1 ሄኮ፥ ጎዳይ፥ ኡባፈ ዎልቃማ ፆሳይ፥ ምንጃነ ማዶ ኡባ፥ ካꬃ ምንጃነ ሃꬃ ምንጃ ኡባ የሩሳላመፐነ ይሁዳፐ ድጋና። 2 ምኖታነ ኦላንቾታ፥ ዳይናነ ናብያ፥ ብተይሳነ ጭማ፥ 3 ቶራ ሞጮናነ ደርያ አይሰይሳ፥ ዞረይሳ፥ ሂላንቹዋነ ቃራ ማሮታ ኡባ ድጋና።

4 ታኒ ዮጋ ናይታ ኤንታ ሀላቃ ኦꬃና፤ ጉꬃ ናይት ኤንታ ሃራና። 5 አሳይ አሳ ቦላ፥ ሾሮይ ሾሩዋ ቦላ ደንድድ፥ እሶይ እሱዋ ሱጋና። ናአተꬃይ ጭማ ቦላ፥ ካትዳይስ ቦንቸትዳይሳ ቦላ ደንዳና።

6 እስ አስ ባ አዋ ኬꬃን ደእያ ባ እሻታፐ እሱዋ ኦይክድ፥ “ነዉ ማኦይ ደኤስ፤ ኔኒ ኑስ ሀላቃ ግዳ፤ ሀ ላለትዳ በሳ አዋተꬃን ኤካ” ያጋና።

7 ሄ ጋላስ፥ እ ባ ቃላ ꬎቁ ኦꬅድ፥ “ታኒ ማድከ፤ ታ ሶን ካꬅ ዎይኮ ማኦይ ባዋ፤ ህንተ ቦላ ታና ሹሞፕተ” ያጋና።

8 የሩሳላመይ ጋንድጋራሱ፤ ይሁድ ኩንዳናዉ ማታሱ፤ ኤንቲ ባንታ ኦዳንነ ባንታ ኦሱዋን ጎዳ ቦላ ደንድድ፥ እያ ቦንቹዋ ቶችዶሶና። 9 ኤንታ ሶምኦይ ኤንታ ቦላ ማርካቴስ፤ ኤንቲ ባንታ ናጋራ ሶዶመ አሳ መላ አዋጆሶና፤ ባንታ ናጋራ ቆቶኮና። ኤንቲ ባንታ ቦላ ꬋዮ ኤህዳ ግሾ ኤንታ አየ!

10 ኤንቲ ባንታ ኦሱዋ አይፍያ ማና ግሾ፥ ፅሎታስ ሎኦ ግዳና ጋዳ ኦዳ። 11 ኤንቲ ባንታ ኩሸ ኦሱዋ ጋትያ ኤካና ግሾነ ꬋዮይ ኤንታ ቦላ ይዳ ግሾ ኢታታ አየ! 12 ናአተꬃት ታ አሳ ኡንኤꬆሶና፤ ማጫሳት ኤንታ ሃሮሶና። ታ አሳዉ፥ ህንተና ካለይሳት ባለꬆሶና፤ ህንተ ብያ ኦግያፐ ካረ ከሶሶና።

13 ጎዳይ ባ አራታን ኡትስ፤ አሳ ቦላ ፕርዳናዉ ጊገትስ። 14 ጎዳይ ደርያ ጭማታነ ካለይሳታ ፕርዳናዉ ሺሽድ፥ “ታ ዎይነ ጋድያ ꬋይስዳይ ህንተና፤ ማንቆታፐ ቦንቅዳይስ ህንተ ሶን ደኤስ። 15 ህንተ ታ አሳ አይስ ትንቸረቲ? ማንቆታ ሶምኡዋ አይስ ካሬቲ?” ያጌስ ኡባፈ ዎልቃማ ጎዳይ።

16 ጎዳይ፥ “ፅዮነ ማጫሳት ኦቶርትዶሶና፤ ባንታ ቆꬍያ አዱስድ፥ ባንታ አይፍያን ቃምኦቶሶና፤ ባንታ ሄመꬃ ላምድ፥ ባንታ ቶሆ አልቡዋ ጊርስሸ ሄመቶሶና። 17 ሄሳ ግሾ፥ ጎዳይ ፅዮነ ማጫሳ ሁጵያ ꬉሳን ኩንꬃና፤ ጎዳይ ኤንታ ሁጵያ ቦአያና” ያጌስ።

18 ሄ ጋላስ ጎዳይ ፅዮነ ማጫሳ አሌቆታ፥ ሄስካ፥ ቶሆ አልቡዋ፥ ሻሽያ፥ ቆ ዎርቃ፥ 19 ሀይꬃ ዎርቃ፥ ኩሸ አምባረ፥ ሶምኦ ካማ፥ 20 ሁጰ ካማ፥ ቀሰ ሳንꬃላታ፥ ዳንጩዋ፥ ሽቱዋ፥ ጎዝዳ፥ 21 ሲ ዎርቃ፥ ብራ ምግዱዋ፥ 22 ኮይሰ ማኡዋ፥ አዱሳ ማኡዋ፥ ካባ፥ ቦርሳ፥ 23 ማስቶትያ፥ ሊኑዋ፥ ሁጰ አሌቆታ፥ ሻርብያ ኡባ ኤንታፈ ኤካና።

24 ሽቶ ግሾ ፅንቆ፥ ዳንጮ ግሾ ዎዶሮ፥ ጎፋረ ግሾ ቦአ፥ ኮይሰ ማኦ ግሾ ካዮ ማኦ፥ ሎኦተꬃ ግሾ ቤታ ግዳና።

25 ነ አሳት ማሻን፥ ነ ኦላንቾት ኦላን ሀይቃና። 26 ፅዮነ ፐንገት ዬካናነ ዘሌላና፤ ካዮታዳ ሳአን ኡትዳ ማጫሳዳ ሀናና።