12
ፆሳይ ኑስ አዋ
1 ህዛ፥ ሻራዳ ኑ ዩሹዋን ዳርዳ ሀይሳ መላ ማርካት ኑ ማታን ደእያ ግሾ ኑና ꬉብያ ኡባነ ኦይክድ ሃርያ ናጋራ ድግድ፥ ኑ ስንꬃን ደእያ ጋደ ዎꬃ ገንጫን ዎፆስ። 2 ኑ አማኑዋስ ኦገ ዶይዳይሳነ ኑ ዉርሰꬃ ፖሉዋኮ ኑና ጋꬅያ የሱሳ ቦላ ኑ አይፍያ ዎꬆስ። የሱሲ ዎደፐ ደእያ ኡፋይሳ ግሾ ማስቃልያ ዋይያ ዳንዳእድ፥ ዬላ ሀይቁዋ ካꬍድ፥ ፆሳፈ ኡሻቻ ባጋን ኡትስ።
3 ህዛ፥ ህንተ ዶጭድ ኡፋይስ ቃንፆና መላ ናጋራንቾታ እፁዋ ዳንዳእዳ የሱሳ ቆፕተ። 4 ናጋራራ ደእያ ባፅያን ቡሮ ሱꬁ ጉሳና ጋካናዉ ኤቀትበከታ። 5 ፆሳይ ባ ቃላን፥ ባ ናይታዳ ህንተና ዞርዳይሳ ዶግደታ። እዮ 5:17፤ ሌም 3:11-12.
“ታ ናአዉ፥ ፆሳ ሴራ ለቆፋ፤
እ ነና ሴርያ ዎደ ኡፋይስ ቃንፆፋ።
6 ጎዳይ ባ ዶስያ ኡራ ሴሬስ፤
ቃስ ባ ናአዳ ኤክያ ኡባ ጋራፈስ” ያጌስ።
7 ፆሳይ ህንተና ባ ናይታዳ ሴርያ ዎደ ገንጭተ፤ አዋይ ሴሮና ናእ ኦኔ? 8 ፆሳይ ባ ናይታ ኡባ ሴሬስ፤ ህንተ ሴረቶና እፅኮ ቱማ እያ ናይታ ግዶናሽን ባላኮ ናይታ። 9 ቃስ ኑና የልዳ ኑ አዋት ኑና ሴሮሶና፤ ኑካ ኤንታና ቦንቾስ። ያትን፥ ኑኒ ኑ አያና አዋስ ዋንድ አꬅድ ሃረቶኮ? 10 ህዛ፥ ኑ አዋት ባንታዉ ሎኦ ዳንዳ መላ ጉꬃ ዎደስ ኑና ሴርዶሶና። ሽን ፆሳይ ኑ ጎአስ፥ ኑ እያ ጌሻተꬃን ሻከታና መላ ሴሬስ። 11 ኑኒ ሴረትያ ዎደ ይሎዬስፐ አትሽን፥ ኡፋይሰና። ሽን ጉየፐ ሴረተꬅ ሜዘትዳ አሳስ ሴራይ፥ ሳሮይ ኩምዳ ፅሎተꬃ አይፈ አይፍሴስ።
ዞረነ ናግሶ
12 ህዛ፥ ህንተ አርጋጭዳ ቀስያነ ህንተ ዳቡርዳ ጉልባታ ምንꬅተ።እሳ 35:3. 13 ዎበይ ፓፃና መላፐ አትሽን፥ አꬅድ መቆና መላ ህንተ ቶሁዋስ ሱረ ኦገ ጊግስተ። ሌም 4:26.
14 አሳ ኡባራ ሳሮ ዳናዉነ ጌሻተꬃን ዳናዉ ምንተ፤ ጌሻተꬅ ባይና ኦንካ ጎዳ በአናዉ ዳንዳኤና። 15 ህንተፈ ኦደስካ ፆሳ አꬎ ኬሀተꬃይ ፓጮናዳ፥ ቃስ ጫሞ አይፈ አይፍድ ዳሮ አሳ ቱንስያነ ꬋይስያ ዘረꬃዳ ግዶና መላ ናገትተ። ዛረ 29:18. 16 ህንተ ግዶን ላይማትያ አስ ዎይኮ እስ ቶሆ ምያ ካꬃስ ባ ባይራተꬃ ቶችድ ባይዝዳ ኤሳዌ መላ አስ ዶና መላ ናገትተ። መ 25:29-34. 17 ጉየፐ ኤሳዌይ ሄ አንጁዋ ኤካናዉ ኮይዳ ዎደ ድገትዳይሳ ኤሬታ። እ ሄ አንጁዋ አፉꬃን ምንድ ኮይኮካ፥ ደማናዉ ዳንዳእቤና፤ እ ናጋራፐ ስማናዉ ቃዳ ደምቤና። መ 27:30-40.
18 ህንተ ኩሸን ቦሸትያ ሲና ደርያኮ፥ ኤፅያ ታማኮ፥ ꬉማኮ፥ ጫጋናኮ፥ ጎትያኮ፥ ከሳ 4:11-12፤ 19:16-22፤ 20:18-21. 19 ሞይዘ ፑኑኮ ዎይኮ ቃላይ ስኤትያ በሳኮ ይቤከታ። ሄ ቃላ ስእዳ አሳይ ሀራ ጉዣ ቃላ ስኦና መላ ዎስዶሶና። 20 አይስ ጊኮ፥ “ሀር አቶሽን፥ ዶእ ሄ ዙማ ቦችኮ፥ ሹቻን ጫደትድ ሀይቆ” ያግዳ ኪታ ኤንቲ ቶካናዉ ዳንዳእቦኮና። ከሳ 19:12-13. 21 ሄ ሀንያባይ ዳሮ ዳጋንꬅያባ ግድዳ ግሾ ሙሰይካ፥ “ታኒ ያሻን ኮኮራስ” ያግስ። ዛረ 9:19.
22 ሽን ህንተ ፅዮነ ዙማኮ፥ ደኦ ፆሳይ ደእያ የሩሳላመ ካታማኮ፥ እስፈ ሺቅድ ኡፋይትያ ዳሮ ሙኩሉ ኪታንቾታኮ ሳሉዋ ይደታ። 23 ኤንታ ሱንꬃይ ሳሎን ፃፈትዳ ዎሳ ኬꬃ ባይራ ናይታኮ፥ አሳ ኡባ ዳይና ግድዳ ፆሳኮ፥ ፖሎ ግድዳ ፅሎ አሳ አያናታኮ ይደታ። 24 ኦራꬃ ጫቁዋስ ግዶ ግድድ ስገꬅያ የሱሳኮ፥ አበላ ሱꬃፈ አꬍያባ ኦድያ ዉርፀትዳ ሱꬃኮ ይደታ። መ 4:10.
25 ህንተዉ ኦድያ ኡራ ቃላ እፃስ ጎና መላ ናገትተ። ካሰይሳት ሳአን ግድድ ኦድዳ ኪታ ስኦና እፅድ፥ ከስ ኤክቦናባ ግድኮ፥ ያትን፥ ሳሎን ግድድ ኦድያ ቃላ ኑኒ እፃስ ጊኮ ዋንድ ከስ ኤካኔ?ከሳ 20:22. 26 ሄ ዎደ እያ ቃላይ ሳአ ቃꬅስ። ሽን ሀእ ታኒ፥ “ሳአ ፃላላ ግዶናሽን፥ እስ ቶሆ ዛራዳ ሳሉዋካ ቃꬃና” ያግስ። ሀገ 2:6. 27 “እስ ቶሆ ዛራዳ” ግያ ቃላይ ቃፆናባይ ምንድ ዳናይሳ፥ ቃስ ቃፅያ መትዳባት ꬋያናይሳ በሴስ።
28 ኑኒ ቃፃናዉ ዳንዳኦና ካዎተꬃ ኤክያ ግሾ ፆሳ ጋላቶስ፤ ፆሳ ኡፋይስያ ኦገን ቦንቾንነ ያሻተꬃን እያ ጎይኖስ። 29 ህዛ፥ ኑ ፆሳይ ቱማ ፁግያ ታማ። ዛረ 4:24.