1 ጎዳይ ታኮ፥ “ግታ ሳሌዳ ኤካዳ፥ ‘ድአናዉ ኤለሳ! ቦንቃናዉ ድርጋ!’ ያጋዳ ናባበትያ ፕዳለን ፃፋ። 2 ካህንያ ኡራያነ ባራካ ናኣ ዛካርያሳ አማነትያ ማርካ ኦꬃዳ ታኒ ፄጋና” ያግስ።

3 ሄሳፈ ጉየ፥ ታኒ ናበ ግድዳ ታ ማቸራ አቃስ፤ እያ ቃንꬃታዳ አደ ናአ የላሱ። ጎዳይ ታኮ፥ “እያ ሱንꬃ፥ ‘ማሃር-ሻላል-ሀሽ-ባዝ’ ያጋዳ ፄጋ። 4 ናአይ፥ ‘አቦ፥ እሞ’ ግድ ፄስ ኤራናፐ ስን አሶረ ካዎይ፥ ዳማስቆ ዱረተꬃነ ሳማርያ ሻሉዋ ኤክድ ባና” ያግስ።

5 ቃስካ ጎዳይ ታኮ ሀይሳዳ ያግስ። 6 “ሀ አሳይ ሎዳራ ጎግያ ሳልሆመ ሃꬃ እፅድ፥ ራዝናነ ራማላ ናኣ ኡፋይትድ ኤክዶሶና። 7 ሄሳ ግሾ፥ ጎዳይ ምኖነ ዳሮ ግድዳ ኤፍራፂሳ ሃꬃ፥ አሶረ ካዋ፥ እያ ኦላንቾታራ ኤሀና ሀኔስ። እ ሃꬅ ክፅድ ኩመይሳዳ ጋፃ ኡባ ማእድ ጎጋና። 8 ድእሸ ይሁዳ ገላና፤ ክፃይ ቆ ጋካናዉ ኩምድ ያራ ካንꬃና።” አቤት አማኑኤላ፥ እያ ቀፍያ ምጨꬃይ ነ ቢታ ኡባ ማእስ።

9 ህንተኖ ካዎተꬃቶ፥ እስፈ ኦላስ ሺቅተ፥ ሽን ህንተ ꬋያና። ሃሆ ቢታን ደእያ አሳቶ፥ ስእተ፤ ኦላስ ጊግተ፤ ሽን ህንተ ሊቃና! ኤ፥ ኦላስ ጊግተ፤ ህንተ ዉራና። 10 ፆሳይ ኑራ ደእያ ግሾ፥ ኦላስ ማቀትተ፥ ሽን ህንተ ማቆይ ካንና፤ ሀልችተ፥ ሽን ህንተ ሀልቾይ ሀላና።

11 “ጎዳይ ባ ምኖ ኩሽያ ታ ቦላ ዎꬅድ፥ ታ ሀ አሳ ኦግያን ቦና መላ ታዉ ምንꬅድ ኦድስ። 12 ሀ አሳ ማቆ ኡባ ማቆ ጎፕተ፤ ኤንቲ ያይያባ ያዮፍተ፤ ዳጋሞፕተ። 13 ህንተ ጌሽ ጋናዉ በሰይ ኡባፈ ዎልቃማ ጎዳ፤ እያዉ ያያናዉነ ዳጋማናዉ በሴስ። 14 እ፥ ጌሻ በሲ ግዳና፤ ሽን ይሁዳስነ እስራኤለስ እ፥ ꬉበ ሹችነ ኩንድስያ ዛላ ግዳና። የሩሳላመን ደእያ አሳስ እ ግተነ ፅሄ ግዳና። 15 ኤንታፈ ዳሮት ꬉበታና፤ ኩንድድ መአና፤ ፅሄን ኦይከትድ ድኤታና” ያግስ።

16 ታ ኦደይሳ ናጋ፤ ታ ታማረታ ግዶን ህግያ አታማ። 17 ታኒ ባ ሶምኡዋ ያይቆባ ዘረꬃፈ ገንꬅያ ጎዳ ናጋና፤ እያን አማነታና። እብራ 2:13.

18 ታናነ ታዉ ጎዳይ እምዳ ናይታ በእተ። ኑኒ ፅዮነ ደርያን ደእያ ኡባፈ ዎልቃማ ጎዳፐ እስራኤለ አሳስ ማላነ ማላታ። እብራ 2:13.

19 “ሱይቅሸነ ካልካሽሸ ኦድያ ማሮታነ ሞይትለታ ኦይችተ” ያግድ ህንተና ዞርያ አሳይ ደኦሶና። ደኦን ደኤይሳታስ ሀይቅዳይሳታ ኦይቸይሳፈ አሳይ ባንታ ፆሳ ኦይቻናዉ በሰኔ? 20 ህግያነ ጎዳ ማርካ ስእተ! ሄ አሳት ሀ ቃላዳ ሃሳዮና እፅኮ ኤንታዉ ሳእ ዎንተና።

21 አሳይ ዋየትሸነ ኮሻትሸ ቢታ ቦላ ቶይላታና። ኤንቲ ኮሻትዳ ዎደ ይሎትድ፥ ፑደ ሳሎ ፄልድ ባንታ ካዋነ ባንታ ፆሳ ባዳና። 22 ሳኣ ዱገ ፄልያ ዎደ ዋየ፥ ꬉማነ ያሽያ ጫጋና በአና፤ ኤንቲ ሳካና ꬉማን ሆለታና።