1 እስራኤለ አሳቶ፥ ኡፋይቶፍተ! ሀራ ካዎታዳ ፖጩ ጎፕተ! ህንተ ህንተ ፆሳፈ ሃክድ ላይማትደታ፤ ካꬃ ጌሽያ ዉዱማን ላይማተꬃስ እምያ ጋትያ ዶስደታ። 2 ሄሳ ግሾ፥ ህንተ ዉዱማፈ ካꬅ፥ ጉምእያ በሳፈ ዎይነ ኡሻ ደመከታ፤ ዎይነይ ህንተዉ አይፈና። 3 ኤንቲ ጎዳ ቢታን ጋምኦኮና። ኤፍሬም ግብፀ ቢታ ስማና፤ አሶረ ቢታን ቱና ካꬅ ማና።

4 ኤንቲ ጎዳስ ዎይነ ኡሻ ያርሾ ጉሶኮና፤ ኤንታ ያርሾይ እያ ኡፋይሰና። ሄ ያርሾይ ኤንታዉ ሾቻ መላ ግዳና፤ ሄሳ ምያ ኡባይ ቱናና። ሄ ካꬃይ ኤንታ ኮሻ ፃላላ ዛራናሳፈ አትሽን፥ ጎዳራ ደእያ እስፈተꬃስ ማደና። 5 ጎዳ ህንተ ቦንቻና መላ እ ህንተዉ እምዳ ባኣለ ጋላሳታን ህንተ አይ ኦꬃኔ? 6 ኤንቲ ꬋዮፐ ከስ ኤክኮካ ግብፀይ ኤንታ ሺሻና፤ መምፕሳ ካታማይ ኤንታ ሞጋና። ኤንቲ ሺሽዳ ብራ ሚሸ ኡባ ሻራፍ ምታና፤ ኤንቲ ደእያ በሳን ቡሎይ ዶላና።

7 ሴራ ጋላስ ይስ፤ ፕርዳ ዎደይ ጋክስ። እስራኤለ አሳይ ሄሳ ኤሮ! ህንተ ናጋራ ግሾነ ሞርከተꬃ ግሾ ናበይ ኤያ መላ ፆሳ አስ ጌተትዳይስ ጎሻ መላ ታይበትስ። 8 ናበይ ፆሳራ ግድድ፥ ኤፍሬማ ናጌስ፤ ሽን እያ ኦግያን ፅሄይ የገትስ፤ ፆሳ ኬꬃን እያ ሞርከተꬅ ናጌስ። 9 ግብአ ካታማን ሀንዳይሳዳ ኤንቲ ቱንዶሶና። ፆሳይ ኤንታ ናቁዋ ሀሳያና፤ ናጋራ ግሾ ኤንታ ሴራና።

10 ጎዳይ፥ “ታኒ መላ ቢታን ዎይነ አይፈ ደምዳይሳዳ እስራኤለ አሳ ደማስ። ታኒ ባላሰ ምꬃን ኮይሮ አይፈ በእዳይሳዳ ህንተ አዋታ በአስ። ሽን ኤንቲ ብኤል-ፋጎራ ጌተትያ በሳ ይድ፥ ዬላይያ ኤቃስ ባንታና ዱማይዶሶና፤ ኤንቲ ሄ ዶስዳ ኤቃዳ ቱንዶሶና። 11 ኤፍሬማ ቦንቾይ ካፎዳ ፓል ꬋያና፤ ህዛፐ ጉየ የሎይ ባዋ፤ ቃንꬃቶይ ባዋ፤ አተꬅ ባዋ። 12 ኤንቲ ናአ የልድ ድችያባ ግድኮካ ታ ኤንታ ዎꬋ ዉርሳና። ታኒ ኤንታፈ ሃክዳ ዎደ ኤንታና አየ! 13 ኤፍሬም ሎኦ በሳን ቶከትዳ ዛምባ ምꬃ መላ ሀንን በአስ፥ ሽን ባ ናይታ ሹካስ አꬃ እሚስ” ያግስ።

14 አቤት ጎዳዉ፥ ኤንታዉ እማ! ነ ኤንታዉ አይ እማኔ? ነ ኤንታዉ ቦሸትያ ኡሎነ መልዳ ꬋንꬅ እማ።

15 ጎዳይ፥ “ኤንታ ኢታተꬃ ግሾ ታኒ ጋልጋላን እፆ ዶማስ። ኤንታ ናጋራ ግሾ ታኒ ኤንታ ታ ኬꬃፈ ጎዳና፤ ህዛፐ ጉየ ታ ኤንታ ዶስከ፤ ኤንታ ሀላቃት ኡባይ ጌላታ። 16 ኤፍሬም ደሸትን፥ እያ ፃጶይ መልስ፤ አይፈይካ ባዋ። ኤንቲ ናአ የልኮካ ታኒ ኤንቲ ዶስያ ናይታ ዎꬋና” ያግስ።

17 ኤንቲ እያዉ ኪተቶና እፅዳ ግሾ ታ ፆሳይ ኤንታ ፕፅር ሆላና፤ ኤንቲ ካዎተꬃታ ግዶን ቶይላትሸ ዳና።