1 ሞአበ አሳዉ፥ ባዞ ብያ ኦግያን ደእያ ሴላፐ ኡርገ ዶርሳታ እሞታ ኦꬅድ፥ የሩሳላመን ደእያ ቢታ ሃረይሳስ የድተ። 2 ሞአበ ማጫሳይ ባንታ ኬꬃፈ ጎደትዳ ካፎታዳ አርኖና ሻፋ ፕንያ በሳን ላለታና። 3 ሞአበ አሳይ ይሁዳ አሳኮ፥ “ኑና ዞርተ፤ ኑና ኑ ሞርከታፐ አሽተ፤ ሴታ ጋላሳን ምꬃ ኩያዳ ህንተ ኩያ ኑ ቦላ ኩያይተ። ጎደተይሳታ ቆስተ፤ ቆሰትዳይሳታ አꬅድ እሞፕተ። 4 ሞአበፐ ጎደተይሳት ህንተ ግዶን ደኦ፤ ኤንታ ꬋይሳናዉ ኮየይሳታፐ ቆሰትድ አትያ በሰ ግድተ። ኤንታ ኡንኤይሳት ዉርዶሶና፤ ኤንታ ꬋዮይ አትስ፤ ኦቶራንቾት ቢታፈ ꬋይዶሶና። 5 ሄሳፈ ጉየ፥ ሲቆን እስ ካዎተꬃ አራታይ ኤቃና፤ ሄ አራታን፥ ዳዊታ ኮቻፈ እስ አማነትያ ካዎይ ኡታና። እ ሱረተꬃ ኮያና፤ ፅሎተꬃ ኦꬃናዉ ኤለሳና” ያጋና።

6 ይሁዳ አሳይ፥ “ሞአበ አሳይ አይ መላ ኦቶርያኮ ኑ ኤንታ ኦቶሩዋ ስእዳ፤ ኤንታ ጬቁዋነ ኤንታ ጫሻ ስእዳ፤ ሽን ኤንታ ኦቶሮይ ሀዳ” ያጋና።

7 ሄሳ ግሾ፥ ሞአበይ ባዉ ዬኮ፤ አስ ኡባይካ ሞአበስ ዬኮ። ቅር-ሄሬሳን ህንተ ደእያ ዎደ ምዳ ሎኦ ካꬃ ሀሳይሸ ዬክተ። 8 ሀሰቦና ጎሻይነ ሰባማ ዎይነ ጋደይ ꬋይስ። ካዎተꬃታ ሀላቃት የረꬅዳ ታሸት መላ ቢታ ካንꬅድ ያእዜራ ጋክዶሶና፤ ኤንታ አጫይ ዳይድ፥ አባ ፕንስ። 9 ታኒ ያእዜራ ካታማስ ዬክዳይሳዳ ሰባማ ካታማ ዎይነታስ ዬካይስ። ሀሰቦና ካታማስነ ኤልኣላ ካታማስ፥ ታኒ ታ አፉꬃ ጉሳይስ። ህንተ ምꬃ አይፍያነ ህንተ ቦትዳ ካꬃ ቦላ ኦል ደንድስ። 10 ጎሻ ጋድያፐ ኡፋይስነ ሀሹ ጉስ ኤከትስ። ዎይነ ጋድያን ማዝሙረይ የፀተና። ኡፋይሳን ዎይነ ጉምእያ በሳን ጉምእያ አስ ባዋ፤ ታኒ ጉምኤይሳታ እልልሳ ꬋይሳስ። 11 ሄሳ ግሾ፥ ታ ዎዛናይ ሞአበስ፥ ታ ጋርሳ አሳተꬃይካ ቅር-ሄሬሳስ ዬኬስ። 12 ሞአበይ ባ ዙማ ቦላ ከይኮካ፥ ባና ጮ ዳቡርሴስ፤ እ ዎሳናዉ ባ ኤቃ ኬꬅ ገልኮካ ባና አይኮካ ማደና።

13 ጎዳይ ካሰትድ ሞአበባ ኦድዳ ቃላይ ሀይሳ። 14 ሽን ሀእ ጎዳይ፥ “ኡነ ኦሳንቾ ዎደይ ጉꬃ ግደይሳ መላ ሞአበ ቦንቾይነ እያ ዳሮተꬃይ ሄꬑ ላይꬃ ግዶን ዉራና። እያን አትያ አሳይ ፓꬆናይሳታነ ዎልቅ ባይናይሳታ ግዳና” ያጌስ።