1 አሞፀ ናአይ እሳያስ ይሁዳባነ የሩሳላመባ በእዳይስ ሀይሳ።

2 ዉርሰꬃ ጋላሳታን ጎዳ ኬꬃይ ኬፀትዳ ዙማይ፥ ዙማታ ኡባፈ ꬎቁ ግድ በንታና፤ ዙማ ኡባፈ ቦላራ ꬎቁ ጋና። ካዎተꬃት ኡባይ እያኮ ባና። 3 ህገይ ፅዮነፐ፥ ጎዳ ቃላይ የሩሳላመፐ ከይያ ግሾ፥ ዳሮ አሳይ ይድ፥ “አነ ሃይተ! ጎዳ ዙማኮ፥ ያይቆባ ፆሳ ኬꬃኮ ከዮስ። ኑኒ እያ ኦግያን ባና መላ እ ኑና ባ ኦግያ ታማርሳና” ያጋና። 4 እ ካዎተꬃታ ግዶን ፕርዳና፤ ዳሮ አሳታ ፓላማ ሻካና። ኤንቲ ባንታ ማሻ ማራሻ፥ ባንታ ቶራ ባጫ ከሳና። ካዎተꬃት ካዎተꬃታ ቦላ ማሻ ደንꬆኮና፤ ህዛፐ ኤንቲ ኦላ ትምርተ ታማሮኮና። እዩ 3:10.

5 ህንተኖ፥ ያይቆባ ኮቻቶ፥ ሃይተ! አነ ጎዳ ፖኡዋን ሄመቶስ።

6 ጎዳዉ፥ ነ አሳ፥ ያይቆባ ኮቻታ አጋዳሳ። ኤንቲ ዶሎሀ ባጋ አሳ ብታንነ ፍልስፄመ አሳ ሙሩኑዋን ኩምዶሶና፤ አላጋ አሳራ እስፍዶሶና። 7 ኤንታ ቢታን ብርነ ዎርቀይ ኩምስ፤ ኤንታ ሚሽያስ ዛው ባዋ። ኤንታ ቢታን ፓር ኩምስ፤ ኤንታ ፓራ ጋርያስ ዛው ባዋ። 8 ኤንታ ቢታን ኤቅ ኩምዶሶና፤ ኤንቲ ባንታ ኩሸ ኦሱዋ ጎይኖሶና።

9 ሄሳ ግሾ፥ አሳ ኡባይ ቶሸታናነ ካዉያና። ኤንታ ናጋራ አቶ ጎፓ።

10 ጎዳ ዳጋንꬁዋፈነ ያሽያ ቦንቹዋፈ አታናዉ ዛላኮ ቢተ፤ ቢታ ግዶን ቆሰትተ! 11 ኦቶራንቾት ካዉያና፤ ጬቀተይሳት ጉፃና፤ ሄ ጋላስ ጎዳ ፃላል ꬎቁ ꬎቁ ጋና። 12 ኡባፈ ዎልቃማ ጎዳይ፥ እስ ጋላስ ኦቶራንቾታ፥ ጬቀተይሳታነ ባንታና ꬎቁ ꬎቁ ኦይሳታ ካዉሻና። 13 አዱሳ ልባኖሰ ዝጋታነ ባሳና ዎላ ኡባ ꬋይሳና፤ 14 ꬎቃ ደረታነ ዙማታ ደምባያና። 15 ካታማ ናግያ አዱሳ ሻኮታነ ምኖ ድርሳ ግምበታ ዝቅ ኦꬃና። 16 ጎዳይ ግታነ ሎኦ ማርካበታ ሃꬃን ምትሳና። 17 አሳ ኦቶሮይ ዝቅ ጋና፤ እያ ጬቀተꬃይ ꬋያና። ሄ ጋላስ ጎዳ ፃላል ꬎቁ ꬎቁ ጋና። 18 ኤቃ ኡባይ ፖሎ ꬋያና።

19 ጎዳይ ቢታ ቃꬃናዉ ደንድያ ዎደ እያ ዳጋንꬁዋፈነ እያ ያሽያ ቦንቹዋፈ አታናዉ አሳይ ሹቻ ጎንጎሎንነ ቢታ ኦላን ቆሰታና። 20 ሄ ጋላሳይ አሳይ ጎይናናዉ መꬍዳ ባንታ ብራ ምስለታነ ባንታ ዎርቃ ምስለታ ግሮታስነ ሽርሽቆታስ የጋና። 21 ጎዳይ ቢታ ቃꬃናዉ ደንድያ ዎደ እያ ዳጋንꬁዋፈነ እያ ያሽያ ቦንቹዋፈ አታናዉ ኤንቲ ጎንጎሎ ግዶነ ሹቻ ዛኦ ግዶ ባቃታና።

22 ህዛ ሸምፖይ ሲን ደእያ፥ ሀ ሀይቅያ አሳን አማነቶፍተ። አስ አይ ማዲ?