10
1 ሙሰ ህገይ ያናዉ ደእያ ሎኦባታስ ኩያፐ አትሽን፥ ባ ሁጰን ዋና ግደና። ሄሳ ግሾ፥ ላይꬃን ላይꬃን ፓጨይ ባይና ያርሸትያ ያርሾይ ጎይናናዉ ሺቅያ አሳ ፖሎ ኦꬃናዉ ዳንዳኤና። 2 ህገይ ኤንታ ፖሎ ኦꬃናዉ ዳንዳእዳባ ግድያኮ ኤንቲ ያርሾ ያርሸይሳ አጋናሽን። ቃስ ጎይናናዉ ሺቅያ አሳይ ባንታ ናጋራፐ ጌያና፤ ኤንታ ካሀይካ ኤንታና ባላ ግድ ሞተና። 3 ሽን ሄ ያርሾት ላይꬃን ላይꬃን ናጋራ ቆፍሶሶና። 4 አይስ ጊኮ፥ ኮርማ ሱꬅነ ዴሻ ሱꬅ ናጋራ ድጋናዉ ዳንዳኤና።
5 ሄሳ ግሾ፥ ክርስቶስ ሀ አላምያ ይዳ ዎደ ሀይሳዳ ያግስ:ማዝ 40:6-8.
“ኔኒ ያርሾነ እሞ ኮያባካ፤
ሽን ታዉ አሾ ጊግሳዳሳ።
6 ኔኒ ፁሳ ያርሾንነ
ናጋራ ያርሾን ኡፋይታባካ።
7 ሄ ዎደ፥ ‘ታ ግሾ ማፃፋን ፃፈትዳይሳዳ፥
ጎዳዉ፥ ታኒ ነ ሸንያ ኦꬃናዉ ያስ’ ያጋስ”
ያግስ። 8 ያርሾይ ያርሸታና መላ ህገይ ኪትያባ ግድኮካ፥ ክርስቶስ ኮይሮ፥ “ኔኒ ያርሾነ እሞ፥ ፁሳ ያርሾነ ናጋራ ያርሾ ኮያባካ፤ ኤንታን ኡፋይታባካ” ያግስ። 9 ካልድካ እ፥ “ጎዳዉ፥ ሄኮ ታኒ ነ ሸንያ ኦꬃናዉ ያስ” ያግስ። ሄሳ ግሾ፥ ክርስቶስ ናምአንꬁዋ ኤሳናዉ ኮይሮይሳ ሻርስ። 10 የሱስ ክርስቶሲ ፆሳ ሸንያ ኦꬅድ፥ ዛረꬆና ኦገን እስ ቶሆ ባ አሹዋ ያርሽዳ ግሾ ኑኒ ጌይዳ።
11 ካህነ ኡባይ፥ ናጋራ ድጋናዉ ዳንዳኦና ሄ ያርሾታ ጋላስ ጋላስ ያርሽሸ ኤቅድ ባ ኦሱዋ ኦꬄስ።ከሳ 29:38. 12 ሽን ክርስቶስ ኡባ ዎደስ ግድያ እስ ናጋራ ያርሹዋ ያርሽድ፥ ፆሳፈ ኡሻቻ ባጋን ኡትስ። ማዝ 110:1. 13 ሄ ዎድያፐ ዶምድ እያ ሞርከት እያ ቶሆይ የꬍያባ ኦꬃና ጋካናዉ ናጌስ። 14 እ ዛረꬆና ኦገን እስ ቶሆ ባና ያርሽዳ ያርሹዋን ጌሻታ መርናዉ ፖሎ ኦꬅስ።
15 ቃስ ጌሻ አያናይ ኑስ ሀይሳ ማርካቴስ። ኮይሮ ሀይሳዳ ያግስ፦
16 “ሄ ጋላሳታፐ ጉየ፥
ታኒ ኤንታራ ጫቅያ ጫቆይ ሀይሳ፦
ታኒ ታ ህግያ ኤንታ ቆፋን ዎꬃና፤
ኤንታ ዎዛናን ፃፋና”
ያጌስ።ኤርም 31:33. 17 ካልድካ፥
“ታኒ ኤንታ ናጋራነ
ኤንታ ኢታ ኦሱዋ ዛራ ቆፕከ”
ያጌስ።ኤርም 31:34. 18 ህዛ፥ ናጋር አቶ ጌተትዳፐ ጉየ ናጋራስ ያርሸትያ ያርሾ ኮሸና።
አነ ፆሳኮ ሺቆስ
19 ህዛ፥ ታ እሻቶ፥ ኑኒ የሱሳ ሱꬃ ባጋራ ኡባፈ ጌሻ በሳ ገላናዉ ኑስ ምኖተꬅ ደኤስ። 20 ኑ ገላናይ ክርስቶስ ባ ማጋራጁዋ፥ ሄስካ ባ አሹዋ ባጋራ ኑስ ዶይዳ ኦራꬅነ ደኦ ግድዳ ኦግያና። 21 ኑስ ፆሳ ኬꬃ ቦላ ሹመትዳ ግታ ካህነ ሀላቃይ ደኤስ። 22 ኑኒ ኢታ ካሀፐ ጌያናዉ ኑ ዎዛና ዉርፀትድ፥ ኑ አሳተꬃ ፅሎ ሃꬃን ሜጨትድ፥ ሱረ ዎዛናንነ ፖሎ አማኖን ፆሳኮ ሺቆስ። ሌወ 8:30፤ ህዝ 36:25.
23 ኑስ ኡፋይሳ ቃላ እምዳ ፆሳይ አማነትዳይሳ ግድያ ግሾ ኑ ማርካትያ ኡፋይሳ ኡሻች ሀድርስ ጎና ምንꬅድ ኦይኮስ። 24 እሶይ እሱዋ ሲቆስነ ሎኦ ኦሶስ ዋት ደንꬃነኮ አነ ቆፖስ። 25 እሶት እሶት ሜዘ ኦꬅድ ሺቀይሳ አግዳይሳዳ ኑኒ እስፈ ሺቀይሳ አጎኮ። ሽን ጎዳ ጋላሳይ ማታትዳይሳ ህንተ በእያ ግሾ ሄሳ ካሰይሳፈ አꬅድ ኦꬅተ።
26 ኑኒ ቱማ ኤራተꬃ ኤክዳፐ ጉየ ኤርሸ ናጋራ ኦꬅኮ፥ ህዛፐ ኑ ናጋራ ግሾ ያርሸታና ያርሾይ ባዋ። 27 ሽን ህዛ አትዳይ ያሽያ ፕርዳነ ፆሳ ሞርከታ ፁጋናዉ ጊግዳ ዎልቃማ ታማ። እሳ 26:11. 28 ሙሰ ህግያ ኪተቶና እፅዳ ኦንካ ናምኡ ዎይኮ ሄꬑ አስ እያ ቦላ ማርካትኮ ቃይ ባይናሽን ሀይቄስ። ዛረ 17:6፤ 19:15. 29 ያትን፥ ፆሳ ናኣ ካꬍዳ ኡራይ፥ ባና ጌሽዳ ፆሳ ጫቆ ሱꬃ ቱናባዳ ቆፕዳ ኡራይ፥ ቃስ አꬎ ኬሀተꬃ አያና ጫይዳ ኡራይ፥ አይ መላ ኢታ ፕርዳ ኤካናዉ በሲያኮ አነ ቆፕተ።
30 ህዛ፥ “ሀሎ ከሶይ ታባ፥ ታ ኩሸ ዛራና” ግዳይሳ ኑ ኤሮስ። ቃስካ፥ “ጎዳይ ባ አሳ ፕርዳና” ያግስ። 31 ደኦ ፆሳ ኩሸን ኩንደꬅ ዳሮ ያሼስ።
32 ህንተዉ ፆሳ ፖኦይ ፖእዳፐ ጉየ ህንተ ዳሮ ዋየን፥ ግታ ባፀን ገንጭዳ በን ዎድያ ቆፕተ። 33 እስ እስ ቶሆ ህንተ አሳ ስንꬃን ጫየትደታ፤ ጎደትደታ፤ እስ እስ ቶሆ ሄሳ መላ ዋየይ ጋክዳ አሳራ እስፈ ዋይደታ። 34 ቃሾን ደእያ አሳስካ ቃትደታ። ህንተዉ ሎኦነ ꬋዮና ሻሎይ ሳሎን ደኤይሳ ህንተ ኤርዳ ግሾ ህንተ ሻሎይ ቦንቀትያ ዎደ ኡፋይሳን ዳንዳእደታ።
35 ሄሳ ግሾ፥ ግታ ዎይቶይ ደእያ ህንተ ምኖተꬃ የጎፍተ። 36 ፆሳ ሸንያ ፖልድ፥ እ ህንተዉ እማና ግዳ ኡፋይሳ ኤካና ጋካናዉ ገንጫናዉ ኮሼስ። 37 ህዛ፥ ጌሻ ማፃፋን፥
“እ፥ ያና ግዳይስ ያና፤ ጋምኤና። እብራ 2:3-4.
38 ሽን ታ ፅሎይ፥ ታናን አማነትድ ዳና፤
ኦንካ ጉየ ስምኮ ታና ኡፋይሰና”
ያጌስ። 39 ኑኒ አማንድ አትያ አሳ ባጋፈ አትሽን፥ ጉየ ስሚድ ꬋይያ አሳ ባጋ ግዶኮ።