1 አማንያ አሳዳ እሶይ እሱዋራ ፖሎ ሲቀትተ። 2 እማ ሞከይሳ ዶጎፕተ። እስ እስ አሳት ሄሳዳ ኦꬅሸ ኤሮና ኪታንቾታ ሞክዶሶና። መ 18:1-8፤ 19:1-3. 3 ቃሾን ደኤይሳታ ህንተካ ኤንታራ እስፈ ቃሾን ደእያዳ ኦꬅድ ኤንታና ቆፕተ። ዋየ ኤክያ አሳራ እስፈ ህንተካ ዋየ ኤክያዳ ኦꬅድ ኤንታና ቆፕተ።

4 ኤኮይነ ገሎይ አሳ ኡባ ማታን ቦንቸትዳባ ግዶ። ቃስ ፆሳይ ላይማተይሳታነ ላመይሳታ ፕርዳናዉ ደእያ ግሾ አዝናይነ ማችያ እሶይ እሱዋስ አማነታናዉ በሴስ።

5 ሚሸ ሲቆፐ ህንተና ናግተ፤ ህንተዉ ደእያባን አልተ። ፆሳይ፥ “ታኒ ነና ኡባራካ የግከ ዎይኮ አግከ” ያግስ። ዛረ 31:6፥ 8፤ እያ 1:5. 6 ሄሳ ግሾ፥ ኑኒ አማነትድ፥

7 ፆሳ ቃላ ኮይሮ ህንተዉ ኦድዳ ህንተና ካለይሳታ ቆፕተ። ኤንቲ ዋንድ ደእዳኮ ኤንታ ዱሳ በእድ ኤንታ አማኑዋ ካልተ።

8 የሱስ ክርስቶሲ ዝነካ ሀችካ መርናዉካ ላመተና። 9 ዱማ ዱማ ኦራꬃ ትምርተን ሀራሶ ብድ ꬋዮፕተ፤ ቦፕተ። ኑ ዎዛናይ ፆሳ አꬎ ኬሀተꬃን ምናናዉ በሴስፐ አትሽን፥ ምን ጎኦና ካꬃን ዎጋ ፖሎን ግዶፖ።

10 ሽን ዱንካንያ ግዶን ኦꬅያ ካህነት ሄ ያርሾ ካꬃፈ ማናዉ ኤንታዉ ማት ባይና ያርሾ በሳይ ኑስ ደኤስ። 11 ካህነ ሀላቃይ ናጋራ ያርሾስ መሄ ሱꬅ ኤክድ ያርሻናዉ ኡባፈ ጌሻ በሳ ገሌስ። ሽን ሄ መህያ አሹዋ ድርሳፈ ካረን ፁጌስ። ሌወ 16:27. 12 ሄሳዳካ፥ የሱሲ ደርያ ናጋራፐ ባ ሱꬃን ጌሻናዉ ካታማ ፐንግያፈ ካረን ዋየትስ። 13 ህዛ፥ ኑኒ ቦርያ ቶክድ ድርሳፈ ካረ እያኮ ከዮስ። 14 ህዛ፥ ኑስ ሀይሳን መርናዉ ደእያ ካታም ባዋ፥ ሽን ኑኒ ያና ካታማ ናጎስ።

15 ህዛ፥ የሱሳ ባጋራ ኡባ ዎደ እያ ሱንꬃስ ማርካትያ መተርሻ ጋላታ ያርሾ ፆሳስ እሞስ። 16 ሎኦባ ኦሶነ ህንተዉ ደእያባፐ መቶትዳ አሳስ እሞ ዶጎፕተ። ህዛ፥ ሄሳ መላ ያርሾይ ፆሳ ኡፋይሴስ።

17 ህንተና ካለይሳታስ ኪተትተ፤ ኤንቲ ግያባ ኦꬅተ። ኤንቲ ባንታ ኦꬅያባስ ፆሳ ስንꬃን ኦይሸታናዉ ደእያ ግሾ፥ ህንተና ሄሞሶና። ህንተ ኤንታዉ ኪተትኮ፥ ባንታ ኦሱዋ ኡፋይትድ ኦꬃና፤ ሄስ ሀኖና እፅኮ፥ ኤንቲ አዛንሸ ኦꬃና፤ ሄስ ህንተና አይብባካ ማደና።

18 ኑስ ፆሳ ዎስተ። ኑ ካሀይ ጌሽ፤ ኑ ኡባ ዎደ ሎኦባ ኦꬃናዉ ኮዮስ። 19 ታኒ ህንተኮ ኤለሳዳ ያና መላ ህንተ ታዉ ምንꬅድ ፆሳ ዎሳና መላ ታ ህንተና ሀዳራ ጋይስ።

20 ሳሮተꬃ ፆሳይ፥ ዶርሳ ሄምያ ኑ ጎዳ የሱሳ፥ ባ መርና ጫቆ ሱꬃን ሀይቆፐ ደንꬅዳይስ፥ 21 እያ ሸንያ ኦꬃና መላ ሎኦባ ኡባን እ ህንተና ዳንጭሶ። እያ ኡፋይስያባ የሱስ ክርስቶሳ ባጋራ ኑናን ፆሳይ ኦꬆ። የሱስ ክርስቶሳ ባጋራ ፆሳስ መርናፐ መርና ጋካናዉ ቦንቾይ ግዶ። አምንእ።

22 ታ እሻቶ፥ ታ ሀ ዳብዳብያ ህንተዉ ቃንꬃን ፃፍዳ ግሾ፥ ህንተ ታ ዞርያ ሳለቶና ኤካና መላ ታ ህንተና ዎሳይስ።

23 ኑ እሻይ፥ ፅሞትዮስ ቃሾፐ ብለትዳይሳ ኤርተ። እ ኤለስድ ታኮ ዪኮ ታ እያራ ህንተና ባዳ በአና።

24 ህንተና ካለይሳታነ አማንያ ኡባ ሳሮ ጊተ። ፃለፐ ይዳ አማንያ አሳይ ህንተና ሳሮ ያጎሶና።

25 ፆሳ አꬎ ኬሀተꬃይ ህንተ ኡባራ ግዶ። አምንእ።