1 ካዎይ ዳርዮስ ካዎትዳ ናምአንꬆ ላይꬃን፥ ኡሱፑንꬆ አጌናን ኮይሮ ጋላሳን፥ ጎዳ ቃላይ ናብያ ሀገ ባጋራ ይሁዳ ቢታ ሃርያ ሳላትያላ ናኣ፥ ዛሩባበላኮነ ካህነ ሀላቃ ግድዳ እዮሳደቃ ናኣ፥ እያሱኮ ሀይሳዳ ያግድ ይስ። 2 ኡባፈ ዎልቃማ ጎዳይ፥ “ሀ አሳይ ጎዳ ኬꬃ ዛሪድ ኬፅያ ዎደይ ቡሮ ጋክቤና” ያጌስ።

3 ያትን፥ ጎዳ ቃላይ ናብያ ሀገ ባጋራ ሀይሳዳ ያግስ: 4 “ታ አሳዉ፥ ታ ኬꬃይ ላለትድ ኡትን፥ ህንተ፥ ህንተ አሌቀትዳ ኬꬃታን ዳናዉ ሀይስ ህንተዉ ዎዴ?” ያግስ።

5 ሄሳ ግሾ፥ ኡባፈ ዎልቃማ ጎዳይ፥ “አነ ህንተ ህንተና ጋክሸ ደእያባ ቆፕተ። 6 ህንተ ዳሮ ዘርደታ፥ ሽን ጉꬁ ሺሽደታ። ሜታ፥ ሽን ካለከታ፤ ኡዬታ፥ ሽን አለከታ። ማኤታ፥ ሽን ህንተና ሆኤና። ዳሞዘ ኤኬታ፥ ሽን ፔꬃ ኪሰን የግያዳ ጮ ꬋዬስ” ያጌስ።

7 ኡባፈ ዎልቃማ ጎዳይ፥ “አነ ህንተ ህንተና ጋክሸ ደእያባ ቆፕተ። 8 ህዛ ደርያ ቦላ ከይድ፥ ምꬅ ቃንፅድ ኤህተ፤ ታኒ እያን ኡፋይታና መላነ ቦንቸታና መላ ፆሳ ኬꬃ ዛሪድ ኬፅተ። 9 ህንተ ዳሮ ካꬅ ሺሻናዉ ቆፕደታ፥ ሽን ጉꬃ ግድስ። እያ ህንተ ሶ ገልስያ ዎደ ታ ፑንን ꬋይ አግስ። ሀይስ አይብስ ሀንዴ? ታኒ ሀይሳ ኦꬅዳይ ህንተ ኡባይ ህንተ ኬꬃ ኬꬃ ኬፅሽን፥ ታ ኬꬃይ ላለትድ አትዳ ግሾሳ። 10 ሄሳ ግሾ፥ ሳሎይ እራ ድግስ፥ ሳእ ካꬅ እሞና እፅስ። 11 ታኒ ቢታነ ዙማ ቦላ፥ ካꬃ ቦላ፥ ዎይንያነ ዛይትያ ቦላ፥ ቢት ዶልስያባ ኡባ ቦላ፥ አሳነ መህያ ቦላነ ህንተ ዳቡራ ኡባ ቦላ ኮሻ ፄጋስ” ያጌስ። 12 ሀይሳፈ ጉየ፥ ሳላትያላ ናአይ ዛሩባበል፥ ካህነ ሀላቃ ግድዳ እዮሳደቃ ናአይ፥ እያሱይነ ድኤተꬃፈ ስምዳ አሳ ኡባይ፥ ጎዳ ባንታ ፆሳ ቃላስነ ጎዳይ ኤንታ ፆሳይ ኪትዳ ናብያ ሀገ ቃላስ፥ ኪተትዶሶና፤ አሳይ ጎዳ ያይዶሶና። 13 ያትን፥ ጎዳይ ኪትዳ ሀገይ አሳኮ፥ “ ‘ታኒ ህንተራ ደአይስ’ ያጌስ” ያግድ ጎዳ ኪታ አሳስ ኦድስ። 14 ያትን፥ ጎዳይ፥ ይሁዳ ቢታ ሃርያ ሳላትያላ ናኣ፥ ዛሩባበላ፥ ካህነ ሀላቃ ግድዳ እዮሳደቃ ናኣ፥ እያሱነ ድኤተꬃፈ ስምዳ አሳ ኡባ ደንꬅስ። ኤንቲ ኡባፈ ዎልቃማ ጎዳ፥ ባንታ ፆሳ ኬꬃ ኬፆ ዶምዶሶና። 15 ሀይስ ሀንዳይ ካዎይ ዳርዮስ ካዎትዳ ናምአንꬆ ላይꬃን፥ ኡሱፑንꬆ አጌናን ላታማነ ኦይዳንꬆ ጋላሳና።