1 ታኒ፥ “ያይቆባ ኮቻታ ሀላቃቶነ እስራኤለ አሳ ካለይሳቶ፥ ስእተ! ህንተ ሱረ ፕርዳ ኤራናዉ በሰነዬ? 2 ህንተ ሎኦ እፅድ፥ ኢታ ዶሴታ። ታ አሳ ጋልባ ቃረታ፤ ኤንታ አሹዋ ኤንታ መቀꬃፈ ሻከታ። 3 ህንተ ታ አሳ አሹዋ ሜታ፤ ኤንታ ጋልባ ቃርድ፤ ኤንታ መቀꬃ ቃንፀረታ፤ አሾ ድስተን የጋናዉ ሙፀይሳዳ ኤንታ አሹዋ ሙፀረታ። 4 ኤንቲ ኢታ ኦሶ ኦꬅዳ ግሾ፥ ሄ ዎደ ኤንቲ ጎዳኮ ዋሳና፥ ሽን እ ኤንታዉ ዛረና፤ እ ባ ሶምኡዋ ሄ ዎደ ኤንታፈ ቆታና” ያጋስ።

5 ጎዳይ ዎርዶ ናበታኮ፥ “ህንተ ምያባ እምያ ዎደ፥ ‘ነዉ ሳእ ሳሮ’ ያጌታ፤ ሽን ህንተና ሙዞና እፅኮ እያ ቦላ ኦላ አዋጀታ። 6 ሄሳ ግሾ፥ ህንተዉ ጋላስ ቃማ ግዳና፤ ቆንጨꬅ በኤከታ። ሳእ ህንተዉ ꬉማና፤ ዛሪድ ሙሩነከታ፤ ናበታስ አዊ ዉላና፤ ጋላስ ꬉማና። 7 ቆንጨꬅ በኤይሳት ዬላታና፤ ሙሩነይሳት ካዉያና። ጎዳ ማታፐ ኤንታዉ ዛሮይ ባይና ግሾ፥ ኤንቲ ዬላትድ፥ ኡባይ ባንታ ዶና ኦይካና” ያጌስ።

8 ሽን ታኒ ያይቆባ ዘረꬃስ ኤንታ ናጋራ፥ እስራኤለ አሳስ ኤንታ ናጋራ ኦዳና መላ ዎልቃን፥ ጎዳ አያናን፥ ሱረ ፕርዳንነ ምኖተꬃን ኩማስ። 9 ህንተ ሱረ ፕርዳ እፀይሳትነ ሎኦባ ጌላይያ ያይቆባ ኮቻታ ሀላቃትነ እስራኤለ አሳ ካለይሳት ሀይሳ ስእተ። 10 ህንተ ፅዮነ ካታማ ሱꬅ ጉስድ ኬፀታ፤ የሩሳላመ ካታማ ጌላተꬃን ግምበታ። 11 እያ ሀላቃት ዎꬋፈን ፕርዶሶና፤ ካህነት ሚሸን ታማርሶሶና፤ ናበት ሚሸይ ባይና ሙሩኖኮና። ሽን ሄ ኡባ ኦꬅድ፥ “ጎዳይ ኑ ግዶን ደእያ ግሾ፥ ኑ ቦላ ኢታባይ ዬና” ያግድ እያ አማነቶሶና። 12 ሄሳ ግሾ፥ ህንተ ጋሶን ፅዮነ ካታማይ ጋደዳ ጎየታና፤ የሩሳላመ ካታማይ ላለꬃ ዶረ ግዳና። ፆሳ ኬꬃይ ኬፀትዳ ደረይ ዎራ ግዳና።