1 ዳርዮስ ካዎትዳ ናምአንꬆ ላይꬃን፥ ላፑንꬃ አጌናን ላታማነ እስንꬆ ጋላሳን፥ ጎዳ ቃላይ ናብያ ሀገ ባጋራ ሀይሳዳ ያግስ። 2 “ይሁዳ ሃርያ፥ ሳላትያላ ናኣ፥ ዛሩባበላስ፥ ካህነ ሀላቃ ግድዳ እዮሳደቃ ናኣ፥ እያሱስነ ድኤተꬃፈ ስምዳ አሳስ ሀይሳዳ ያጋዳ ኦዳ: 3 ሀ ፆሳ ኬꬃ ካሰ ቦንቾይ አይ መለኮ በእዳ አሳፐ ህንተ ግዶን አትዳ አስ ደኢ? ሀች ህንተ በእያ ዎደ አይ ዳኒ? ህንተ አይፍያ ስንꬃን ባይናባ ዳነኔ? 4 ግዶሽን፥ ዛሩባበላ፥ ሀእ ምና! ካህነ ሀላቃ ግድዳ እዮሳደቃ ናአዉ፥ እያሱ ምና! ቢታን ደእያ አሳዉ ህንተ ምንድ ኦꬅተ! ታኒ ህንተራ ደአይስ። ታኒ ኡባፈ ዎልቃማ ጎዳይ ሀይሳ ኦዳይስ። 5 ህንተ ግብፀፈ ከይያ ዎደ ታኒ ህንተራ ግዳና ጋዳ ጫቅዳይሳዳ ታ አያናይ ህንተራ ደእያ ግሾ ያዮፍተ!” ያግስ።

6 ኡባፈ ዎልቃማ ጎዳይ፥ “ታኒ ቃንꬃ ዎደን እስ ቶሆ ጉጃዳ ሳሎታነ ሳኣ፥ አባነ ቢታ ቃꬃና። 7 ካዎተꬃታ ኡባ ቃꬃዳ ካዎተꬃታ ኡባን ደእያ ሻሎይ ሃ ያና መላ ኦꬃና። ሀ ፆሳ ኬꬃ ቦንቾን ኩንꬃና። 8 ብራይ ታባ፤ ዎርቃይ ታባ። 9 ኮይሮ ቦንቹዋፈ ሀ ናምአንꬆ ፆሳ ኬꬃ ቦንቾይ አꬋና። ታኒ ኡባፈ ዎልቃማ ጎዳይ ሀ በሳን ሳሮተꬅ እማና ያጋዳ ኦዳ” ያግስ።

10 ዳርዮስ ካዎትዳ ናምአንꬆ ላይꬃን፥ ኡዱፉንꬆ አጌናን ላታማነ ኦይዳንꬆ ጋላሳን፥ ጎዳ ቃላይ ናብያ ሀገ ባጋራ ሀይሳዳ ያግድ ይስ። 11 ኡባፈ ዎልቃማ ጎዳይ፥ “ህገይ ዎይግያኮ ኤራናዉ ካህነታ ኦይቻ። 12 ‘እስ አስ ጌሻ አሹዋ ባ አፍላ ማጫራን ቃችድ ኤክ ብሽን፥ ሄ አፍላ ማጫራይ፥ ኡይꬃ ዎይኮ ዎፅያ ዎይኮ ዎይንያነ ዛይትያ ዎይኮ ሀራ አይ ቆሞ ካꬅ ቦችኮ፥ ሄ ቦሸትዳ ካꬃይ ጌሽ ግዳናዉ ዳንዳኢ?’ ያጋዳ ኦይቻ” ያግስ።

ካህነይ ዛሪድ፥ “ጌሽ ግዳናዉ ዳንዳኤና” ያግስ።

13 ሀገይ ዛሪድ፥ “አሀ ቦችድ ቱንዳ እስ አስ ሀይሳታፐ እስ ቆሞ ካꬃ ቦችኮ ሄ ካꬃይ ቱና ግዳኔ?” ያግድ ኦይችስ።

ካህነይ፥ “ኤ ቱናና” ያግድ ዛርስ።

14 ሀገይ ዛሪድ፥ “ሀ አሳይነ ሀ ካዎተꬃይ ታ ስንꬃን ሄሳ መላ። ኤንቲ ኦꬅያ ኦሶይነ ኤንቲ እምያ እሞታይ ኡባይ ሄሳ መላ ቱና” ያጌስ ጎዳይ። 15 “ሀችፈ ዶምድ፥ ህንተ ቦላ ጋክዳባ አኬክተ! ጎዳ ኬꬃ ኬፆ ዶማናፐ ካሰ፥ 16 ህንተ ናምኡ ኩንታለ ካꬅ ኤካና ግድ፥ ካꬅ ዎꬅዳ በሳ ብደታ፥ ሽን እስ ኩንታለ ፃላላ ደምደታ። እስ ፄቱ ልትሮ ዎይነ ኤካናዉ ዎይነ ጉምእያ ኦላ ብደታ፥ ሽን ህንተ ኦይታሙ ልትሮ ፃላላ ዎይነ ደምደታ። 17 ታኒ ህንተ ኩሸ ኦሶ ኡባ ቦላ መልስያ ጫርኮ፥ ካꬃ ሀርገነ ሻች የዳዳ ꬋይሳስ። ሽን ህንተ ሀ ኡባን ታኮ ስምበከታ” ያጌስ ጎዳይ።

18 “ሀች ጋላሳፐ፥ ሀ ኡዱፉንꬆ አጌናን ላታማነ ኦይዳንꬆ ጋላሳፐ ዶምድ አነ አኬክተ። ጎዳ ኬꬃ ባሶይ ባሰትዳ ጋላሳፐ ዶምድ ቆፕተ። 19 ሀእ ዘረꬃስ ሀንያ ካꬅ ህንተ ሻለን ꬋይኮ፥ ዎይነይ፥ ባላሰይ፥ ኦሮማነይነ ሻማሆይ ሀች ጋካናዉ አይፎና እፅኮካ፥ ሀችፈ ዶማዳ ታኒ ህንተና አንጃና” ያጌስ ጎዳይ።

20 ሄ አጌናን ላታማነ ኦይዳንꬆ ጋላሳን ጎዳ ቃላይ ናምአንꬆ ሀገኮ ሀይሳዳ ያግስ። 21 ይሁዳ ሃርያ ዛሩባበላስ ሀይሳዳ ያጋዳ ኦዳ: “ታኒ ሳሎታነ ሳኣ ቃꬃና። 22 ካዎተꬃታ አራታ ሽራ የጋና፤ ኤንታ ዎልቃ ꬋይሳና። ፓራ ጋረታ ኤንታ ላገይሳታራ ሽራ የጋና፤ ኤንታ ፓራት ዉራና፤ ፓራ አሳት ዎሉ ዎꬋና። 23 ‘ታ አይልያዉ፥ ሳላትያላ ናአ ዛሩባበላ፥ ታኒ ኡባፈ ዎልቃማ ጎዳይ ነና ሄ ጋላስ ኤካና። ታኒ ነና ታ ምግዶ ማታመ መላ ኦꬃና። ታኒ ነና ዶራስ’ ያጌስ” ያጋዳ ኦዳ።