1 ዉርሰꬃ ጋላሳን ጎዳ ፆሳ ኬꬃይ ኬፀትዳ ዙማይ፥ ዙማታ ኡባፈ ꬎቁ ግድ በንታና። ደረ ኡባፈ ꬎቁ ꬎቁ ጋና። ካዎተꬃት ኡባይ እያኮ ዎዳና። 2 ህገይ ፅዮነፐ፥ ጎዳ ቃላይ የሩሳላመፐ ከይያ ግሾ፥ ዳሮ ካዎተꬃት ይድ፥ “አነ ሃይተ፤ ጎዳ ዙማኮ፥ ያይቆባ ፆሳ ኬꬃኮ ከዮስ። ኑ እያ ሸንያ ኦꬃና መላ እ ኑና ባ ኦግያ ታማርሳና” ያጋና። 3 እ ዳሮ አሳታ ግዶን ፕርዳና፤ ሃሆን ደእያ ምኖ ካዎተꬃታ ፓላማ ድጋና። ኤንቲ ባንታ ማሻ ማራሻ፥ ባንታ ቶራ ባጫ ከሳናዉ ቆፃና። ካዎተꬃይ ካዎተꬃ ቦላ ኦላ ደንና፤ ህዛፐ ጉየ፥ ኤንቲ ኦላ ትምርተ ታማሮኮና። 4 ሽን አስ ኡባይ ባ ዎይነ ኩያንነ ባላሰ ኩያ ጋርሳን ዎፑ ግድ ኡታና፤ ህርግስያባይ አይብካ ባዋ። ኡባፈ ዎልቃማ ጎዳይ ሄሳ ኦድስ።

5 አሳ ኡባይ ባ ፆሳ ፆሳ ጎይናና። ሽን ኑኒ ጎዳ፥ ኑ ፆሳ ሱንꬃን መርናዉ ሄመታና።

6 ጎዳይ፥ “ሄ ጋላስ ታኒ ዎበታነ ታኒ ዋዬስ አꬃ እምን፥ ድኤትድ ሃሆ በሲ ብዳይሳታ ሺሻና። 7 ዎበት አትድ ዳና መላ ኦꬃና፤ ድኤትድ ሃሆ በሲ ብዳይሳታ ምኖ ካዎተꬅ ከሳና። ሄ ዎደፐ ዶማዳ መርናዉ ታኒ ጎዳይ፥ ፅዮነ ደርያን ኤንታ ቦላ ካዎታና” ያጌስ።

8 ነኖ፥ ጎዳ አሳ ዎችያ የሩሳላመ ꬎቃ ግምብያዉ፥ ካሰ ነ ሃርያ ማታይነ የሩሳላመ ካዎተꬃ ዛዋይ ኡባይ ነዉ ስማና።

9 ሀእ ኔኒ ነ ቃላ ꬎቁ ኦꬃዳ ዋሰይነ እቀꬅ ኦይክዳ ማጫሳዳ ኡንኤተይ አይብሴ? ነዉ ካዎይ ባይና ግሾዬ? ዎይኮ ነና ዞርያ ꬋይዳ ግሾሴ? 10 ፅዮነ አሳዉ፥ እቀꬅ ኦይክዳ ማጫሳዳ ኦልሸ ዞከትተ። ህንተ ካታማፐ ከይድ ቃኤን ዳና፤ ያፐ ባብሎነ ባና። ግዶሽን፥ ያን ህንተ አታና፤ ጎዳይ ህንተና ህንተ ሞርከታ ኩሸፐ ዎዛና። 11 ሽን ሀእ ዳሮ ካዎተꬃት ነ ቦላ ሺቅድ፥ “የሩሳላመይ ቱኖ፤ ኑ አይፈይ ፅዮነ በኦ” ያጎሶና። 12 ሽን ኤንቲ ጎዳ ቆፋ ኤሮኮና፤ እያ ሀልቹዋ አኬክቦኮና። ካꬅ የታናዉ ዉዱማን ሺቀይሳዳ፥ ጎዳይ ኤንታ ሴራናዉ ሺሽስ።

13 ጎዳይ፥ “የሩሳላመ አሳዉ፥ ደንድድ፥ ህንተ ሞርከታ የꬍተ። ታኒ ህንተዉ ብራታ ካጨ እማና፤ ታኒ ህንተዉ ናሰ ብራታ ቶሆ እማና። ህንተ ዳሮ ካዎተꬃታ ትንቸረꬃና፤ ኤንቲ ገነን ሺሽዳ ኡባ ህንተ ጎዳስ ዱማያና፤ ኤንታ ሻሉዋ ህንተ ሳአ ኡባ ጎዳስ እማና” ያጌስ።