት ኡባይ ሄሳ በእድ ዬላታና። ኤንቲ ዬላትድ፥ ባንታ ዶና ኦይካና፤ ኤንታ ሀይꬃይ ቱላና። 17 ኤንቲ ሾሻዳነ ሳአራ ጎሸትያ መተꬃታዳ ቢታ ላጫና። ኤንቲ ባንታ ሚፃፐ ኮኮርሸ ከይድ ግታ ዳጋማን ጎዳኮ፥ ኑ ፆሳኮ፥ ስማና፤ ኤንቲ ጎዳ ያይድ ዳና።

18 ናጋራ ኡባ አቶ ያገይ፥ አትዳ ባ አሳ ናቁዋ ታይቦናይ ነ መላ ፆሲ ኦኔ? ማሮተꬅ ነና ኡፋይስያ ግሾ ነ ሀንቁዋን መርናዉ ጋምአ ኤራካ። 19 ኔኒ ዛራዳ ነ አሳስ ቃታሳ፤ ኑ ናቁዋ ነ ቶሁዋን የꬋሳ፤ ኑ ናጋራ አባ ጪሞን ሆላሳ። 20 ኔኒ በን ኑ ማይዛታስ ጫቅዳ ጫቁዋዳ አብራሃመነ ያይቆባ ዛረ ግድዳ ነ አሳስ ነ አማነተꬃነ ነ መርና ሲቁዋ በሳና።