ፑደሀ ካዎተꬃ ዉርሰꬃ ላይꬃን፥ ሆሰይ፥ ናብያ አሞፀፐ ካልድ ናበ ግድስ። ሀኖታት መቶ ግድ ደእያ ዎደ ፑደሀ ባጋ እስራኤለ ካዎተꬃ ቦላ ሆሰይ ትንብተ ኦድስ።

ሀ ማፃፋን፥ ኮይሮ ሄꬑ ሸምፖታን፥ ሆሰይ ባ ሶ አሳራ ሌምሶ ግድድ እስራኤለ ሳባክስ። ጎዳይ፥ እስራኤለይ አማነቶና ቢታ ግደይሳ ቆንጭሳናዉ ኮይድ፥ ሆሰይ ላይማ ማጫስ ማቾ ኦꬅድ ኤካና መላ ኦድስ። ባ የልዳ ናይታ ዎይግድ ሱንꬃነኮ እያዉ ኦድስ። ናይታ ሱንꬃይ እስራኤለይ ዎንቶ ዋናዳ ፕርደታነኮ ማሌስ። ሄ ናይታ ሱንꬃ ብርሸꬃይ፥ እዝራኤለ፥ (ፆሳይ ላላና)፤ ሎሩሃማ (ማሮተꬅ ደሞናሮ)፤ ሎኣማ (ታ አሰ ግደና) ጉሱ።

ሸምፖ 4—14 ጋካናዉ ደእያ ክፍለይ፥ ሆሰ ማችያ አማነቶና ማቾ ግደይሳዳ፥ እስራኤለይ ፆሳስ አማነቶና እፅዳይሳ ሆሰ ትንብተይ በሰስ። ጎመራ ሆሰ አጋዳ ሀራ ባ ላገꬆታኮ ብዳይሳዳ (ሸም 1)፥ እስራኤለይ ፆሰ አጋዳ ብዳይሳ (ሸም 2) በሴስ። ግዶሽን፥ ሆሰይ ባ አማነቶና ማችዉ ዶሳና መላ ጎዳይ ኪትስ። ሄስካ፥ ፆሳይ ባ መርና ሲቁዋን እስራኤለ ዶስዳይሳስ ሌምሶ። ጎዳይ እስራኤለስ አማነትኮካ፥ እስራኤለይ ዎደፐ ዎደን ጎዳስ አማነታቡኩ። ኤንቲ ባንታ ካዎተꬃ አሻናዉ ጎዳን ዘምፓናይሳ አግድ፥ ባንታ ኦላንቾታንነ አላጋ ቢታታ ቦላ ዘምፕዶሶና። ሄሳ ፃላላ ግዶናሽን፥ “ኑስ ካꬅ እመይነ መሄይ የለታና መላ ኦይ ኑ ኤቃ ፆሳታ” ግድ ኤንታን አማነትዶሶና፤ ኤንታ ጎይንዶሶና።

ሀ ማፃፋን ጎዳይ እስራኤለነ ይሁዳ መቶን የግድ፥ ኤንቲ መንꬅዳ ጫቁዋ ግሾ ኦይሸታና መላ ኦꬅስ። ሽን ኤንቲ ሄ ኡባ ሀንንካ ጎዳይ ኤንታ ዶሴስ። ኤንቲ ባንታ ናጋራፐ ስሚድ እያዉ አማነትኮ፥ እ ኤንታ ዛሪድ ኤካናዉነ አንጃናዉ ቃላ ገልስ። ጎዳይ፥ “ታ ሀንቆይ ኤንታፈ ስምዳ ግሾ፥ ታኒ ኤንታ፥ ኤንታ ኢታ ሀኑዋፐ ፓꬃዳ፥ ኤንታ ቱማ ዶሳና” (14:4) ያግስ።