1 ፆሳነ ጎዳ የሱስ ክርስቶሳ አይለይ፥ ያይቆብ፥ ቢታ ኡባን ላለትዳ ታማነ ናምኡ ሼሻታስ ኪትዳ ኪታ። ማቶ 13:55፤ ማር 6:3፤ ሀዋ 15:13፤ ጋላ 1:19.

ሳሮ፥ አይ መላ ደኤቲ?

2 ታ እሻቶ፥ ህንተና ዱማ ዱማ ፓጨይ ጋክያ ዎደ ህንተ ሎኦባ ደምዳዳ ኩመꬃ ኡፋይሳን ኤክተ። 3 ህንተ አማኑዋ ፓጨተꬃይ ዳንዳአ ህንተዉ እመይሳ ኤሬታ። 4 ህንተ ዉርሰꬅ ጋካናዉ ዳንዳእኮ አይብ ፓጨይ ባይና ፖሎነ ኩመꬅ ግደታ። 5 ህንተፈ ኦደስካ ጭንጫተꬅ ꬋይኮ ፆሳ ዎሶ። እያዉ እመታና። ፆሳይ ኦናካ ቦሮና ኡባስ ኬሀተꬃን እምያ ፆሰ። 6 ሽን እ ዎስያ ዎደ ስꬎና አማኖን ፆሳ ዎሶ። ስꬍያ ኦንካ ጫርኮይ ሱግን ቃፅያ አባ ዙለ መላ። 7-8 ናምኡ ቆፍ ደኤይነ ባ ኦግያን ኤቆና ኦንካ ጎዳፐ አይኮካ ደማና ግድ ቆፖፎ።

9 አማንያ ማንቆ አሳት፥ ፆሳይ ኤንታና ꬎቁ ኦꬅያ ዎደ ኡፋይቶ። 10 ቃስ አማንያ ዱረ አሳት ፆሳይ ኤንታና ዝቅ ኦꬅያ ዎደ ኡፋይቶ። ዱረ አሳት ጪሻዳ ꬋያና።እሳ 40:6-7. 11 አዋይ ባ ምሻራ ከይድ ማታ መልስን፥ ጪሻይ ቆለቴስ፤ እያ ሎኦተꬃይካ ꬋዬስ። ሄሳዳካ፥ ዱረ አሳት ባንታ ኦሱዋን ዳቡርሸ ꬋያና።

12 መቱዋ ፆንድ አꬍዳፐ ጉየ፥ ፆሳይ ባና ሲቀይሳታስ እማና ግድ ቃላ ገልዳ ደኦ ካላቻ ኤካና ግሾ፥ መቶን ገንጭያ አስ አንጀትዳይሳ። 13 ኦንካ ፓጨትያ ዎደ፥ “ታና ፆሳይ ፓጬስ” ጎፖ። ፆሳይ ኢታን ፓጨተና፤ ቃስ እ ኦናካ ፓጨና። 14 ሽን እስ እስ አስ ባ ኢታ አሙዋን ጎሸትያ ዎደነ ጭመትያ ዎደ ፓጨቴስ። 15 ሄሳፈ ጉየ፥ አሞተꬅ ቃንꬃትድ ናጋራ የሌስ፤ ቃስ ናጋር ድጭድ ሀይቆ የሌስ።

16 ታ ሲቆ እሻቶ፥ ጭመቶፍተ። 17 ሎኦ እሞይነ ኩመꬃ አንጆ ኡባይ ሳሎፐነ ሳሉዋ ፖኡዋ መꬍዳ ፆሳ አዋፐ ዬስ። ፆሳይ ኩያዳ ኡባ ዎደ ላመተና። 18 ኑኒ፥ እያ መተꬃስ ኮይሮ ግዳና መላ ኑና ቱማ ቃላን ባ ሸነን የልስ።

19 ታ ሲቆ እሻቶ፥ ሀይሳ አኬክተ። አስ ኡባይ ስአናዉ ኤለሶ፥ ሽን ኦደታናዉነ ሀንቀታናዉ ኤለሶፖ። 20 አሳ ሀንቆይ ፆሳይ ኮይያ ፅሎተꬃ ኤሄና። 21 ሄሳ ግሾ፥ ቱና ሀኖታነ ኢታተꬃ ኡባ ድግድ፥ ፆሳይ ህንተ ዎዛናን ቶክዳ ህንተ ሸምፑዋ አሻናዉ ዳንዳእያ ቃላ አዳተꬃን ኤክተ።

22 ሽን ፆሳ ቃላ ኦሶን ፔሽተፐ አትሽን፥ ስሳ ፃላላን ህንተና ጭሞፍተ። 23 ቃላ ስእድ ኦꬆና አስ፥ እ ባ ሶምኡዋ ማስቶተን በእያ አሳ መላ። 24 እ ባ ሶምኡዋ በእድ ቤስ፥ ሽን እ አይ ዳንያኮ ኤለስ ዶጌስ። 25 ሽን ኦንካ አይለተꬃፈ ከስያ ፖሎ ህግያ አኬካን በእድ፥ ካልድ ናገይ፥ ስእዳይሳ ዶጎና ኦሶን ፔሽያ ኡራይ፥ ባ ኦሶ ኡባን አንጀታና።

26 ባ እንፃርሳ ናጎና አማናይስ ግያ ኡራይ ባና ጭሜስ፤ እያ አማኖይ ሀዳ። 27 ፆሳ አዋ ስንꬃን ቦረይ ባይና ጌሻ አማኖይ ሀይሳ፦ አይያ አዉ ባይና ናይታነ አምኤታ ማዶነ አላምያ ቱናፐ ባና ናጎ።