1 ጎዳይ እስራኤለ አሳስ ኦደይሳ ስእተ።

አቤት ጎዳዉ፥ ደንዳዳ ꬎቃ ደረታ ስንꬃን ፕርደታ፤ ኔኒ ኦድያባ ዙማት ስኦ። 2 ህንተ ደረት፥ ህንተ ምኖ ሳኣ ባሶት፥ ጎዳይ ሞትያ ሞቱዋ ስእተ። ጎዳይ ባ አሳራ ሞተቴስ፤ እስራኤለ አሳራ ፓላሜስ።

3 ጎዳይ፥ “ታ አሳዉ፥ ታኒ ህንተና አይ ቆሀድና? ታኒ ህንተዉ ዋናዳ ቶሆ ግዳድና? አነ ታዉ ኦድተ! 4 ታኒ ህንተና ግብፀ ቢታፈ ከሳስ፤ ታ ህንተና አይለተꬃ ቢታፈ ዎዛስ። ህንተና ካለꬃና መላ ሙሰ፥ አሮናነ ማይራሞ ህንተዉ እማስ። 5 ታ አሳዉ፥ ሞአበ ካዋ ባላቅ ነዉ ቆፕዳባነ ብኦራ ናአይ ባላም እያዉ ዎይግድ ዛርዳኮ አኬክተ። ኔኒ ሴፅማፐ ጋልጋላ ብያ ዎደ፥ ኦገን ሀንዳባ አነ ቆፕተ። ሄሳ ህንተ ቆፕኮ ታኒ ጎዳይ ህንተና አሻናዉ ኦꬅዳባ ኡባ ህንተ አኬካና” ያጌስ።

6 ጎዳ፥ ꬎቃ በሳን ደእያ ፆሳ ስንꬃን ጎይናናዉ ያሸ ታኒ አይ ኤካዳ ሺቆ? እያዉ ፁሳ ያርሾ ግዳና መላ እስ ላይꬃ ዎፋኖ ኤካዳ ዮ? 7 ጎዳይ ሙኩሉ ዶርሳ ማራዘታን ዎይኮ ታሙ ሙኩሉ ሻፋን ደእያ ሃꬃ መላ ሻማሆ ዛይተን ኡፋይታንዴ? ታ ናቁዋ ግሾ፥ ታ ባይራ ናኣ፥ ታ ሸምፑዋ ናጋራ ግሾ ታ የሉዋ እሞ?

8 አሳ ናኦ፥ ጎዳይ ነዉ ሎኦባ ኦድ ዎꬅስ። ጎዳይ ኔፐ ኮየይ አይቤ? ኔኒ ሱረ ፕርዳና መላ፥ ማሮታ ዶሳና መላነ አሽከተꬃን ነ ፆሳራ ዳና መላ ግደኔ?

9 ጎዳይ፥ “የሩሳላመ ካታማ ፄግድ፥ ‘እያ ሱንꬃስ ያሸተꬅ ጭንጫተꬅ’ ሴራ ፃምአነ እያ ጊግስዳይ ኦነኮ አኬክተ። 10 ናጋራንቾይ ገነን ባ ሶን ሺሽዳ ሻሉዋነ እፀትዳ ዎርዶ ማካ ሚሸታ ታኒ ዶጋነዬ? 11 ያትን፥ ታኒ ዎርዶ ምዛነን ዎርዶ ማካ ሚሸታ ዋታዳ አቶ ጎ? 12 ሄ ካታማ ዱረት ጌላተꬃን ኩምዳይሳታ። እያን ደእያ አሳ ኡባይ ዎርዳንቾ፤ ኤንታ እንፃርሳይ ኢታ። 13 ሄሳ ግሾ፥ ታኒ ህንተ ናጋራ ግሾ ህንተና ꬋይሳናዉ ደንዳስ። 14 ህንተ ማና፥ ሽን ካለከታ፤ ኮሽ ህንተፈ ዱፀና። ህንተ ቡርድ ሺሻና፥ ሽን ህንተዉ አደና፤ ህንተ ዳጋያባ ታኒ ማሻን ꬋይሳና። 15 ህንተ ካꬅ ዘራና፥ ሽን ጫከከታ፤ ሻማሆ ቴራ ጉምአና፥ ሽን ጎኤተከታ፤ ዎይነ ቴራ ጉምአና፥ ሽን እያ ኡየከታ። 16 ህንተ ካዋ ኦምራ ዎጋ፥ እያ ናኣ ካዋ አካባ ሶ ኢታ ኦሱዋነ ኤንታ ዞርያ ካልዳ ግሾ፥ ታኒ ህንተና ꬋይሳና፤ ህንተና አስ ኡባይ ቦራና መላ ኦꬃና። አሳይ ህንተና ጫይያ ጫሻ ህንተ ቶካና” ያጌስ።