1 ህንተኖ፥ ዬል ባይና አሳዉ፥ አነ እስፈ ሺቅተ! 2 ጫርኮይ ፑንድ ኤፍያ ባናዳ ሀኖና ደእሽን፥ ያሽያ ጎዳ ሀንቆይ ህንተ ቦላ ዎꬎና ደእሽን፥ ጎዳ ሀንቆ ሱላ ጋላሳይ ህንተ ቦላ ዮና ደእሽን ጎዳኮ ስምተ። 3 ህንተኖ፥ ቢታን ደእያ አሽከቶ፥ እያ ኪታ ናግያ ኡባቶ፥ ጎዳ ኮይተ፤ ፅሎተꬃ ኮይተ፤ አሽከተꬅ ኮይተ። ኦን ኤር ጎዳ ሀንቆ ጋላስ ህንተ አቶና አገከታ።

4 ጋዛ ካታማይ ኦና ግዳና፤ አስቃሎና ካታማይ ባይሳ ግዳና። አሽዶዳ ካታማ አሳይ ሴታ ጋላስ ጎደታና፤ ኤቅሮና ካታማይ ሾደታና። 5 ህንተኖ፥ አባ ጋፃን ደእያ ከልታወቶ፥ ህንተና አየ! ነኖ፥ ፍልስፄመት ደእያ ካናነ ቢታዉ፥ ጎዳ ፕርዳይ ነ ቦላ ዬስ። ታኒ ነና ꬋይሳና፤ እስ አስካ አተና። 6 አባ ጋፃን ደእያ ህንተ ቢታይ መሄ ሄመትያ በሲ፥ ሄንꬃንቾት ደእያ በስነ መሄ ዳራ ግዳና። 7 ይሁዳ አሳፐ አትዳይሳት አባ ጋፃን ደእያ በሳ ላታና፤ ኤንቲ ያን ሄማና። ሳአይ ቃምያ ዎደ ኤንቲ አስቃሎና ካታማን ደእያ ኬꬃታን አቃና። ጎዳይ ኤንታ ፆሳይ ኤንታባ ቆፓና፤ እ ኤንታ ዛሪድ ናንሳና።

8 ኡባፈ ዎልቃማ ጎዳይ፥ እስራኤለ ፆሳይ፥ “ታኒ ሞአበ ቶሽያነ አሞነ ጫሻ ስአስ። ኤንቲ ታ አሳ ዋትድ ቶችዳኮነ ኤንታ ቢታ ኤካናዉ ዋትድ ማንድዳኮ ታ ኤራይስ። 9 ሄሳ ግሾ፥ ታ ደኦ ሱንꬃን ጫቃይስ፤ ሞአበይ ሶዶመዳ ሀናና፤ አሞነይ ጋሞራዳ ሀናና። ኤንቲ መርናዉ ማፅነ ኦላነ አጉንꬅ ማእዳ ባዞ ግዳና። ታ አሳፐ አትዳይሳት ኤንታ ሻሉዋ ቦንቃና፤ ኤንታ ቢታ ላታና” ያጌስ።

10 ኤንቲ ኡባፈ ዎልቃማ ጎዳ አሳ ቶችዳ ግሾነ ጫይዳ ግሾ፥ ኤንታ ቦላ መቶይ ጋካና። 11 ኤንታ ቢታን ደእያ ፆሳታ እ ꬋይስያ ዎደ ጎዳይ ኤንታና ያሽሳና። ሳአን ደእያ ካዎተꬃታን ደእያ አሳ ኡባይ ባ ደእያ በሳን እያ ጎይናና።

12 ህንተኖ፥ ቶጰ አሳዉ፥ ህንተ ታ ማሻን ሀይቃና።

13 እ ባ ኩሽያ ፑደሀ ባጋ የድድ አሶረ ቢታ ꬋይሳና። ቃስ ናናወ ካታማ መላ ባዞዳ ባይሳ በሲ ኦꬃና። 14 መሄ ዉደይነ ቢታን ደእያ ዶአት ኡባይ ያን ሄመታና፤ ጉቶይነ ቁፃረይ ላለትዳ ግምብያ ግዶን ዳና። ኤንታ ቃላይ ማስኮተራነ ፐንግያራ ስኤታና፤ ዝጋ ቱቀት ካሎታና። 15 “ታፐ አትሽን፥ ሀር ባዋ” ያግድ ኦቶርትድ ደእዳ ካታማይ ሀእ ዋንድ ዶአት አቅያ በሲ ግድዴ? እያ ማታራ አꬍያ ኡባይ ባንታ ኩሽያ ባቅሸ፥ “ፖራ!” ጋና።