1 ማካላንቹዋስ፥ ቱንዳይሳስነ ባ ደርያ ኡንኤꬅዳ የሩሳላመ ካታማ አየ! 2 እ ኦናካ ኪተተና፤ ሴርን ስመና፤ ጎዳን አማነተና፤ ባ ፆሳኮ ሺቀና። 3 እያ ሀላቃት ጉድያ ጋሞ መላ፤ እያ ዳይናት ደምዳባ ዎንቶስ አሾና ኡባ ምድ ኦንግያ ኦማርሳ ሱꬉመ መላ። 4 እያ ናበት ኦቶራንቾነ ገናንቾ፤ እያ ካህነት ጌሻ ቱንሰይሳታ፤ ኤንቲ ጎዳ ህግያ ምርቆሶና። 5 ሽን እያ ግዶን ደእያ ጎዳይ ፅሎ፤ እ ባላ ኦና። ዎንታ ዎንታ እ ፅሎ ፕርዴስ፤ ጋላስ ጋላስ ሄሳ አገና። ግዶሽን፥ ያን ደእያ ጌላይ ዬላ ኤረና።

6 “ታኒ ካዎተꬃታ ꬋይሳስ፤ ኤንታ ግምበታ ላላስ። ኤንታ ካታማታ እስ ዶና ባይሳ ቢታ ኦꬃስ፤ ኤንታ ኦገታ አስ ካንꬆና ባዞ ኦꬃስ። 7 ታኒ ሀይሳ ኡባ ኦꬃዳ፥ ‘ታ አሳይ ታና ቦንቻና፤ ታ ሴራ ኤካና፤ ታ ኪትዳባ ዶገና’ ያጋስ። ሽን ኤንቲ ካሰፐ አꬍድ ኢትዶሶና፤ ባንታ ኦሱዋን ቱንዶሶና” ያጌስ ጎዳይ።

8 “አነ ታኒ ፕርድያ ጋላሳይ ጋካናዉ ጉꬁ ናግተ። ታኒ ደረታነ ካዎተꬃታ ሺሻናዉ ቆፋ ቃቻስ፤ ታ ሀንቁዋ ሱላ ኤንታ ቦላ ጉሳና፤ ቢታይ ኩመꬅ ታ ሀንቁዋ ታማን ፁገታና።

9 “ሄ ዎደ አሳ ኡባይ ጌሻ ኦዳ ኦደታና መላ ኦꬃና። ኤንቲ ኡባይ ጎዳ ሱንꬃ ፄጋና፤ እስፈ እያዉ ጎይናና። 10 ላለትዳ አሳይ፥ ታና ቱማ ጎይነይሳት፥ ቶጰ ሻፋታፐ ሄፍንꬃን ደኤይሳት ታዉ እሞታ ኤሀና። 11 ኦቶረይሳታነ ጬቀተይሳታ ታ ህንተ ግዶፈ ꬋይስያ ግሾ፥ ሄ ዎደ ህንተ ታ ቦላ ኦꬅዳ ኦሱዋ ጋሶን ዬላተከታ። ህዛፐ ጉየ ህንተ ታ ጌሻ ዙማ ቦላ ኦቶርተከታ። 12 ታኒ ህንተ ግዶፈ ባንታና ካዉሸይሳታነ አዳታ አሻና፤ ኤንቲ ጎዳ ሱንꬃን አማነታና። 13 እስራኤለ አሳፐ አትዳይሳት ኢታባ ኦꬆኮና፤ ዎርዶ ኦደቶኮና፤ ኤንታ እንፃርሳን ጭሞይ በንተና። ሄሳ ግሾ፥ ኤንቲ ምድ ካልድ ሳሮን ዳና፤ ኤንታ ያሽስያባይ ባዋ” ያጌስ።