1 ኢታ ህገነ ኡንኤꬅያ አዋጆ ከሰይሳታ አየ! 2 ሄሳን ኤንቲ ማንቆታ፥ አምኤታነ ይኦታ ፕርዳ ጌላዮሶና፤ አምኤታነ ይኦታ አቁዋ ቦንቆሶና። 3 እ፥ ሃሆ ቢታፈ ያ መቱዋን ሴርያ ዎደ ህንተ ዋናኔ? ማዶ ደማናዉ ኦደኮ ባቃታኔ? ህንተ ሻሉዋ አዉን ቆታኔ? 4 ህንተ ድኤትዳ አሳራ ጎሸታና፤ ሀይቅዳ አሳ ግዶን ዝንአና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።

5 ጎዳይ ሀይሳዳ ያጌስ፤ “ታ ይሉዋስ ፕርጮነ ታ ሀንቁዋስ ፃምአ ግድዳ አሶረ ቢታ አየ!እሳ 14:24-27፤ ናሆ 1:1-3፤ ሶፎ 2:13-15. 6 ኤንታ ሻሉዋ ድአናዳነ ቦንቃናዳ፤ ኦገ ኡርቃዳ ኤንታ የꬋናዳ ፆሰ ኤሮና ካዎተꬃ ቦላ ታኒ አሶረ ኪታና፤ ታና ሀንቀꬅዳ አሳ ቦላ እያ የዳና። 7 ሽን አሶረ ካዎይ ሀይሳ ሀልችቤና፤ እያ ዎዛናይ ሀይሳ ቆፕቤና። እ ቆፕዳይ ዳሮ ካዎተꬃታ ꬋይሳናሳ። 8 ሄሳ ግሾ እ ያግድ ጬቀቴስ፤ ‘ታ ቶራ ሞጮናት ኡባይ ካዎታ ግዶኮናዬ?’ 9 ካልኖይ ካርካምሻ ካታማ መላ ግደነዬ? ሀማት አርፋዳ ካታማ መላ ግደነዬ? ሳማረይ ዳማስቆ ካታማ መላ ግደነዬ? 10 የሩሳላመንነ ሳማረን ደእያ ኤቃታፐ ዳርያ ኤቃታ ጎይንያ ካዎተꬃታ ሴራናዉ ታኒ ታ ኩሽያ የዳስ። 11 ታኒ ሳማረ ካታማ ቦላነ እያ ኤቃ ምስለታ ቦላ ኦꬅዳይሳዳ የሩሳላመ ካታማ ቦላነ እያ ኤቃ ምስለታ ቦላ ኦꬅክናዬ?” ያግስ።

12 ጎዳይ ፅዮነ ደርያ ቦላነ የሩሳላመ ቦላ ባ ኦሱዋ ኡባ ፖልዳፐ ጉየ፥ አሶረ ካዋ እያ ኦቶሩዋስነ ጬቁዋስ እያ ሴራና።

13 አሶረ ካዎይ ሀይሳዳ ያጌስ፦ “ታ ኩሸ ምኖተꬃን፥ ታ ጭንጫተꬃንነ ታ አኬካን ሀይሳ ኦꬃስ። ታኒ ካዎተꬃታ ግዶን ደእያ ዛዋታ ሾዳስ፤ ኤንታ ሻሉዋ ቦንቃስ፤ ታ ዎልቃን ካዎተꬃታ አራታፐ ዎꬍሳስ። 14 አስ ካፎ ኬꬃን ኩሸ የደይሳዳ ታኒ ካዎተꬃ ሻሉዋን ታ ኩሽያ የዳስ። ቃስ ዶገትዳ ጱጱለታ ሺሸይሳዳ ታኒ ቢታ ኡባ ሺሻስ። ባ ቀፍያ ቃꬅዳይ ዎይኮ ዶና ጱቅዳይ ዎይኮ ዋስዳይ እሶይካ ባዋ” ያግስ።

15 ካልት ባራ ቃንፅያ አድያ ቦላ ደንዳናዉ ዳንዳኢ? ዎይኮ ማጋዘይ ባናን ጎኤትያ አድያ ቦላ ኦቶራናዉ ዳንዳኢ? ኩሸይ ደንꬆና ፃምእ ባና ባዉ ደንꬂ? ጉፈይ ኦይክያ አስ ባይና ባዉ ሄመቲ? 16 ሄሳ ግሾ፥ ጎዳይ፥ ኡባፈ ዎልቃማ ፆሳይ፥ እያ ምኖ ኦላንቾታ ቦላ ግልቅስያ ሀርገ የዳና። እያ ቦንቹዋ ላፆ ታም ማና። 17 እስራኤለ ፖኦይ ታማ ግዳና፤ ኤንታ ጌሻይ ላጮ ግዳና። እያ አጉንꬃነ እያ ክንቾትያ እስ ጋላስ ፁጋናነ ማና። 18 ሀርገይ አሰ ግልቅሰይሳዳ ጎዳይ ባ ዎራ ምꬃ ቦንቹዋነ ባ አራዳ ቢታ ቦንቹዋ ꬋይሳና። 19 ዎራን አትያ ምꬃይ ዳሮ ጉꬅ ግድያ ግሾ፥ ሀር አቶሽን ጉꬃ ናእካ ታይብድ ዉርሳና።

20 ሄ ዎደ እስራኤለፐነ ይሁዳፐ አትዳ ጉꬃት ባንታና ሾጭዳይሳን ግዶናሽን፥ ቱማ ጎዳን፥ እስራኤለ ጌሻን ዘምፓና። 21 አትዳ ይሁዳ አሳይ ዎልቃማ ፆሳኮ ስማና። 22 ነኖ እስራኤለ፥ ኔኒ አባ ጋፃን ደእያ ሻፍያ መላ ዳርኮካ፥ አትዳ ጉꬃታ ፃላል ስማና። ፅሎተꬅ ኩምዳ ꬋዮይ እያ አሳስ አዋጀትስ። 23 ኤ፥ ጎዳይ፥ ኡባፈ ዎልቃማ ፆሳይ ሳአ ኡባ ቦላ ኤሀናዉ ቆፕዳ ꬋዩዋ ኤሀና።

24 ሄሳ ግሾ፥ ጎዳይ፥ ኡባፈ ዎልቃማ ፆሳይ ሀይሳዳ ያጌስ፦ “ፅዮነን ደእያ ታ አሳዉ፥ ግብፀት ኦꬅዳይሳዳ አሶረት ህንተና ፃምአን ሾጭያ ዎደነ ባንታ ጉምባ ህንተ ቦላ ደንꬅያ ዎደ ያዮፍተ። 25 ጉꬃ ዎደፐ ጉየ፥ ታኒ ህንተ ቦላ ሀንቀትዳይሳ አጋና፤ ሄሳፈ ጉየ፥ ታ ሀንቆይ ኤንታ ꬋይሳናዉ ደንዳና” ያጌስ።

26 ኡባፈ ዎልቃማ ጎዳይ ኦሬባ ሹቻ ማታን ምድያመታ ሾጭዳይሳዳ ኤንታ ልሶን ሾጫና። እ ግብፀን ኦꬅዳይሳዳ ባ ፃምአ አባ ቦላ ደንꬃና። 27 ሄ ጋላስ፥ እያ ቶሆይ ህንተ ሀሽያፐ ዎꬋና፤ እያ ቃምባራይ ህንተ ሞርገፈ ክቻና። ህንተ ኦርድዳ ግሾ ቃምባራይ መቃና።

28 ሞርክያ ዎታዳራት ጋየ ካታማ ገልዶሶና፤ ምግሮናራ ካንꬅዶሶና፤ ባንታ ኦላ ሚሽያ ምክማሳ ዎꬅዶሶና። 29 ኤንቲ ኦግያራ ካንꬅ አꬍድ፥ ጌባን አቅዶሶና። ራማን ደእያ አሳይ ኮኮርዶሶና፤ ግብአን፥ ካዋ ሳኦላ ካታማን ደእያ አሳይ ባቃትዶሶና። 30 ጋልማ አሳዉ፥ ዋሶ ጎችተ! ላይሻ አሳዉ፥ ስእተ! አናቶታ አሳዉ፥ ኦይሻ ዛርተ! 31 ማድማና አሳይ ባቃትዶሶና፤ ገብማ አሳይ ባንታ ሸምፑዋስ ቆሰትዶሶና። 32 ሞርክያ ዎታዳራት ሀች ኖባን ደኦሶና፤ ኤንቲ ፅዮነ ዙማ ቦላ ኤቅድ፥ ባንታ ኩሽያ ቃꬅድ፥ የሩሳላመ ካታማ ባብሶሶና።

33 ሄኮ፥ ጎዳይ፥ ኡባፈ ዎልቃማ ፆሳይ፥ ታሸታ ግታ ዎልቃን ሻቃና፤ አዱቅዳ ምꬃት ቃንፀታና፤ ꬎቃ ግዳይሳት ካዉያና። 34 ጎዳይ ስከትዳ ዎራ ካሎታና ጋካናዉ ቃንፃና፤ ልባኖሰይ ዎልቃማ ስንꬃን ኩንዳና።