ታ እሻ ግድዳኮ አይበ!

ታና ኦንካ ቦረናሽን።

ታና ታማርስዳ ታ አየ ሶ ገልሳርክናሽን።

ሎእያ ዎይነ ኡሻ ታ ነና ያን ኡሻርክና።

ነ ኡሻቻ ኩሸይ ታና ቆመስ።

ታ ሲቆይ ባ ዎደ ደንዳና ጋካናዉ፥

ኮይሮትድ ህንተ እያ ደንꬆናዳ ሀዳራ ጋይስ።

መላ ቢታፈ ያራ ሀና ኦኔ?

አፕለ ምꬃ ጋርሳን ነ ዝንእዳሽን፥

ነና ታ ባርክሳስ።

ነ ቀስያን ማታመዳ ታ ፃላላ ኦይካ።

ቃናተይ ስኦለ መላ ኢታ፤

እያ ላጮይ ፆሳ ታማ ላጮ መላ።

ድኦይካ ሜጭድ ኤፋናዉ ዳንዳኤና።

ሲቆይ ሚሸን ሻመቶና ግሾ፥ አስ እያ ካꬌስ።

አዝን እዮ ኦይችኮ፥ ኑ እዉ አይ ኦꬃኔ?

ኑኒ እ ቦላ አዱሳ ብራ ግምበ ግምባና፤

እያ ድርሳ ፐንገ ግድያኮ ዝጋ እብ መꬋና።

ታ ꬋንꬃይ ግምበ ቦላ ደእያ ሻኮ መላ፤

ታኒ ታ ሲቁዋራ ደእያ ዎደ እ ታናን ኡፋይቴስ።

ሄ ዎይነ ጋድያ ኡነ ኦይሳታስ እሚስ።

እሶይ እሶይ ሙኩሉ ብራ እያዉ ኤሆሶና።

ሶሎሞነ፥ ኔኒ ሙኩሉ ብራ ኤካ፤

ኡነ ኤክድ ኦይሳት ናምኡ ፄቱ ብራ ኤኮ።

ነ ላገት ነ ቃላ ስአናዉ ኮዮሶና፤

ነ ቃላ ታናካ ስሳ።

ሽቶ ማታይ ዶልያ ደረታ ቦላራ፥

ጉፕያ ገንኤ ዎይኮ ዎሽኤ ማራዳ ሀና።