1 ኤፍሬማ አሳይ ዎንታፈ ኦማርስ ጋካናዉ ዶሎሀ ጫርኮ ኦይኬስ ዎይኮ የደꬄስ። ኤንቲ ዎርዶነ ጌላተꬅ ዳርሶሶና፤ አሶረ ቢታራ ጫቅዶሶና፤ ሻማሆ ዛይተ ግብፀ ቢታ የዶሶና።

2 ጎዳስ ይሁዳ አሳራ ሞቶይ ደኤስ፤ እ ያይቆባ ናይታ ኤንታ ኦግያዳ ሴራና፤ ኤንታ ኦሱዋዳ ኤንታዉ ዛራና። 3 ያይቆብ ባ አየ ኡሎን ደእሸ ባ እሻ ግንድያ ኦይክስ። ድጭ ጋክድ ፆሳራ ቡተትስ፤ 4 ኪታንቾራ ባፀትድ ፆንስ። ባና ኬሀ አይፈን ፄላና መላ ባ እሻ ዬክድ ዎስስ። ያይቆብ ፆሳ ቤተለን ደምን ፆሳይ ያን እያራ ሃሳይስ። 5 እ ጎዳ፥ ኡባፈ ዎልቃማ ፆሳ። እያ ኤረትዳ ሱንꬃይ ጎዳ ጌተቴስ። 6 ሄሳ ግሾ፥ ህንተ ፆሳኮ ስምተ፤ ሲቆነ ሱረ ፕርዳ ምንꬅ ኦይክተ፤ ህንተ ፆሳይ ኦꬃና ጋካናዉ ናግተ። 7 ዛልአንቾይ ዎርዶ ምዛነን ዛልኤስ፤ እ አሳ ጭማናዉ ዶሴስ። 8 ኤፍሬም፥ “ታኒ ዳሮ ዱረ፤ ታኒ ታዉ አቆ ደማስ። ታ አቆ ኡባን ታናን ኤንቲ ባላ ዎይኮ ናጋራ ደሞኮና። 9 ሽን ታኒ ህንተና ግብፀ ቢታፈ ከሳዳ ኤህዳ ጎዳ፥ ህንተ ፆሳ፤ ሻቃራ ባኣለ ጋላስ ህንተ ዱንካነን ደእዳይሳዳ ታ ህንተና ዛራ ዱንካነን ዎꬃና። 10 ታኒ ናበታስ ኦዳስ፤ ዳሮ ቆንጨꬅ ኤንታዉ እማስ፤ ኤንታ ባጋራ ዳሮ ሌምሶታ ኦዳስ” ያግስ።

11 ጋላድ ኢታ ናጋራንቾ፤ ጋላዳ አሳት ፓꬆናይሳታ። ኤንቲ ጋልጋላን ኮርማታ ያርሻና። ኤንታ ያርሾ በሳይ ጎሻን ደእያ ኬላ ሹቻዳ ላለታና።

12 ያይቆብ ሶረ ቢታ ባቃትስ፤ እስራኤለይ ማቾ ኤካናዉ ኡነ ኦꬅስ። ኮይታ እማናዉ ያን ዶርሰ ሄምስ። 13 ጎዳይ እስራኤለ አሳ ናበታ ባጋራ ግብፀ ቢታፈ ከስድ ሄ ናበታ ባጋራ ኤንታ ናግስ። 14 ሽን ኤፍሬም ጎዳ ዳሮ ሀንቀꬅስ፤ እ ሱꬅ ጉስዳ ግሾ እያ ጎዳይ አቻና፤ እያ ጫሻ እያዉ ዛራና።