1 ህንተኖ፥ የሩሳላመ አሳዉ፥ ህንተ ኦላንቾታ ሺሽተ! ኑ ሞርከት ኑና ተቅዶሶና፤ ኤንቲ እስራኤለ ካለይሳ ጋጩዋ ፃምአን ሾጫና ሀኖሶና። 2 ጎዳይ፥ “ኤፍራታን ደእያ ቤተለመ ካታማዉ፥ ኔኒ ይሁዳ ካታማታ ግዶን ጉꬃ፤ ሽን እያዉ ደንዶይ በንፐ ዶምድ፥ መርናዉ ግድዳይስ፥ እስራኤለ ሃራናይስ ታዉ ኔፐ ከያና” ያጌስ።

3 ሄሳ ግሾ፥ እቀꬅ ኦይክዳ ማጫስያ ናኣ የላና ጋካናዉ፥ ጎዳይ እስራኤለ ሞርከታስ አꬅድ እማና። ሄሳፈ ጉየ፥ ድኤትድ ደእያ እያ እሻት ስሚድ፥ ባንታ አሳራ ዋላከታና። 4 እ ጎዳ ምኖተꬃን ይድ፥ ጎዳ ባ ፆሳ ሱንꬃ ዎልቃን ባ አሳ ሄማና። እ ሳኣ ጋፃ ጋካናዉ ግታ ግድያ ግሾ፥ ኤንቲ ሳሮተꬃን ዳና። 5 እ ኤንታዉ ሳሮተꬅ ግዳና።

አሶረ ቢታ አሳት ኑ ቢታ ኦይክያ ዎደነ ኑ ሚፃታ የꬍድ ገልያ ዎደ ኑኒ ላፑን ናገይሳታነ ሆስፑን ካለይሳታ ኤንታ ቦላ ደንꬃና። 6 ኤንቲ ናምሩደይ ደእያ አሶረ ቢታ ኦላን ፆንድ ሃራና። አሶረ ቢታ አሳት ኑ ቢታ ኦልድ ኦይክያ ዎደነ ኑ ዛዋ የꬍያ ዎደ እ ኑና ኤንታ ኩሸፐ አሻና። 7 አትዳ ያይቆባ ዛረት ዳሮ ደርያ ግዶን ጎዳይ ኪትዳ ፃሳ መላነ ማታ ቦላ ዎꬍያ አካ መላ ግዳና። ኤንቲ አማነትድ ናገይ ጎዳፐ አትሽን፥ አሰ ግደና። 8 አትዳ ያይቆባ ዛረት ካዎተꬃታ ግዶንነ ዳሮ አሳ ግዶን፥ ባዞን ዶአታ ግዶን ጋሞ መላነ ዶርሳ ዉደ ግዶን ጉፕ ዎꬍያ ዎዳላ ጋሞ መላ ግዳና። እ ያራ አꬍያ ዎደ የረስነ መንረꬄስ፤ ኦንካ አሻናዉ ዳንዳኤና። 9 ህንተ ኩሸይ ህንተራ ኤቀተይሳታ ቦላ ደንዳና፤ ህንተ ሞርከት ኡባይ ꬋያና።

10 ጎዳይ፥ “ሄ ጋላስ ታኒ ህንተ ፓራታ ህንተ ግዶፈ ꬋይሳና፤ ህንተ ፓራ ጋረታ መንረꬃና። 11 ታኒ ህንተ ቢታን ደእያ ካታማታ ꬋይሳና፤ ህንተ ሚፃ ኡባ ላላና። 12 ህንተ ማሮታ ታኒ ꬋይሳና፤ ህዛፐ ጉየ ሙሩነይሳት ህንተ ግዶን ዶኮና። 13 ታኒ ህንተ ኤቃ ምስለታነ ህንተ ጎይናናዉ ኤስዳ ሹቻታ ህንተ ግዶፈ ꬋይሳና፤ ህዛፐ ጉየ ህንተ ህንተ ኩሸን መꬍዳባ ጎይነከታ። 14 ታኒ አሼራ ኤቃ ፆሳታ ህንተ ግዶፈ ሾዳና፤ ህንተ ካታማታ ꬋይሳና። 15 ታዉ ኪተትቦና ካዎተꬃታ ቦላ ይሎንነ ሀንቆን ሀሎ ከያና” ያጌስ።