1 እስራኤለ አሳይ ዳሮ አይፈ አይፍያ ዳይዳ ዎይነ መላ፤ ኤንታ አይፈይ ዳርዳ መላ ኤቃ ያርሾ በሳታ ዳርስ ኬፅዶሶና። ኤንታ ቢታይ ዱረትዳ ኬና ጎይንያ ኤቃ ቱሳታ አሌቅስድ መꬍዶሶና። 2 ኤንታ ዎዛናይ ጫከትስ፤ ሀእ ኤንቲ ባንታ ናጋራ ቶካና። ጎዳይ ኤንታ ያርሾ በሳታ ላላና፤ ኤንታ ኤቃ ቱሳታ ꬋይሳና።

3 ሄ ዎደ አሳይ፥ “ኑኒ ጎዳስ ያይቦና ግሾ፥ ኑስ ካዎይ ባዋ። ሽን ካዎይ ደእያኮካ ኑስ አይ ኦꬃኔ?” ያጋና። 4 ኤንቲ ሀኖና ኡፋይሳ ቃላ ገሎሶና፤ ዎርዶን ጫቆሶና፤ ሄሳ ግሾ፥ ዎꬍያ ሀርመይ ጋደን ዶለይሳዳ ኤንታ ቦላ ፕርድ ዶላና። 5 ሳማረ ካታማን ደእያ አሳይ ቤት-አዌናን ደእያ ማራ ምስልያስ ያሻን ኮኮሮሶና። እያ ቦንቾይ እያፐ ቃረትዳ ግሾ እያዉ ዬካና፤ ሄ ኤቃ ምስልያ ካህነት ዋሳና። 6 ሄ ኤቃ ምስለይ አሶረ ቶከትድ፥ ብድ፥ ግታ ካዋስ እሞታ ግድድ እመታና። ኤፍሬም ዬላታና፤ እስራኤለይ ኤቃ ምስልያ ግሾ ካዉያና።

7 ሳማረ ካዎይ ሃꬃ ጎፖንቶ ግድድ ꬋያና። 8 እስራኤለ አሳይ አዌና ካታማን ኤቃስ ጎይንሸ፥ ናጋራ ኦꬅያ ꬎቃ በሳት ላለታና። ኤንታ ያርሾ በሳን አጉንꬅነ ጎምኦረይ ዶላና። ሄ ዎደ ኤንቲ ደረታኮ፥ “ኑና ቆስተ!” ዙማታኮ፥ “ኑና ገንꬅተ” ያጋና።

9 ጎዳይ፥ “እስራኤለ አሳዉ፥ ግብአን ህንተ ናጋራ ኦሶ ዶምዳ ዎድያፐ፥ ሀች ጋካናዉ ናጋራ ኦሶ አግበከታ። ሄሳ ግሾ፥ ኢታ ኦይሳታ ግብአን ኦል ዉርስቤኔ? 10 ታኒ ዶስዳ ዎደ ሄ ጌላታ ሴራና። ኤንቲ ኦꬅዳ ዳሮ ናጋራ ግሾ ታኒ ኤንታ ሴርያ ዎደ ካዎተꬃት ኤንታ ቦላ ደንዳና። 11 ኤፍሬም ካꬅ የꬋናዉ ዶስያ ዋꬍ ከስዳ ዎፋኖ መላ። ሽን ታኒ እያ ሎእያ ሞርግያን ቃምባራ ዎꬃዳ ዋፃና። ይሁዳ አሳይ ዎርፃፋና፤ ያይቆባ አሳይ ሽረቻና። 12 ጎዳይ ይድ ፅሎተꬅ ህንተ ቦላ ቡክሳና ጋካናዉ እያ ኮይተ። ህንተ ፅሎተꬅ ዘርያባ ግድኮ መርና ሲቆ ጫካና። ሄሳ ግሾ፥ ኦ ቢታ ዎርፃፍተ። 13 ሽን ህንተ፥ ህንተ ኦግያንነ ህንተ ዳሮ ኦላንቾታን አማነትዳ ግሾ፥ ኢታተꬅ ዘርድ ናጋራ ጫክደታ፤ ህንተ ዎርዱዋ አይፍያ ምደታ። 14 ህንተ ቦላ ዎልቃማ ኦል ደንዳና፤ በን ካዎይ ሳልማን ቤት-አርበላ ካታማ ኦልድ ላልዳይሳዳነ አየታነ ናይታ ꬋይስዳይሳዳ ቃስ ህንተ ሚፃታ ꬋይሳና። 15 ቤተለ ካታማን ደኤይሳቶ፥ ህንተ ናጋራይ ዳሮ ግድያ ግሾ ሄሳ መላባይ ህንተና ጋካና። ሄ ጋላስ ሳእ ዎንትያ ዎደ እስራኤለ ካዎይ ሀይቃና።