8
የሱሲ ኑ ካህነ ሀላቃ
1 ኑኒ ሃሳያ ግታባይ ሄሳ። ሳሉዋን ኡባፈ ቦላ ፆሳ አራታፐ ኡሻቻ ባጋን ኡትዳ ሀይሳ መላ ካህነ ሀላቃይ ኑስ ደኤስ። ማዝ 110:1. 2 እ አሳን ግዶናሽን፥ ጎዳን ኤቅዳ ቱማ ዱንካንያን ፆሳ ኬꬃን ኦꬄስ።
3 ካህነ ሀላቃ ኡባይ እሞነ ያርሾ ያርሻናዉ ሹመቴስ። ሄሳ ግሾ፥ ሀ ካህነይ ያርሻናዉ እስባይ ዳናዉ ኮሼስ። 4 ህገይ ኪተይሳዳ ያርሽያ ካህነት ደእያ ግሾ፥ ክርስቶስ ሳአን ደእያባ ግድያኮ እ ካህነ ግደና። 5 ኤንቲ ካህነተꬃን ኦꬅያ ዱንካነይ ሳሎን ደኤይሳስ ሌምሶነ ኩያ። ሙሰይ ዱንካንያ ኤስያ ዎደ ፆሳይ እያኮ፥ “ታኒ ነና ዙማ ቦላ በስዳ ሌምሱዋ ካላዳ ኦꬃ” ያግስ። ታይቦ 18:21. 6 ሽን የሱሲ ግዶ ግድድ ስገꬅያ ጫቆይ፥ ኮይሮ ጫቁዋፐ አይሳዳ እ ኤክዳ ኦሶይ ኤንታይሳፈ አꬌስ። ሄስ ኤቅዳይ አꬍያ ጫቆ ቃላና።
7 ኮይሮ ጫቁዋን ባል ባይናባ ግድያኮ ናምአንꬆ ጫቆ ኮሸና። 8 ሽን ጎዳይ ኤንታ ቦርድ፥ ሀይሳዳ ያግስ፦
“ታኒ እስራኤለ አሳራነ ይሁዳ አሳራ
ኦራꬃ ጫቆ ጫቅያ ዎደይ ያና። ኤርም 31:31-34.
9 ሄ ጫቆይ ታ ኤንታ አዋታ ግብፀ ቢታፈ ኩሽያ ኦይካዳ፥
ጎቻ ከስዳ ዎደ ኤንታራ ጫቅዳ ጫቁዋ መላ ግደና።
ኤንቲ ታ ጫቁዋን አማነትቦና ግሾ፥
ታኒ ኤንታ የጋ አጋስ ያጌስ ጎዳይ።
10 ሽን ህዛፐ ጉየ እስራኤለ አሳራ
ታ ጫቃና ጫቆይ ሀይሳ ያጌስ ጎዳይ።
ታኒ ታ ህግያ ኤንታ ጉግያን ዎꬃና፤
ኤንታ ዎዛናን ፃፋና።
ታኒ ኤንታ ፆሳ ግዳና፤
ኤንትካ ታ አሰ ግዳና።
11 ኤንታፈ ኦንካ ባ ሾሩዋ ዎይኮ ባ እሻ፥
‘ጎዳ ኤራ’ ያግድ ታማርሰና።
ኤንቲ ጉꬃፈ ግታ ጋካናዉ
ኡባይ ታና ኤራና።
12 ታኒ ኤንታ ናቁዋ አቶ ጋና፤
ኤንታ ናጋራ ዛራ ቆፕከ” ያጌስ።
13 ፆሳይ ሀ ጫቁዋ “ኦራꬅ” ግድ ፄግሸ ኮይሮይሳ ጋልእስስ። ህዛ፥ ጋልአይነ ጬጋይ ꬋይያ ዎደይ ጋክስ።