1 ኤፍሬም ኦደትዳ ዎደ ስእዳ ኡባይ ያሻን ኮኮርስ፤ እስራኤለ ቢታን ኤንቲ ቦንቸትዳ አስ። ሽን ባኣለ ኤቃ ጎይንዶሶና፤ ሄ ናጋራ ጋሶን ሀይቅዶሶና። 2 ሀእካ ናጋራ ቦላ ናጋራ ኦꬆሶና፤ ባንታ ብራ ሼሽድ ባንታዉ ኤቃ መꬍዶሶና፤ ሂላን ኦሰትዳ ምስለታ ጊግስዶሶና፤ ኡባይካ ኩሸ ሂላን መትዶሶና። አሳይ ኤንታባ ኦድሸ፥ “ያርሽያ አሳይ ማራ ኤቃ ምስለታ ዬርተ” ያጎሶና። 3 ሄሳ ግሾ፥ ኤንቲ ዎንታ ሻራ መላ ዎይኮ ዎንታ ፃሳ መላ ዎይኮ ጫርኮይ ዉዱማፈ ደንꬅድ ኤፍያ ፑኖ መላ ዎይኮ ማስኮተራ ከያ ጩያ መላ ግዳና።

4 ጎዳይ “ታኒ ህንተና ግብፀ ቢታፈ ከሳዳ ኤህዳ ጎዳ፥ ህንተ ፆሳ። ህንተ ታፐ አትሽን፥ ሀራ ፆሲ ኤረከታ፤ አሸይ ታፐ ሀር ባዋ። 5 ባዞን፥ መላ ቢታን ታኒ ህንተና ናጋስ። 6 ታኒ ህንተና ሙዝን፥ ምድ ካልድ ኦቶርትደታ፤ ሄሳፈ ጉየ ታና ዶግደታ። 7 ሄሳ ግሾ፥ ታኒ ህንተ ቦላ ጋሞ ግዳና፤ ማሄ መላ ኦገ ዶናን ዙጋና። 8 ማር ኤከትዳ ማሄ መላ ታኒ ህንተራ ጋሄታዳ ታ ህንተና ፑዛና። ታኒ ህንተና ጋሞዳ መንረꬃና፤ ባዞ ዶአዳ ህንተና ፖሻና።

9 “እስራኤለ አሳቶ፥ ህንተ ታ ቦላ፥ ህንተና ማደይሳ ቦላ ደንድዳ ግሾ ታ ህንተና ꬋይሳና። 10 ህንተ ታና፥ ‘ኑስ ካዎነ ሀላቃ እማ’ ያግድ ኦይችደታ። ህንተና አሽያ ህንተ ካዎይ አኔ? ካታማታን ደእያ ህንተ ሀላቃት አዉን ደኦና? 11 ታኒ ታ ሀንቁዋን ህንተዉ ካዎ እማስ፤ ታ ይሉዋን እያ ደንꬃስ። 12 ኤፍሬማ ባላይነ ናጋራይ ፃፈትድ ኡትስ። 13 እቀꬅ ኦይክዳ ማጫስ ኡንኤተይሳ መላ ኡንእ እያ ቦላ ያና። ሽን እ ኤር ባይና ናአ፤ የለትያ ዎደይ ጋክን፥ ባ አየ ኡሎፐ ዎꬎና እፅያ ናአ መላ። 14 ታኒ ኤንታ ዱፎፐ አሻና፤ ሀይቆ ዎልቃፈ ዎዛና። ሀይቆ፥ ነ ጋዶይ አዉኔ? ስኦለ፥ ነ ꬋይሶይ አዉኔ? ታኒ ታ አሳስ ቃትከ። 15 ኤፍሬም ባ እሻታ ግዶን ምንኮካ፥ ጎዳይ የድዳ ዶሎሀ ባጋ ጫርኮይ ባዞፈ ጫርክሸ ያና፤ እያ ፑልቶይ ኤቃና፤ እያ ሃꬃይ መላና። እ ምንጅዳ አልኦ ሚሸ ኡባይ ቦንቀታና። 16 ሳማረ አሳይ ባንታ ፆሳ ቦላ ጌላትዳ ግሾ፥ ሴራ ኤካናዉ በሴስ። ኤንቲ ማሻን ቡሰታና፤ ኤንታ ናይት ትንቸታና፤ ኤንታ ቃንꬃትዳ ማጫሳታ ኡሎይ ዳከታና” ያጌስ።