1 ኮይሮ ጫቁዋስ ፆሳ ጎይንያ ዎጋይነ ሳአ ፆሳ ኬꬃይ ደኤስ። 2 ዱንካነይ ኤቅስ። እያን ፆምፐ ዎꬅያ ኮጫይ፥ ፃርጴዛይነ ጎዳ ስንꬃን ዎꬅያ ኡይꬃይ ደኤስ፤ ሄ በሳይ ጌሻ በሳ ጌተቴስ። ከሳ 26:1-30፤ 25:31-40. 3 ናምአንꬆ ማጋራጁዋፈ ጉየ ባጋራ ደእያ በሳይ ኡባፈ ጌሻ በሳ ጌተቴስ። ከሳ 26:31-33. 4 እያ ግዶን እፃነ ጩይስያ ዎርቃ ሳፅነይነ ዎርቃን ሜሸትዳ ጫቆ ታቦተይ ደኤስ። ሄ ጫቆ ታቦትያን ማናይ ደእያ ዎርቃ ፃሮይ፥ አጭዳ አሮና ፃምአይነ ሙሰ ህገይ ፃፈትዳ ናምኡ ሎቸ ሹቻት ደኦሶና። ከሳ 30:1-6፤ 25:10-16፤ 16:33፤ ታይቦ 17:8-10፤ ከሳ 25:16፤ ዛረ 10:3-5. 5 ሄ ታቦትያፐ ቦላ ባጋራ አቶተꬃ ካማ ባንታ ቀፍያን ገንꬅያ ቦንቾ ክሩበት ደኦሶና። ሽን ሀእ ሄ ኡባ ቆንጭስድ ኦዳናዉ ዳንዳኦኮ። ከሳ 25:18-22.

6 ሀ ኡባይ ሀይሳዳ ጊግዳፐ ጉየ፥ ካህነት ኡባ ዎደ ባንታ ኦሱዋ ኦꬃናዉ ዱንካንያስ ኮይሮ ክፍልያ ገሎሶና። ታይቦ 18:2-6. 7 ሽን ካህነ ሀላቃ ፃላል ዱንካንያስ ናምአንꬆ ክፍልያ ላይꬃፈ እስ ቶሆ ገሌስ። እ ያ ገልሸ ባ ናጋራ ግሾነ አሳይ ኤሮና ኦꬅዳ ናጋራ ግሾ ሱꬃ ያርሾ ኤኮና ገለና። ሌወ 16:2-34. 8 ኮይሮ ዱንካነይ ኤቅድ ደእሽን፥ ኡባፈ ጌሻ በሳ ኤፍያ ኦገይ ቡሮ ዶየትቦናይሳ ጌሻ አያናይ ሄሳን ኤርሴስ።

9 ሄስ ሀ ዎድያስ ሌምሶ፤ ፆሳስ እመትያ እሞይነ ያርሾይ ጎይንያ ኡራ ካሀ ጌሻናዉ ዳንዳኦናይሳ ሀይስ በሴስ። 10 ሄሳት ሙሳባ፥ ኡሻባነ ዱማ ዱማ ሜቻ ዎጋታ ኦደይሳታ። ኤንቲ ኦራꬃ ዎጋይ ያና ጋካናዉ ኦሰትያ ካረ ባጋ ዎጋታ።

11 ሽን ክርስቶስ ሀእ ኑ ደምዳ ሎኦባታስ ካህነ ሀላቃ ግድድ ይስ። እ ገልዳ ዱንካነይ ግታነ ፖሎ ግድዳይሳ። ሄ ዱንካነይ አሳ ኩሸን ኦሰትቤና ቃስ ሀ አላምያባ ግደና። 12 ክርስቶስ ኡባፈ ጌሻ በሳ ገልያ ዎደ ዴሻ ሱꬅነ ማር ሱꬅ ኤክድ ገልቤና። ሽን መርና አቶተꬃ እማናዉ ባ ሱꬃ ኤክድ ዛረꬆና ኦገን እስ ቶሆ ገልስ። 13 ዴሻ ሱꬃይነ ኮርማ ሱꬃይ፥ ፁገትዳ ኡሳ ብዶይ፥ ቱንዳ አሳ ቦላ ꬋርጨትድ ኤንታና ጌሽያባ ግድኮ፥ ሌወ 16:15-16፤ ታይቦ 19:9፥ 17-19. 14 መርና ጌሻ አያና ባጋራ ቦረይ ባይና ያርሾ ኦꬅድ፥ ፆሳስ ባና እምዳ ክርስቶሳ ሱꬃይ፥ ደኦ ፆሳ ጎይናና መላ ሀይቆ ካለꬅያ ኦሱዋፐ ኑ ካሀ ዋት አꬅድ ጌሸኔ?

15 ሄሳ ግሾ፥ ፄገትዳይሳት ፆሳይ እምዳ መርና ላታ ኤካና መላ ክርስቶስ ኦራꬃ ጫቁዋስ ግዶ ግድድ ስገይሳ ግድስ። ሄስ ሀንዳይ አሳይ ኮይሮ ጫቁዋፐ ጋርሳን ደእያ ዎደ ኦꬅዳ ናጋራፐ ኤንታና ዎዛናዉ እ ሀይቅዳይሳና።

16 ህዛ፥ ኬከይ ደእኮ፥ ሄ ኬክዳ ኡራ ሀይቆይ ኤረታናዉ ኮሼስ። 17 ኬክዳ ኡራይ ሀይቅኮ እያ ኬከይ ምኔስ። ኬክዳ ኡራይ ሀይቆና አትኮ እያ ኬከይ ኦና።

18 ሀር አቶሽን፥ ኮይሮ ጫቆይካ ሱꬅ ባይና ምንቤና። 19 ሙሰይ ህገ ኪታ ኡባ አሳስ ኦድዳፐ ጉየ ማራ ሱꬅነ ዴሻ ሱꬅ ሃꬃራ ዋላክድ፥ ዞኦ ዶርሳ እክሰነ ህሶጰ ውርጮ ኤክድ፥ ማፃፋ ቦላነ አሳ ቦላ ዉርፅስ። ከሳ 24:6-8. 20 ሙሰይ አሳኮ፥ “ህንተ ናጋና መላ ፆሳይ ኪትዳ ሱꬃ ጫቆይ ሀይሳ” ያግስ። 21 ሄሳዳካ፥ ዱንካንያ ቦላነ ኦꬅያ ሚሸ ኡባ ቦላ ሱꬃ ዉርፅስ። ሌወ 8:15. 22 ቱማካ ህገይ ገይሳዳ ጉꬃባታፐ አትሽን፥ ኡባባይ ሱꬃን ጌዬስ። ሱꬅ ጉኮናሽን አቶተꬅ ባዋ። ሌወ 17:11.

23 ሳሉዋባስ ሌምሶ ግድዳይሳት ኡባይ መሄ ያርሾን ጌያናዉ ኮሼስ። ሽን ሳሎባት ባንታ ሁጰን ሄሳፈ አꬍያ ያርሹዋን ጌያናዉ ኮሼስ።

24 ክርስቶስ ቱማ ፆሳ ኬꬃስ ሌምሶ ግድዳ፥ አሳ ኩሸን ኦሰትዳ ኡባፈ ጌሻ በሳ ገልቤና። ሽን እ ሀእ ኑ ግሾ፥ ፆሳ ስንꬃን በንታናዉ ሳሉዋ ገልስ። 25 ካህነ ሀላቃይ ላይꬃን ላይꬃን ባ ሱꬅ ግዶናይሳ ኤክድ፥ ኡባፈ ጌሻ በሳ ገሌስ። ሽን ክርስቶስ ዳሮ ቶሆ ባና ያርሻናዉ ሳሎ ገልቤና። 26 ሄሳዳ ሀንዳባ ግድያኮ፥ ክርስቶስ አላመይ መቶሳፐ ዶምድ ዳሮ ቶሆ ዋየታናዉ ኮሼስ። ሽን ሀእ ዎድያ ዉርሰꬃን ናጋራ ድጋናዉ ባና ያርሽድ ዛረꬆና ኦገን እስ ቶሆ በንትስ።

27 አስ ኡባይ እስ ቶሆ ሀይቃናዉ ሄሳፈ ጉየ ፕርደታናዉ በሴስ። 28 ሄሳዳካ፥ ክርስቶስ ዳሮ አሳ ናጋራ ድጋናዉ እስ ቶሆ ያርሸትስ። ሽን እ ናጋራ ቶካናዉ ግዶናሽን፥ ባና ናገይሳታ አሻናዉ ናምአንꬆ ቆንጫና። እሳ 53:12.