1 ኦዝያና ናአይ እዮአታማ ናአይ አካዝ፥ ይሁዳን ካዎትዳ ዎደ አራመ ካዎይ ራዝንነ እስራኤለ ካዎይ ራማላ ናአይ ፋቁሄይ የሩሳላመ ኦላናዉ ይዶሶና፤ ሽን ፆናናዉ ዳንዳእቦኮና። 2 ካዎ 16:5፤ 2 ታር 28:5-6.

2 አራመ ቢታይ ኤፍሬማ ቢታራ እስፈ ኦላስ ጫቅዳይሳ ይሁዳ ካዎይ ስእዳ ዎደ፥ ዎራን ደእያ ምꬃ ጫርኮይ ቃይሳዳ፥ አካዛ ዎዛናይነ አሳ ዎዛናይ ዳጋማን ቃፅስ።

3 ጎዳይ እሳያሳኮ፥ “ኔራነ ነ ናኣ ሼር-ያሱባራ*ሼር-ያሱባ፦ ሀ ሱንꬃ ብርሸꬃይ “ጉꬃት ስማና” ጉሱ (እሳ 10:20-22)። አካዛራ ጋሄታናዉ ቢተ፤ ህንተ እያ ማኦ ሜጭያ ጎሻኮ ኤፍያ ኦግያ ማታን ቆሞ ባጋን ደእያ ሃꬃ ኦላ ዉርሰꬃን ህንተ እያ ደማና። 4 እያዉ ሀይሳዳ ያጋዳ ኦዳ፤ ‘ናገታ፤ ዎፑ ጋ፤ ያዮፋ። ሀ ናምኡ ካዎት ታማፐ አትድ ጩያ ዱሩማ መላ ግድያ ግሾ፥ አራመ ካዋ ራዝናነ ራማላ ናኣ ሀንቁዋስ ያዮፋ፤ ነ ዎዛናይ ዳጋሞፎ።’ 5 አራመ ቢታይ፥ ኤፍሬማ አሳራነ ራማላ ናኣራ ነ ቦላ ኢታባ ማቀትዶሶና።” 6 ኤንቲ “አነ ይሁዳ ኦልድ ኦይኮስ፤ እያ መንረꬅድ ኑ ግዶን ሻክ ኤክድ፥ ፃቤላ ናኣ ካዎꬃና ያጎሶና” ያጋ።

7 ግዶሽን፥ ኡባ ሃርያ ጎዳይ፥ “ሀ ኤንታ ማቆይ ምነና፤ ኤንታ ዞረታይ ፖለተና። 8 ዳማስቆይ አራመ ሁጰ፤ ካዎይ ራዝን ዳማስቆ ሁጰ። ኡሱፑን ታማነ እቻሹ ላይꬃ ግዶን ኤፍሬም ላለትድ ካዎተꬅ ግዶና አታና። 9 ኤፍሬማ ሁጰይ ሳማርያ፤ ራማላ ናአይ፥ ፋቁሄይ ሳማርያ ሁጰ። ህንተ፥ ህንተ አማኑዋን ምኖና እፅኮ፥ ኤቃናዉ ዳንዳኤከታ” ያጌስ።

10 ቃስካ ጎዳይ አካዛኮ፥ 11 “ቦላ ሳሉዋፐ ዎይኮ ጋርሳ ሳኣፐ ጎዳይ፥ ነ ፆሳይ ነዉ እስ ማላ እማና መላ ኦይቻ” ያግስ። 12 ሽን አካዝ፥ “ኦይችከ፤ ኦይቻዳ ጎዳ ፓጭከ” ያግስ።

13 ያትን፥ እሳያስ፥ “ህንተኖ፥ ዳዊታ ሶ አሳዉ፥ ስእተ! ህንተ አሳ ዳንዳአ ፓጨይስ አይ ጉፅን፥ ቃስ ታ ፆሳ ዳንዳአ ፓጨቲ? 14 ሄሳ ግሾ፥ ጎዳይ ባ ሁጰን ህንተዉ ማላ እማና፤ ጌላእያ ቃንꬃታዳ አደ ናአ የላና፤ እያ ሱንꬃካ አማኑኤላ †አማኑኤላ፦ ሀ ሱንꬃ ብርሸꬃይ “ፆሳይ ኑራ ደኤስ” ጉሱ። ጋዳ ፄጋና። ማቶ 1:23. 15 እ፥ ኢታ እፆነ ሎኦ ዶሮ ኤርያ ዎደ መቃ ማꬅነ ኦይስ ማና። 16 ሽን ናአይ ኢታ እፆነ ሎኡዋ ዶሮ ኤራናፐ ስን፥ ኔኒ ያይያ ናምኡ ካዎታ ቢታት ባይሳታና። 17 ኤፍሬም ይሁዳፐ ሻከቶሳፐ ዶምን ሀንቦና መቶ ዎደ ጎዳይ ነ ቦላ፥ ነ አሳ ቦላነ ነ አዋ ሶ አሳ ቦላ ኤሀና፤ እ ኤሀናይካ አሶረ ካዋ” ያግስ።

18 ሄ ጋላስ ጎዳይ፥ ሃሆ ሻፋ ጋፃን ደእያ ግብፀ ኡዱንፀታነ አሶረ ማꬃታ ሱይቅድ ፄጋና። 19 ያትን፥ ኤንቲ ኡባይ ይድ፥ መላ ቢታ ዛንጋራን፥ ሹቻ ጎንጎሎን፥ አጉንꬅ ደእያ ቡረንነ ሃꬃ ኦላታን ኡታና።

20 ሄ ጋላስ ጎዳይ ኤፍራፂሳ ሻፋ ሄፍንꬃ ባጋፈ ጋርፅዳ ሽግርያን፥ አሶረ ካዋን፥ ህንተ ሁጵያ ቡሉሳና፤ ህንተ እክስያነ ህንተ ቡቻ ሜዳና።

21 ሄ ጋላስ እስ አሳስ እስ ሚዝነ ናምኡ ዴሻ ፃላል አታና። 22 ግዶሽን፥ ኤንታ ማꬃይ ዳሮ ግድያ ግሾ እ መቃ ማꬅ ኡስታና፤ ሄ ቢታን አትዳ አሳ ኡባይ መቃ ማꬅነ ኤስ ማና።

23 ሄ ጋላስ እስ ሙኩሉ ብራን ዋሸትያ ሙኩሉ ዎይነ ቶሆት ደእያ በሳ ኡባን ክንቾተይነ አጉንꬅ ዶላና። 24 ቢታ ኡባን ክንቾተይነ አጉንꬅ ኩምዳ ግሾ፥ አሳይ ያ ብያ ዎደ ዶንገ ኦይክድ ባና። 25 ካሰ ኮንተን ኦꬅዳ ዙማታን ሀእ ክንቾተይነ አጉንꬅ ኩምዳ ግሾ ያይድ፥ እስ አስካ ያ ቤና። ሽን መሄይነ ዶርስ ሄመትያ በሲ ግዳና።