1 ግዶሽን፥ ዋየትዳይሳታስ ህዛፐ ጉየ ꬉመና። በን ዎደ ጎዳይ ዛብሎና ቢታነ ንፍታለመ ቢታ ካዉሽስ። ሽን ስንꬃፈ መደትራነ አባ ኦግያን ደእያ ቢታነ ዮርዳኖሰ ሻፋፐ ሄፍንꬃን ደእያ አይሁደ ግዶና አሳይ ደእያ ጋልላ ቢታ እ ቦንቻና።

2 ꬉማን ሄመትያ አሳይ ዎልቃማ ፖኦ በእስ፤ ቃስ ሀይቆ ꬉማን ደኤይሳታስ ፖኦይ ፖእስ።

3 ኔኒ ካዎተꬃ ዳርሳዳሳ፤ ኤንታ ኡፋይሳ ጉጃዳሳ። አስ ካꬅ ሺሽያ ዎደ ኡፋይተይሳዳ ዎይኮ ድኡዋ ሻክድ ኤክያ ዎደ ኡፋይተይሳዳ ነ ስንꬃን ኡፋይታና። 4 ኔኒ ምድያመ ቢታ ፆንዳይሳዳ ኤንታ ዴፆ ቃምባራ፥ ኤንታ ጋናስ ጊግዳ ፃምአነ ኤንታ ኡንኤይሳታ ጉምባ መንꬃዳሳ። 5 ኦላንቾታ ጫማይነ ሱꬃን ሙኑቀትዳ ማኦ ኡባይ ታማን ፁገታና፤ ታማስ ኦይሰꬆ ግዳና። 6 ኑስ ናእ የለትስ! አደ ናእ ኑስ እመትስ! ካዎተꬃ ማት እያ ሀሽያን ግዳና፤ እያ ሱንꬃይ፥ “ማላልስያ ዞራንቾ፥ ዎልቃማ ፆሳ፥ መርና አዋ፥ ሳሮተꬃ ሀላቃ” ጌተታና። 7 እያ ካዎተꬃ ዳልጋተꬃስነ እያ ሳሮተꬃስ ዛው ባዋ። ሀችፈ ዶምድ፥ መርና ጋካናዉ ሱረ ፕርዳንነ ፅሎተꬃን ምንꬃናዉነ ኤሳናዉ ዳዊታ አራታንነ እያ ካዎተꬃን እ ካዎታና። ኡባፈ ዎልቃማ ጎዳ ቃናተይ ሀይሳ ኦꬃና።ሉቃ 1:32-33.

8 ጎዳይ ያይቆባ ዘረꬃ ቦላ ፕርዳ ቃላ ኪትን፥ እስራኤለ ካዎተꬃ ቦላ ዎꬍስ። 9 ኤፍሬማ አሳይነ ሳማረ ካታማ አሳይ ሀይሳ ኦꬅዳይ ጎዳ ግደይሳ ኤርሸ፥ ኦቶሮንነ ጬቆን፥ 10 “ፁበፐ ኬፀትዳ ኬꬃት ላለትዶሶና፤ ሽን ኑ ዛሪድ ማሰትዳ ሹቻን ኬፃና፤ ቦባ ምꬃት ቃንፀትዶሶና፤ ሽን ኑ ኤንታ በሳን ዝጋታ ላማና” ያግዶሶና።

11 ሽን፥ ፆሳይ ራሶና ሞርከታ ምንꬃና፤ ኤንታ ቦላ ኤሀና፤ ኤንታራ ኤቀትያ ሞርከታ ኤንታ ቦላ ደንꬅስ። 12 ዶሎሀፐ አራመታ፥ ዉሎሀፐ ፍልስፄመታ ደንꬅን፥ ኤንቲ ባንታ ዶና ዶይድ፥ እስራኤለ ምትዶሶና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።

13 ግዶሽን፥ አሳይ ባንታና ሾጭዳይሳኮ ስምቦኮና፤ ኡባፈ ዎልቃማ ጎዳ ኮይቦኮና። 14 ሄሳ ግሾ፥ እስ ጋላስ ጎዳይ እስራኤለፐ ሁጰነ ጎይና፥ ዛምባ ዳሻነ ማቃ ቃንፃና። 15 ጭማትነ ቦንቸትዳይሳት ሁጰ፤ ዎርዶ ታማርስያ ናበት ጎይና። 16 ሀ አሳ ካለይሳት ባለꬆሶና፤ ኤንታ ካለይሳትካ ባሎሶና። 17 ሄሳ ግሾ፥ ጎዳይ ኤንታ ናአተꬃታን ኡፋይተና፤ ይኦ ናይታስነ አምኤታስ ቃተና። አስ ኡባይ ኢታነ ፆሰ ኤሮናይሳ ግዳና፤ ኡባይ ባ ዶናን ኢታባ ኦደቴስ። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።

18 ታም ክንቾተነ አጉንꬅ መይሳዳ ኢታተꬅ ፁጌስ፤ ስከትዳ ዎር ፁገትን፥ ጩያይ ቱሳዳ ከየይሳዳ ከዬስ። 19 ኡባፈ ዎልቃማ ጎዳ ሀንቁዋን ቢታይ ፁገታና፤ አስካ ታማ ኦይሰꬅያባ ግዳና፤ ኦንካ ባ እሻ አሻናዉ ቆፐና። 20 ኤንቲ ኡሻቻ ባጋራ ቦንቃና፥ ሽን ኮሻታና፤ ኤንቲ ሀድርሳ ባጋራ ማና፥ ሽን ካሎኮና፤ ኤንቲ ባንታ የልዳ ናይታ ማና። 21 ምናሰይ ኤፍሬማ፥ ኤፍሬምካ ምናሰ ማና፤ ኤንቲ እስፈ ግድድ ይሁዳ ቢታ ሞርካና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።