እሳያሳ ማፃፋ
ጋꬃ ቆፋ
ሀ ማፃፋይ ክ.የ.ስ. 800 ፄቱ ላይꬃ ሄራን የሩሳላመን ደእዳ፥ ባይራ ናበ ግድዳ እሳያሳ ሱንꬃን ፄገቴስ። ሀ ማፃፋ፥ ሄꬑ ግታ በሳን ሻክድ በአናዉ ዳንዳኤቴስ።
1. ሸምፖ 1—39 ጋካናዉ ደእያ ክፍለይ፥ ዎልቃማ ግድዳ አሶረይ፥ ይሁዳ ካዎተꬃ ዋትድ ቆህዳኮ ኦዴስ። ይሁዳ ሄሳ መላ መቶን የግዳይ፥ አሶረ ካዎተꬃ ምኖተꬅ ግዶናሽን፥ አሳ ናጋራነ ፆሰ ኪተቶና እፁዋ። አሳይነ ኤንታ አይሰይሳት፥ ፅሎተꬅነ ሱረ ፕርድ ኩምዳ ደኦኮ ስማና መላ ናበይ ቆንጨን ቆፍሴስ። ፆሰ ኪተተꬃ እፆይ ጋማ ꬋይስድ፥ ꬋዮኮ ካለይሳ ኤራና መላ አኬክሴስ። እሳያስ ያና ላይꬃን፥ አላምያ ፖሎ ሳሮተꬃን አይስያ ዳዊታ ኮቸ ግድዳ ካዎይ ያናይሳ ስንꬃትድ ኦድስ።
2. ሸምፖ 40-55 ጋካናዉ ደእያ ክፍለይ፥ ይሁዳ አሳይ ድኤትድ ባብሎነ ብዳ ዎደ፥ ኤንታ ዱሳይ ኩንድዳይሳነ ኤንቲ ኡፋይስ ቃንፅዳ ዎደታባ ኦዴስ። ናበይ፥ ፆሳይ ባ አሳ ላአ ከሳናይሳነ ኤንቲ ኦራꬃ ዱስ ዶማና መላ ኤንታ የሩሳላመ ዛርያ ዎደይ ማትዳይሳ ኦድስ። ሀ ሸምፖታ ግዶን ዳሮ ከይድ በንትያ ካራ ቆፋይ፥ ፆሳይ ታርከ ጎዳ ግደይሳነ ካዎተꬃታ ኡባስ ሀልችዳ ሀልቹዋ፥ እስራኤለ ባጋራ ፖላናዉ ደኤይሳ አኬክሴስ። ሀ ክፍልያን ናበይ ኦድዳ ሀራባይ፥ ኦይዱ ፆሳ አይልያ ማዝሙረታ (እሳ 42:1-4፤ 49:1-6፤ 50:4-9፤ 52:13—53:12)።
3. ሸምፖ 56-66 ጋካናዉ ደእያ ክፍለይ፥ ድኦፐ የሩሳላመ ስምዳ አሳይነ ፆሳይ እስራኤለ አሳስ ገልዳ ቃላይ ፖለታነኮ ጌሽድ ኤራናዉ ማላ ኮያ ደርያባ ኦይክስ። ኤንቲ ባይራይድ ኦꬃና መላ ኮየትዳ ኦሶት ፅሎተꬅ፥ ሱረ ፕርዳ፥ ሳምባታ ቦንቾ፥ ያርሾ ሺሾነ ቃንፆና ዎሳ።
ሀ ክፍልያን ኤረትዳ ንባበይ ሸምፖ 61:1-2 ቦላ ደእያ ቃላ። እካ፥ “ኡባ ሃርያ ጎዳ አያናይ ታ ቦላ ደኤስ፤ ማንቆታስ ሎኦባ ኦዳና መላ ጎዳይ ታና ትይስ። ዎዛን መቅዳይሳታ ኮላና መላ፥ ድኤትዳይሳታ ላአ ከሳና መላነ ቃሸትዳይሳታ ብላና መላ ጎዳይ ታና ኪትስ” ያጌስ።
ማፃፋ አይፈ ቆፋታ
ፕርዳነ ሀንቆ ትንብተታ (1:1—35:10)
ይሁዳስነ እስራኤለስ ኦደትዳ ኪታታ (1:1—5:30)
እሳያሳ ኪቴተꬃ (6:1-13)
ያና ክርስቶሳባ ኦደትዳ ትንብተታ (7:1—12:6)
አላጋ ካዎተꬃታ ቦላ ኦደትዳ ትንብተታ (13:1—23:18)
መቶ ግዶን ደእያ አሳስ ኡፋይስ ደኤስ (24:1—27:13)
ማካላንቾት ፕርደታና (28:1—35:10)
ህዝቅያሳራ ጋሄትዳ ታርከ (36:1—39:8)
ፆሳይ ባ አሳ አሻናነ ዛራና (40:1—48:22)
ዋየ ኤካናዉ ደእያ አይልያ (49:1—53:12)
ፆሳይ ባ ጫቁዋ ናጌስ (54:1—59:21)
ስንꬃፈ ያና የሩሳላመ ቦንቹዋ (60:1—66:24)
1
1 ኦዝያን፥ እዮአታም፥ አካዝነ ህዝቅያስ ይሁዳን ካል ካልድ ካዎትዳ ዎደ አሞፀ ናአይ እሳያስ ይሁዳባነ የሩሳላመባ በእዳ ቆንጨꬃይ ሀይሳ። 2 ካዎ 15:1-7፤ 15:32—16:20፤ 18:1-20፤ 2 ታር 26:1—32:33.
ስኦና ደረ
2 ሳሎቶ ስእተ፤ ሳአዉ ሀይዛ ስአ፤
ጎዳይ ሀይሳዳ ያጌስ፤
“ታ ናይታ የላዳ ድቻስ፤
ሽን ኤንቲ ታዉ ማካልዶሶና።
3 ቦር ባ ጎዳ ኤሬስ፤
ሀረይካ ባና ሃርዳይሳ ዛዳሉዋ ኤሬስ።
ሽን እስራኤለይ ኤረና፤
ታ አሳይ አኬከና።
4 ህንተኖ፥ ናጋራንቾ ካዎተꬃቶ፥
ባላ ኦሶን ዴፅዳይሳቶ፥
ኢታ ኦꬅያ የለተꬃቶ፥
ቱና ኦሶስ እመትዳ ናይቶ፥
ጎዳ አግዳይሳቶ፥
ህንተና አየ!
እስራኤለ ጌሻ ካꬍደታ፤
እያዉ ዞኮ ዛርደታ።
5 ማካላ ቦላ ማካላ አይስ ጉጄቲ?
አይስ ዛር ዛር ሾጨቴቲ?
ህንተ ሁጰይ ሀርገትስ፤
ህንተ ዎዛናይ ዳቡርስ።
6 ሁጰ ብናናፐ ቶሆ ፁጉንꬅ ጋካናዉ ፓያተꬅ ባዋ፤
ማዱንꬅ፥ ክፅነ ꬉስ ማእስ።
ኤንቲ ጊይቦኮና፥ ዎይኮ ሜጨትድ ቃሸትቦኮና
ዎይኮ ዛይተን ትየትድ ሎፅክቦኮና።
7 “ህንተ ቢታይ ኦፅስ፤
ህንተ ካታማት ታማን ፁገትዶሶና።
ህንተ በእሽን ህንተ ጎሻ አላጋት ኤካና፤
እማꬃ አሳት ህንተ ቢታ ቁኤ ከሳና።
8 የሩሳላመይ ዎይነ ጋደን ደእያ ሻቃራዳ፥
ሌሄ ግዶን ደእያ ጋባዳነ
ሞርከን ተቀትዳ ካታማዳ ሀናዳ አታና።
9 ኡባፈ ዎልቃማ ጎዳይ ኑስ ጉꬃ ኮቸ አሾናኮ
ኑኒ ሶዶመነ ጋሞራ ካታማዳ ሀናናሽን”መ 19:24፤ ሮመ 9:29. ያግስ።
10 ህንተኖ፥ ሶዶመ ሀላቃቶ፥ ጎዳ ቃላ ስእተ!
ህንተኖ፥ ጋሞራ አሳዉ፥ ኑ ፆሳ ህግያ ስእተ!
11 “ህንተ ያርሾ ዳሮይ ታዉ አይ ኦꬂ?
ሀኖ ጋካናዉ ህንተ ታዉ ሺሽዳ ኡርገ ዶርሳነ
ሞꬎ መሄ ፁሳ ያርሾይ ታዉ ግዳና።
ታኒ ኮርማታ፥ ዶርሳ ኡርገታነ
ዴሻታ ሱꬃን ኡፋይትከ።
12 ህንተ ታ ስንꬃን በንታናዉ ያ ዎደ
ታ ኬꬃ ዳባባ ህንተ የꬋና መላ ኦነ ኦይችዳይ?
13 ሀዳ ያርሹዋ ኤሄይሳ አግተ!
ህንተ ጩይስያ እፃነይ ታና ሻቴስ።
አጌና ፄሮን ህንተ ቦንችያ ጋላሳ፥
ሳምባታነ ኢታተꬃን ህንተ ሺቅያ ሺቁዋ ታኒ እፃይስ።
14 አጌና ፄሮን ህንተ ቦንችያ ጋላሳነ
ህንተ ባኣለ ጋላሳታ ታኒ እፃስ፤
ኤንቲ ታዉ ቶሆ ግድዶሶና፤
ታኒ ኤንታ ቶካናዉ ዳንዳእከ።
15 ህንተ ኩሸ ምጭድ ታና ዎስያ ዎደ
ታኒ ታ አይፍያ ህንተፈ ገንꬃና።
ህንተ ኩሸይ ሱꬃን ኩምዳ ግሾ
ህንተ ዳርስ ዎስኮካ ታኒ ስእከ።
16 ሜጨትተ፤ ህንተና ጌሽተ፤
ህንተ ኢታ ኦሱዋ ታ ስንꬃፈ ድግተ፤
ገነ ሀኑዋ አግተ።
17 ሎኦባ ኦሶ ታማርተ፤
ፅሎ ፕርዳ ኮይተ።
ኡንኤትዳይሳታ አሽተ፤ ይኦታስ ኤቅተ፤
አምኤታስ ሞተትተ”
ያጌስ ጎዳይ።
18 “ሃይተ፤ አነ ዎል አማንꬆስ። ህንተ ናጋራይ ባራ ቢታዳ ዞእኮካ፥ ሻቻዳ ቦፃና፤ ሱꬃዳ ዞእኮካ ፑቶዳ ቦፃና። 19 ህንተ ኤሮ ግድ ታዉ ኪተትኮ ቢታ አንጁዋ ማና። 20 ሽን ህንተ እፃስ ግድ ማካልኮ፥ ማሻን ሜተታና” ያጌስ ጎዳይ ባ ዶናን።
21 አማነትዳ ካታምያ ዋናዳ ላይማ ግዳዴ? ካሰ ሱረተꬅነ ፅሎተꬅ እ ግዶን ኩምስ፥ ሽን ሀእ ሸምፖ ዎይሳት እ ግዶን ደኤስ። 22 ነ ብራይ ባልትስ፤ ነ ማልኦ ዎይነይ ሃꬃን የለትስ። 23 ህንተ ሀላቃት ማካላንቾታነ ካይሶ ላገ ግድዶሶና፤ ኤንቲ ኡባይ ዎꬋፈ ዶሰይሳታነ ኩሸ ፄለይሳታ። ይኦታስ ሱረ ፕርዶኮና፤ አምኤታ ዋሱዋ ስኦኮና።
24 ሄሳ ግሾ፥ ጎዳይ፥ ኡባፈ ዎልቃማ ፆሳይ፥ እስራኤለ ዎልቃማይ፥ ሀይሳዳ ያጌስ፤ “ሀእ ታኒ ታ ሞርከታ ቦላ ታ ሀንቁዋ ጉሳና፤ ታራ ኤቀተይሳታ ሀሎ ከያና። 25 ታኒ ታ ኩሽያ ነ ቦላ ዛራና፤ ነ ባልተꬃ ጌሻና፤ ነ ቱናተꬃ ኡባ ኔፐ ድጋና። 26 ታኒ በንይሳዳ ነ ሀላቃታ፥ ኮይሮይሳዳ ነ ዞራንቾታ ደንꬃና። ሄሳፈ ጉየ፥ ኔኒ አማነትዳ ቢታ፤ ፅሎተꬃ ካታማ ጌተታና” ያጌስ።
27 ፅዮነይ ሱረ ፕርዳን፥ ባንታ ናጋራ ፓፀይሳትካ ፅሎተꬃን ዎዘታና። 28 ሽን ማካላንቾትነ ናጋራንቾት እስፈ መቃና፤ ጎዳ አገይሳት ꬋያና። 29 ህንተ ኡፋይትዳ ያርሾ ዎላን ዬላታና፤ ህንተ ዶርዳ ኮራን ካዉያና። 30 ህንተ ሀይꬅ ቆቆፈትድ ዉርዳ ዎላዳነ ሃꬅ ꬋይዳ አታክልተ በሳዳ ግዳና። 31 ባና ምኖ ገይ ቡፃ ግዳና፤ እያ ኦሶይካ ፖልኡ ግድ ቶእያ ታማ ግዳና፤ ኤንቲ እስፈ ፁገታና፤ ሄ ታማ ቶይሳና አስ ባዋ።