1 “ህንተ እሻታ፥ ‘ታ አሰ’ ቃስ ህንተ ምቸታ፥ ‘ማሮተꬅ ደምዳይሳታ’ ያግድ ፄግተ።

2 “ህንተ አይዉ ሀንቀትተ፤ እዮ ካጭተ። አይስ ጊኮ፥ እያ ታ ማቾ ግዱኩ፤ ታካ እ አዝና ግድከ። እያ ባ ሶምኡዋፈ ላይማተꬃ ማላ ድጎ፤ ላይማተꬃ ኦሱዋ ባ ꬋንꬃታ ግዶፈ ድጎ። 3 ሄስ ሀኖና እፅኮ እያ የለትዳ ጋላሳዳ፥ ታኒ እዮ ፅረ ካሎ አሻና። ቃስ እዮ መልዳ መላ ቢታ ኦꬃና፤ ታኒ እዮ ሳሞን ዎꬋና። 4 ኤንቲ ላይመፐ የለትዳ ናይታ ግድዳ ግሾ፥ ታኒ እ ናይታስ ቃትከ። 5 ኤንታ አይያ ላይማታሱ፤ ካዉሻባ ሀናዳ ኤንታ ቃንꬃታሱ። እያ፥ ‘ታኒ ታ ካꬃነ ታ ሃꬃ፥ ታ ሱፍያነ ታ ሊኑዋ፥ ታ ዛይትያነ ታ ኡሻ ታዉ እምያ ታ ላገꬆታ ካላዳ ባና’ ያጋሱ። 6 ሄሳ ግሾ፥ ታኒ እ ኦግያ አጉንꬃን ጎርዳና፤ እያ ባ ኦግያ ደሞና መላ ታኒ እ ዩሹዋ ግምበን ድራና። 7 እያ ባ ላገꬆታ ጌዶ ዎፃና፥ ሽን ጋኩኩ፤ ኤንታ ኮያና፥ ሽን ደሙኩ። ሄሳፈ ጉየ፥ ‘ሀእ ዱሳፈ ታዉ በንይስ ሎኦ ግድያ ግሾ፥ ስማዳ ታ ኮይሮ አዝናኮ ባና’ ያጋና። 8 ካꬃ፥ ዎይነ ኡሻነ ዛይትያ እዉ እምዳይነ ኤንቲ ባኣለ ኤቃስ ያርሽያ ብራነ ዎርቃ እዉ ዳርስዳይ ታና ግደይሳ እያ ኤሮና እፃሱ። 9 ሄሳ ግሾ፥ ካፅያ ዎደ ታ ካꬃ፥ ቴርያ ዎደ ታ ዎይንያ ኢፐ ዛራዳ ኤካና። እያ ባ ካሉዋ ካምያ ሱፍያነ ሊኑዋ ኢፐ ቃራ ኤካና። 10 እ ላገꬆታ ስንꬃን ታኒ እ ካሉዋ ቃራና፤ ታ ኩሽያፐ እዮ ኦንካ አሸና። 11 ታኒ እ ኡፋይሳ ባለታ ኡባ፥ አጌና ፄሮ ጋላሳታ፥ እ ሳምባታ ጋላሳታ፥ ላይꬃን ላይꬃን ቦንቸትያ ባለታ አሻና። 12 እያ፥ ‘ታ ላገꬆት ታዉ እምዳ ጭጋ’ ግያ ዎይንያነ ባላሰ ምꬃ ታ ꬋይሳና፤ ታኒ ሄ በሳ ዎራ ኦꬃና፤ ባዞ ዶአት እያ ማና። 13 እያ ታና ዶጋዳ ባ ላገꬆታ ካላዳ፥ ሳጋዮታንነ አሌቆታን አሌቀታዳ፥ ባኣለ ኤቃስ እፃነ ጩይስዳ ጋላሳታ ግሾ ታኒ እዮ ሴራና፤ ያጌስ ጎዳይ።

14 “ሄሳ ግሾ፥ ታኒ እዮ ጭማዳ መላ ቢታ ኤሀዳ፥ እዉ ሲቆ ቃላን ኦዳና። 15 ያን ታኒ እ ዎይነ ጋደ እዉ ዛራዳ እማና፤ አኮራ ዛንጋራ (መቶ ዛንጋራ) እዉ ኡፋይሳ ፐንገ ኦꬃና። ግብፀ ቢታፈ ከይዳ ዎድያዳ ባ ጌላኦተꬃ ላይꬃን ደእያ ሀኖታን ኡፋይሳን የፃና” ያጌስ።

16 ሄ ጋላስ እያ ታና፥ “ታ አዝናዉ” ያጋዳ ፄጋና፤ ካሰይሳዳ፥ “ታ ጎዳዉ” ያጋዳ ፄጉኩ። 17 አይስ ጊኮ፥ ታኒ እ ዶናፐ “ባኣለ” ኤቃታ ሱንꬃ ድጋና፤ ህዛፐ ጉየ ታኒ እዮ “ባኣለ” ሱንꬃ ፄግስከ። 18 ሄ ዎደ ታኒ ታ አሳ ግሾ ሳኣ ዶአታራ፥ ሳሎ ካፎታራነ ቢታራ ጎሸትያ መተꬃታራ ጫቃና። ታኒ ቢታፈ ዶንገ፥ ማሸነ ኦላ ꬋይሳና። ኤንቲ ቢታ ቦላ ሳሮ ዳና።

19 ታኒ ነና መርናዉ ታዉ ማቾ ኦꬃና፤ ፅሎተꬃን፥ ሱረ ፕርዳን፥ መርና ሲቁዋንነ ማሮተꬃን ታዉ ጊግሳና። 20 ታኒ አማነታዳ ነና ታዉ ጊግሳና፤ ነካ ጎዳ ኤራና።

21 “ሄ ዎደ ታኒ ዛሮ እማና፤ ታኒ ሳሎታስ ዛሮ እማና፥ ሳሎት ሳኣስ ዛሮ እማና። 22 ሳአይ ካꬃስ፥ ዎይነ ኡሻስነ ዛይትያስ ዛሮ እማና፤ ኤንቲ እዝራኤለስ (ፆሳይ ቶካና) ዛሮ እማና። 23 ታኒ እዮ ታ ግሾ ጋዳ ቢታ ቦላ ቶካና፤ ካሰ ታኒ፥ ‘ማርከ’ ግዳይሳታ ማራና፤ ‘ታ አሰ ግደከታ’፤ ግዳይሳታ፥ ‘ታ አሰ’ ጋና። ኤንትካ ታና፥ ‘ኔኒ ኑ ፆሳ’ ያጋና” ያጌስ ጎዳይ።